У вераснёўскім нумары часопіса «Полымя» сярод іншых публікацый, несумненна, вылучаецца працяг рамана Людмілы РУБЛЕЎСКАЙ «Авантуры Пранціша Вырвіча, маршалка Менскага». Гэта — ужо сёмы раман са знакамітага цыкла прыгодніцкіх «Авантур...» вядомай пісьменніцы і журналісткі. У раздзеле «Проза і паэзія» варта параіць прачытаць апавяданні Алеся ВЕТАХА (яго падборка складаецца з чатырох твораў) і Анатоля БУТЭВІЧА — «Сівак» і «Закаханы Сарокаён, або Праўдзівае апавяданне пра птушынае каханне».
З паэтычнымі творамі ў вераснёўскім нумары «Полымя» выступаюць Віктар ГАРДЗЕЙ (з падборкай «Бог умее птушкам дараваць...»), Уладзімір БАБКОЎ, Яўген ГУЧОК, Ірына МАКАРЧУК.
У раздзеле «Крытыка і літаратуразнаўства» — артыкул Алены БОГДАН «Діаріуш...» Афанасія Філіповіча як помнік беларускай мемуарнай прозы«. 110-годдзю народнага паэта Беларусі Максіма Танка (ён доўгі час узначальваў і рэдакцыю часопіса «Полымя») прысвечаны грунтоўны артыкул знанага літаратуразнаўцы Міколы МІКУЛІЧА «Вельмі добра, што вы ёсць на свеце...». Традыцыі Максіма Танка ў беларускай паэзіі".
Цікавай падаецца вялікая падборка «Да 100-годдзя часопіса «Полымя» (нагадаем: першы нумар выйшаў у снежні 1922 года). У ёй змешчаны артыкул Сяргея ЧЫГРЫНА «Уладзіслаў Чаржынскі і часопіс “Полымя”, 1920-я гады» і артыкул самога Уладзіслава ЧАРЖЫНСКАГА «Літаратурная трыбуна». Друкуецца працяг успамінаў вядомага паэта і публіцыста, «палымянца» са шматгадовым стажам лаўрэата Дзяржаўнай прэміі Рэспублікі Беларусь Генадзя ПАШКОВА «Круціла жорны завіруха, або Ля цяпельца “Полымя”. Праўдзівыя гісторыі ад іх удзельніка і сведкі». З мемуарнай нататкай «Далёкае і блізкае» выступае лаўрэат Дзяржаўнай прэміі Рэспублікі Беларусь Георгій МАРЧУК.
У «Кнігарні» — рэцэнзіі на кнігі Вячаслава Чамярыцкага «Жыватворная спадчына» і лаўрэата Дзяржаўнай прэміі Рэспублікі Беларусь Міхася Башлакова «На зветраных шляхах».
Дарэчы, на другой вокладцы вераснёўскага нумара «Полымя» — верш Максіма Танка: «*** Прыпісалі: спакой/ І нейкія кроплі./ Забаранілі хадзіць,/ І раптам бачу:/ Сарваўся з вешалкі/ Мой капялюш,/ А за ім — плашч,/ А за плашчом/ Ціха падаліся за дзверы/ Мае старыя сябры — / Дарожны кій/ І боты.../ Куды гэта яны?../ Ледзь дагнаў іх/ На нарачанскай/ Дарозе».
Мікола БЕРЛЕЖ
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
