Дабрачыннасць і міласэрнасць для супрацоўнікаў і курсантаў міліцэйскай ВНУ не пусты гук. Пад пастаяннай апекай ветэраны інстытута, якія маюць патрэбу ў маральнай падтрымцы і вырашэнні бытавых праблем. Яны знаходзяцца на асобым уліку і па ранейшаму лічацца часткай вялікага дружнага калектыву. У гэтыя дні яны пад асаблівай увагай сваіх калег і курсантаў.
Установа праяўляе клопат і пра людзей, якія жывуць у сацыяльных установах. На гэты раз каманда з курсантаў і выкладчыкаў наведала сваіх падапечных з аддзяленняў кругласутачнага знаходжання для грамадзян пажылога ўзросту і інвалідаў у аграгарадках Пудаўня Дрыбінскага раёна і Андраны — Мсціслаўскага.
— Гэтыя людзі маюць патрэбу ў доглядзе, бытавым і медыцынскім абслугоўванні, ім не хапае ўвагі з боку грамадства і мы заўсёды стараемся зрабіць ім нешта прыемнае, — паведаміла афіцыйны прадстаўнік інстытута Варвара Сярова . — У верасні мы аб’явілі збор грошай для пакупкі прадуктаў харчавання, а таксама набыцця неабходных сродкаў асабістай гігіены. Ініцыятыва, як заўсёды, была актыўна падтрымана. І курсанты, і супрацоўнікі інстытута ўключыліся ў працэс і сабралі неабходную суму.
Сваіх памочнікаў у пагонах у дамах-інтэрнатах заўсёды чакаюць і сустракаюць з вялікай радасцю. Гэта бачна і па шчаслівых усмешках, і па святочным адзенні тутэйшых жыхароў. Для іх госці заўсёды свята. Па традыцыі разам з падарункамі дабрадзеі прывозяць і цікавую канцэртную праграму. Удзячныя гледачы не шкадуюць для артыстаў шчодрых апладысментаў.
— Мне вельмі спадабаўся канцэрт, я нават расплакалася ад эмоцый,— прызналася пенсіянерка Ларыса Макарава, якая знаходзіцца на абслугоўванні сацыяльнай ўстановы ў вёсцы Андраны. —Дзякуй маладым людзям за гэта свята для душы і сэрца.
На думку кіраўніцтва інстытута, такія візіты выхоўваюць у курсантаў пачуццё адказнасці перад грамадствам, гатоўнасць прыйсці на дапамогу. Без гэтага немагчыма быць сапраўдным патрыётам.
— Свята і існуе для таго, каб аб’яднаць людзей, прыцягнуць увагу да тых, каму неабходна падтрымка. І дробязей тут не бывае. Калі чалавек ведае, што ён не адзін, пераадолець жыццёвыя цяжкасці яму будзе значна лягчэй, — лічыць начальнік аддзела арганізацыйнай работы і прававога забеспячэння інстытута падпалкоўнік міліцыі Андрэй Канаплёў.
Сёлета міліцэйская вышэйшая навучальная ўстанова змагла ахапіць увагай болей чым 130 чалавек. Супрацоўнікі інстытута і курсанты перакананы, што такія справы на карысць не толькі тым, каму яны прысвячаюцца, але і тым, хто іх робіць.
— Калі бачыш усмешкі на тварах гэтых людзей, хочацца дапамагаць яшчэ больш, — прызнаецца чацвёртакурсніца факультэта міліцыі Анастасія Пенязь. — Дзень пажылога чалавека, безумоўна, свята значнае і важнае. Яно дазваляе прыцягнуць увагу да болевых кропак нашага грамадства, праявіць лепшыя чалавечыя якасці, ахапіць увагай і клопатам прадстаўнікоў найбольш уразлівай катэгорыі насельніцтва. Ніколі не ведаеш, што чакае нас заўтра. Таму трэба спяшацца рабіць дабро, і не толькі па святах. Я веру, што яно абавязкова вернецца і да таго, хто яго робіць.
Нэлі ЗІГУЛЯ
Фота Варвара СЯРОВАЙ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
