Вы тут

Эксперты расказалі пра асноўныя кірункі развіцця галіны ЖКГ


Перадавыя тэхналогіі і напрацоўкі ў сферы ЖКГ паказалі работнікі галіны на І Міжнароднай спецыялізаванай выставе жыллёва-камунальнай гаспадаркі «Наш дом», якая прайшла на гэтым тыдні ў сталіцы. А падчас васьмі круглых сталоў у яе межах абмяркоўваліся пытанні эксплуатацыі і тэхнічнага рэгулявання жылля, працэсы лічбавізацыі кіравання маёмасцю, падрыхтоўкі кадраў, водазабеспячэння, удасканалення смеццевай галіны, добраўпарадкавання. Падчас выставы прайшла таксама калегія Міністэрства ЖКГ, на якой эксперты агучылі гатоўнасць краіны да зімы і абмеркавалі шляхі будучага развіцця. Эксперты падзяліліся з журналістамі меркаваннямі па стане і развіцці асноўных напрамкаў сферы.


Пра ацяпленне і яго кошт

Рашэнне аб пачатку ацяпляльнага сезона ў краіне прымаюць мясцовыя ўлады зыходзячы з існуючых умоў надвор'я: сярэднесутачная тэмпература павінна быць ніжэйшай за 8 градусаў на працягу пяці сутак, нагадаў міністр ЖКГ Андрэй ХМЕЛЬ.

— Сёння жыллёвы фонд і кацельнае абсталяванне да пачатку сезона гатовыя. У найбліжэйшыя дні рашэнне будзе прынята, і ў нашы дамы паступіць цяпло.

Палітыка кіраўніцтва нашай краіны дазваляе мець даволі даступны кошт на энергарэсурсы, таму рэзкага росту тарыфаў, у тым ліку на ацяпленне, не прадбачыцца. Тым больш што урадам у чэрвені гэтага года было прынята рашэнне не падымаць тарыфы на цеплавую энергію, што за працяглы час адбылося ўпершыню, удакладніў міністр:

— Налета, як звычайна, кошт усіх жыллёва-камунальных паслуг будзе расці два разы, як звычайна: 1 студзеня і 1 чэрвеня. Аднак, паводле склаўшайся практыкі, рост тарыфаў залежыць ад даходаў насельніцтва і не перавышае пяці долараў. Такая палітыка і застанецца.

Пра аплату жыллёва-камунальных паслуг

У краіне цяпер субсідзіруюцца толькі дзве паслугі: цеплазабеспячэнне і падагрэў вады. Гэта самыя важкія па кошце камунальныя паслугі, якія дзяржавай пакрываюцца амаль на 80 %. Пры гэтым паслуга цеплазабеспячэння таксама аплачваецца насельніцтвам па-рознаму. Па эканамічна-абгрунтаваных тарыфах плацяць уласнікі, у кватэрах якіх ніхто не прапісаны, а таксама тыя, хто не заняты ў эканоміцы. Іншыя паслугі ў асноўным аплачваюцца ў поўным аб'ёме, расказаў Андрэй Хмель:

— Сёння кошт гігакалорыі ў выглядзе тарыфаў для насельніцтва — крыху больш за 20 рубёў, хаця сабекошт у сярэднім па краіне складае каля 100 рублёў.

Пра лічбавізацыю і службу 115

Лічбавізацыя — трэнд, які ў краіне трэба актыўна развіваць і ўдасканальваць, лічыць міністр ЖКГ:

— Мы рухаемся да дыстанцыйнага з'ёму паказчыкаў ужытай энергіі, бім-тэхналогій, праграм па кіраванні жылым фондам. Служба 115 знаходзіцца на пачатку свайго шляху і з кожным годам будзе ўдасканальвацца, бо гэта эвалюцыйны працэс, і негатыў, звязаны з яе работай, будзе зніжацца.

Перад галіной ЖКГ стаіць задача штогод памяншаць колькасць зваротаў насельніцтва са скаргамі і заяўкамі ў службу 115 на 1,5 %, што прадугледжана праграмай «Камфортнае жыллё і спрыяльнае асяроддзе». Аднак сёлета гэтая колькасць зменшылася на 9,2 %, што з'яўляецца вельмі высокім паказчыкам, паведаміў Віталь СМІРНОЎ, намеснік міністра жыллёва-камунальнай гаспадаркі:

— З пачатку года да 31 жніўня ў службу 115 паступіў 1 мільён 650 тысяч заявак, 1 мільён 120 тысяч з якіх — не скаргі, а кансультацыі па пэўных пытаннях: тэматыка іх самая розная. Добраўпарадкаванне тэрыторый, электразабеспячэнне, эксплуатацыя жылля, якасць аказання паслуг па водазабеспячэнні... Зімой гэта, як правіла, ацяпленне, летам — пакос травы, прыборка тэрыторыі. Аднак у большасці сваёй пытанні датычацца ўсё ж эксплуатацыі жыллёвага фонду, бягучага і капітальнага рамонту.

