Светлагоршчына: Звароты з-за чыстай вады і старых дарог

Зварот да парламентарыя застаецца адным з самых запатрабаваных спосабаў пошуку вырашэння хвалюючых пытанняў у людзей. Некалькі прыкладаў, калі пасля агучвання праблемы на самым высокім узроўні набалелае вырашаецца, прыводзяць у Светлагорскім раёне. Мясцовыя жыхары ў час правядзення адзінага дня прыёму грамадзян у Гомельскай вобласці членамі Савета Рэспублікі шукалі дапамогі ў вырашэнні праблем, якія ўплываюць на якасць жыцця не адной сям'і. Водгук на звароты не прымусіў сябе чакаць.

5 кастрычніка ў Мінскай вобласці члены Савета Рэспублікі праводзяць адзіны дзень прыёму грамадзян. Парламентарыі наведаюць усе раёны Міншчыны, сустрэнуцца з жыхарамі, выслухаюць іх просьбы, прапановы і скаргі, па магчымасці пасадзейнічаюць у вырашэнні хвалюючых пытанняў.

Мы  сабралі некалькі рэальных гісторый рэальных людзей, якія звярнуліся па дапамогу і атрымалі яе. Як той казаў, блізкая ўлада ў дзеянні.

Сёння ў вёсцы Карпавічы Асташкавіцкага сельсавета, што на Светлагоршчыне, пастаянна пражывае крыху менш за 30 чалавек. У 12 дварах — уласныя свідравіны для водазабеспячэння, на вясковых вуліцах — пяць студняў агульнага карыстання, але бяруць ваду людзі толькі з трох. Адзін з калодзежаў знаходзіцца побач з домаўладаннем Алы Казловай. Пенсіянерку, якая пераехала ў Карпавічы і пасялілася ў бацькоўскім доме, хвалявала праблема даступнасці і якасці пітной вады ў вёсцы. Адпаведны зварот і адрасавала жанчына Старшыні Савета Рэспублікі Наталлі Качанавай падчас асабістага прыёму, які спікер верхняй палаты парламента праводзіла ў Светлагорску. Звярнулася да парламентарыя мясцовая жыхарка таксама з просьбай разабрацца ў спрэчнай сітуацыі, якая ўзнікла з-за таго самага калодзежа, што на мяжы дамоў заяўніцы і яе суседкі.

— Сёння пытанне заяўніцы аб доступе да студні на вуліцы вырашана. Сіламі мясцовай гаспадаркі ААТ «Асташкавічы» перад зімовым сезонам таксама праверана работа водазаборнай калонкі каля дома Алы Казловай, — адзначыў старшыня Асташкавіцкага сельскага Савета дэпутатаў Ігар Манько.

Між тым, каб увогуле вырашыць праблему чыстай вады для вяскоўцаў, быў праведзены цэлы комплекс работ: рамонт і ачыстка воданапорнай вежы, прамыванне сетак водазабеспячэння, замена глыбіннай помпы, рамонт водазаборнай калонкі, звяртае ўвагу Ігар Манько. Сёння нараканняў на праблему з вадой ад жыхароў Карпавіч не паступае.

— Зрабілі калонку, праехалі па вуліцах Лясной, Рамязоўскага, праглядзелі, больш людзі не скардзяцца. Увесь час вадой карыстаюся, каб усе так пытанні вырашаліся, — расказала нам сама жанчына, якая ўзняла праблему.

Добрыя водгукі на дапамогу ў вырашэнні сваіх зваротаў агучвае і Валянціна Шарыпава. Жыхарка Светлагорска на прыём да Наталлі Качанавай прыйшла з асабістым пытаннем. Валянціна Іванаўна шукала дапамогі, каб канчаткова разабрацца ў гісторыі трагічнай гібелі ў ДТЗ яе пляменніка.

— На прыёме не змагла стрымацца, моцна плакала, — падзялілася Валянціна Шарыпава. — Наталля Іванаўна паставілася да мяне вельмі душэўна. Вялікі ёй дзякуй, што ўважліва выслухала мяне, падтрымала ў маім пытанні. Я ёй вельмі-вельмі ўдзячная.

Пасля звароту па асабістым пытанні жыхарка райцэнтра таксама агучыла дарожную праблему, якая хвалюе не адно сямейства не толькі светлагорцаў, але і жыхароў раёна.

— Узняла пытанне па дарозе ў Светачы, каля 9-й школы, таксама расказала пра стан дарогі па вуліцы Школьная ў вёсцы Прудок і ў Ельнічках, — тлумачыць заяўніца.

Пасля агучвання хвалюючай праблемы ў Светлагорску на вуліцы Лазо, што ў мікрараёне Светач, быў цалкам заменены верхні слой асфальтабетоннага пакрыцця. Выкананы і ямачны рамонт на ўчастку праезнай часткі каля 9-й школы ў Светлагорску.

— Чакаем, што зменіцца сітуацыя з дарогай і ў Прудку, — спадзяецца Валянціна Шарыпава.

Як высветлілася, вуліца Школьная ў аграгарадку Прудок забудоўвалася ў пачатку 1970-х гадоў. Грунтавая дарога тут згаданага перыяду. Раз у год яе праходзяць грэйдарам, але ў міжсезонне, у дажджлівыя дні дабарцца некуды па Школьнай — тое яшчэ выпрабаванне. А між тым, па вуліцы, дзе якраз размешчана Прудкоўская школа, рух вельмі актыўны. Пасля агучвання дадзенай праблемы на асабістым прыёме ў Старшыні Савета Рэспублікі жыхары аграгарадка спадзяюцца, што дарогу заасфальтуюць.

Наталля КАПРЫЛЕНКА