У Баранавічах прайшло выязное пасяджэнне Кансультатыўнага міжканфесійнага савета пад старшынствам Упаўнаважанага па справах рэлігій і нацыянальнасцяў Аляксандра Румака, на якім разглядаліся пытанні, звязаныя з аказаннем дапамогі асобам, якія патрапілі ў складаныя жыццёвыя сітуацыі.
У пасяджэнні прынялі ўдзел прадстаўнікі Міністэрства працы і сацыяльнай абароны, Міністэрства ўнутраных спраў, члены Кансультатыўнага міжканфесійнага савета — кіраўнікі рэспубліканскіх рэлігійных арганізацый, работнікі галіны аховы здароўя, прадстаўнікі аблвыканкамаў і Мінгарвыканкама.
Галоўнае пытанне, якое абмярковывалася падчас пасяджэння, — выпрацоўка алгарытму ўзаемадзеяння органаў улады з рэлігійнымі арганізацыямі па рэабілітацыі людзей, якія патрапілі ў алкагольную і наркатычную залежнасць.
Удзельнікі выязнога мерапрыемства пазнаёміліся з дзейнасцю рэабілітацыйных цэнтраў, якія дзейнічаюць пры рэлігійных арганізацыях. У прыватнасці, наведалі вёску Сасноўка Слонімскага раёна Гродненскай вобласці, дзе працуе праваслаўны Цэнтр рэабілітацыі залежных ад алкаголю і наркотыкаў «Анастасіс», які належыць Жыровіцкаму Свята-Успенскаму манастыру. За адзіннацаць гадоў, што працуе ўстанова, тут паспелі атрымаць дапамогу сотні людзей, якія самастойна не маглі справіцца з сацыяльнымі хваробамі. Сюды прыязджаюць мужчыны і жанчыны ва ўзросце 18–50 гадоў, якія хочуць пазбавіцца ад залежнасці. Ва ўстанове сабралася каманда неабыякавых супрацоўнікаў: псіхатэрапеўт-нарколаг, псіхолаг, праваслаўны святар і валанцёры, якія самі прайшлі рэабілітацыю. Як заўважыў дырэктар Цэнтра «Анастасіс Сасноўка» Сцяпан Турбал, тут не працуюць, а менавіта служаць, бо кожны рэабілітант патрабуе індывідуальнай увагі. Часта людзі прыбываюць з паніжанай самаадзнакай, і шмат часу надаецца таму, каб яны змаглі разабрацца са сваімі эмоцыямі, паверылі ў сябе, зразумелі, як наладзіць узаемаадносіны з блізкімі, упісацца ў соцыўм. А гэта цяжкая, штодзённая праца, якая не скончыцца нават, калі чалавек пакіне рэабілітацыйны цэнтр. У цэнтры дапамагаюць разабрацца з прычынамі, якія прывялі да хваробы, і падказваюць, як з ёй змагацца. Кожны дзень прыбывання на рэабілітацыі распісаны па гадзінах, у вучэбных класах ідуць групавыя і індывідуальныя заняткі са спецыялістамі. Нягледзячы, што сярод «часовых жыхароў» цэнтра трапляюцца людзі з рознымі лёсамі і прафесіямі (сярод іх бываюць нават медыкі і прафесары), ім даводзіцца садзіцца за парты і... пісаць сачыненні. Гэта таксама праца над сабой: у пісьмовых работах яны аналізуюць сябе, свае думкі і ўчынкі. Сацыяльныя, псіхалагічныя, працоўныя мерапрыемствы (пры цэнтры ёсць свая гаспадарка) накіраваны на аднаўленне фізічнага і духоўнага здароўя. Немалую ролю ў рэабілітацыі адыгрывае і дапамога царквы, падапечныя цэнтра ўдзельнічаюць у богаслужэннях і царкоўных таінствах.
Другі цэнтр, які наведалі ўдзельнікі выязнога мерапрыемства, дзейнічае ў Баранавічах пры рэлігійнай місіі «Вяртанне» Аб’яднанай Царквы хрысціян веры евангельскай. Тут таксама накоплены багаты вопыт па рабоце з людзьмі, якія патрапілі ў залежнасць. Праз рэабілітацыйныя цэнтры, якія дзейнічаюць пры царкве, ужо прайшло больш за тры тысячы чалавек. Цэнтр супрацоўнічае з гарадскімі службамі. Так, рэабілітанты ў Баранавічах замацаваныя за канкрэтнай паліклінікай. Пасля прахаджэння курсу людзям дапамагаюць знайсці працу. У многіх з тых, хто прайшоў рэабілітацыю, наладжваецца жыццё, людзі набываюць прафесіі, уладкоўваюцца на працу, заводзяць сям’ю. Некаторыя рэабілітанты становяцца валанцёрамі, стараюцца дапамагчы іншым людзям, якія патрапілі ў складаную сітуацыю.
Людзі, якія знаходзяцца ў рэабілітацыйным цэнтры ўжо на працягу некалькіх месяцаў, прызнаюцца, што ўдзячны ўсім, хто ім дапамагае і што менавіта тут яны змаглі нарэшце адчуць сябе свабоднымі.
Падчас пасяджэння прадстаўнікі органаў аховы здароўя, МУС, сацыяльных службаў расказалі аб праграмах, якія скіраваны на працу з дадзенай катэгорыяй грамадзян і магчымасці, якія маюцца ў дзяржавы для вырашэння пытанняў. Удзельнікі падзяліліся думкамі аб далейшай працы ў аказанні дапамогі асобам з залежнасцю і прафілактыцы шкодных звычак.
Ганна ПЯТРОВА
Фота Яўгена ПЯСЕЦКАГА
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
