З 1 кастрычніка па 3 лістапада ў Нацыянальнай бібліятэцы праходзіць выстава «Жывая стыхія творчасці», прымеркаваная да 90-годдзя з дня нараджэння беларускага пісьменніка Івана Пташнікава (1932-2016), паведамляе сайт установы.
Іван Пташнікаў — адзін з найбольш цікавых, самабытных празаікаў беларускай літаратуры, таленавіты і яркі прадстаўнік свайго пакалення, пакалення дзяцей вайны. Чароўны свет прыроды, жыццё людзей, іх праца, побыт, узаемаадносіны, іх барацьба за незалежнасць і аднаўленне роднага краю, іх мужнасць і шчодрасць душы — усё гэта фармавала духоўны свет пісьменніка, яго творчую натуру. Раманы, аповесці і апавяданні Івана Пташнікава набылі шырокую вядомасць не толькі ў Беларусі, але і далёка за яе межамі.
Сярод сучасных беларускіх празаікаў ён вылучаецца адданасцю вясковай тэме. Лёс вясковага чалавека на розных жыццёвых дарогах, яго характар, грамадзянская і сацыяльная значнасць застаюцца ў цэнтры ўвагі пісьменніка. Экспазіцыя знаёміць наведвальнікаў з літаратурнай спадчынай аўтара, прысвечаным гэтай тэме: раманамі «Чакай у далекіх Грынях», «Мсціжы», «Алімпіяда».
Важнае месца ў творчасці І.Пташнікава належыць і вайне. Жахі і боль ваеннага ліхалецця назаўсёды ўвайшлі ў яго памяць. Менавіта таму вайна, час аднаўлення роднага краю раскрываюцца ў творах пісьменніка глыбока і праўдзіва, абвострана і трагічна, эмацыянальна і напружана: аповесці «Лонва», «Тартак», «Найдорф», апавяданні «Алёшка», «Алені», «Бежанка» і інш.
На полках прадстаўлена першая кніга пісьменніка «Зерне падае не на камень», якая выйшла ў 1959 годзе, зборнікі яго твораў і кнігі выбраных твораў, выдадзеныя ў розныя часы. Наведвальнікі могуць пазнаёміцца з расповедам І.Пташнікава «Львы» — першым у беларускай прозе творам аб чарнобыльскай трагедыі.
Асобны раздзел выставы прысвечаны перакладам твораў пісьменніка на рускую, украінскую, польскую, англійскую, балгарскую і іншыя мовы свету.
Апошняя частка экспазіцыі знаёміць з публікацыямі, якія змяшчаюцца ў энцыклапедычных выданнях, кнігамі і артыкуламі пра жыццё і творчасць І.Пташнікава.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
