Сёлета ў Нацыянальнага акадэмічнага драматычнага тэатра імя Горкага пачаўся 90-ты, юбілейны сезон. З гэтай нагоды запланавана ажно 4 прэм’еры, першая з якіх адбылася 24 верасня. «Звязда» завітала на здачу спектакля «Месяц у вёсцы», рэжысёрам-пастаноўшчыкам якога стала народная артыстка Беларусі Вольга Клебановіч. Аб тым, што мы ўбачылі — у фотарэпартажы Лізаветы Голад.
Лірычная камедыя створана па матывах аднайменнай п’есы Івана Тургенева. Падзеі разгортваюцца ў вясковым маёнтку Іслаева. Павольны і звыклы ўклад жыцця парушае прыезд настаўніка Аляксея Бяляева ў выкананні Кірыла Нікіціна. Цягам некалькіх дзён сям’я перажывае шмат падзей, у выніку якіх перад галоўнымі героямі паўстае пытанне: ці сапраўды яны блізкія людзі, або гэта толькі ілюзія?
Вольга Клебановіч прыўносіць свой аўтарскі погляд у трактоўку п’есы. Так, самы складаны шлях даводзіцца прайсці Лізавеце Багданаўне, жонцы Іслаева. У выканнані Іны Савянковай галоўная гераіня ўвесь час павінна весці барацьбу з самой сабой. Як можа жанчына высокага саслоў’я закахацца ў дваццацігадовага настаўніка? Але яна не адзіная, хто падпадае пад уплыў Бяляева. Яе выхаванка, сірата Верачка, таксама закахалася ў Бяляева. Ролю сямнаццацігадовай дзяўчынкі выконвае Дар’я Палякова.
Канфлікт паміж гераінямі разгортваецца паступова, спачатку незаўважна, але з кожнай сцэнай набірае моц. Здаецца, адзіны, хто захоўвае халодны розум — гэта Ракіцін, блізкі сябар сям’і Іслаевых. Ролю разважлівага інтэлігента выканаў заслужаны артыст Рэспублікі Беларусь Сяргей Чэкерэс.
Пасля маналогу аб сапраўднай вартасці сям’і, у якой адсутнічае паразуменне, заслужаны артыст Рэспублікі Беларусь Руслан Чарнецкі ўдастойваецца апладысментаў ад гледачоў. У яго выкананні Аркадзь Іслаеў таксама праходзіць нечаканую трансфармацыю. Ствараючы вобраз безуважлівага чалавека, які ўвесь час лунае ў аблоках, Чарнецкі напрыканцы спекталя адкрывае гледачам другі бок Іслаева — мужа, які кахае сваю жонку і гатовы зрабіць усё, каб яна была шчаслівая. Нават калі для гэтага трэба адпусціць яе.
Пастаральная ідылія, у якой існуюць героі, адлюстроўваецца дзякуючы рабоце стваральнікаў пастаноўкі. Спектакль насычаны светлымі колерамі і адценнямі, прыроднымі гукамі: спевамі птушак і шумам дрэў. За сцэнаграфію «Месяца ў вёсцы» адказвала Аляксандра Карнажыцкая, а за касцюмы Таццяна Лісавенка. Наступны паказ спекталя адбудзецца 21 кастрычніка.
Арына КАРПОВІЧ
Фота: Лізавета ГОЛАД
Як мы бярозавік куплялі на гандлёвай пляцоўцы лясгаса і ў лясніцтве
Творчая вечарына народнага артыста Беларусі прайшла ў адной з мінскіх гімназій.