Паслугі павінны аказвацца людзям якасна і аператыўна. Прычым гэта павінна адбывацца ненавязліва і так, каб іх хацелася спажываць, лічыць Канстанцін ШУЛЬГАН, міністр сувязі і інфарматызацыі:

— Усё, што выкарыстаў чалавек, павінна паступаць у інфармацыйную сістэму пастаўшчыка паслуг без яго ўдзелу, аўтаматычна. Я б дадаў, што гэтыя налічэнні павінны аўтаматычна спісвацца з рахунку банкаўскай карткі, калі чалавек сам не захоча пракантраляваць, як вядзецца працэс.

Пра кіраванне жыллём

У Беларусі існуе дзве асноўныя формы кіравання жыллём: таварыствы ўласнікаў (ТУ) і ўпаўнаважаная асоба — жыллёва-эксплуатацыйныя ўчасткі (ЖЭУ). Стаўленне да людзей, якія жывуць у дамах, знаходзяцца яны пад кіраўніцвам ТУ ці ЖЭУ, аднолькавае. Што датычыцца кантролю за работай дзяржаўных жыллёвых службаў, то ён сёння больш празрысты, абазначыў Андрэй Хмель:

— Дзейнасць ТУ так не прасочваецца, аднак існуюць пытанні па дадатковых налічэннях у жыроўках, законнасці прынятых рашэнняў, правядзенні сходаў. Сёння распрацоўваецца заканадаўчы акт, які зробіць больш жорсткім падыход да дзейнасці ТУ. Каб жыхары былі ўпэўнены, у прыватнасці, што іх грошы ідуць на тыя мэты, на якія яны былі выдаткаваны. Мяркуецца, што да канца года дакумент будзе дапрацаваны.

Пра адходы

Дзяржаўная палітыка ў сферы выкарыстання адходаў ставіць мэту да 2025 года забяспечыць выкарыстанне не менш як 64 % ад агульнай колькасці створаных у Беларусі цвёрдых камунальных адходаў, агучыў міністр ЖКГ:

— У краіне працуе сістэма раздзельнага збору адходаў, нарыхтоўчыя пункты. Аднак аб'ём другасных матэрыяльных рэсурсаў, якія вымаюцца з цвёрдых камунальных адходаў (ЦКА), сёння не перавышае 20 %, а ў ЦКА застаецца яшчэ шмат карыснай сыравіны. Таму мы рухаемся ў бок будаўніцтва смеццесартавальных заводаў, каб максімальна выкарыстоўваць карысную сыравіну са створаных аб'ёмаў адходаў. Мы скіраваны на тое, каб выкарыстоўваць тую частку адходаў, што не падлягае другаснай перапрацоўцы, у выглядзе РДФ-паліва, а гэта яшчэ 30 % ад камунальных адходаў, а таксама арганічную частку адходаў — гэта яшчэ 40 %.

Часам даводзіцца чуць шмат негатыву ў бок ЖКГ, аднак гэта не азначае, што галіна кепска працуе. Проста камунальнікі мала паказваюць свае дасягненні. Насамрэч рэалізоўваецца вельмі шмат праграм і мерапрыемстваў, каб грамадзянам жылося лепш. А яшчэ вельмі важна чуць ад насельніцтва аб'ектыўную крытыку — гэта дапамагае галіне рухацца наперад, рэзюмаваў міністр.

Спецыялісты спадзяюцца, што ўсе пачутыя і ўбачаныя на выставе прапановы з часам будуць укараняцца.

Ірына СІДАРОК

Фота аўтара

Выбар рэдакцыі

Рэгіёны

Сок з дастаўкай і з ледзяшамі: на Брэстчыне пачаўся сезон нарыхтоўкі бярозавіку

Сок з дастаўкай і з ледзяшамі: на Брэстчыне пачаўся сезон нарыхтоўкі бярозавіку

Як мы бярозавік куплялі на гандлёвай пляцоўцы лясгаса і ў лясніцтве

Культура

Анатоль Ярмоленка: Нас натхняе беларуская паэтычная класіка

Анатоль Ярмоленка: Нас натхняе беларуская паэтычная класіка

Творчая вечарына народнага артыста Беларусі прайшла ў адной з мінскіх гімназій.