Начныя замаразкі, а ўдзень сонечна і нават адносна цёпла

На гэтым тыдні будзе пераважаць вобласць павышанага атмасфернага ціску, таму істотных ападкаў па краіне не чакаецца. А гэта значыць, што нас чакае цалкам камфортнае, для сярэдзіны кастрычніка, надвор'е. Толькі днём 11 і 12 кастрычніка месцамі па Беларусі будуць адзначацца невялікія кароткачасовыя дажджы, як паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

Начныя замаразкі стартуюць ужо ў аўторак. У гэтыя суткі ноччу будзе пераважна без ападкаў, а раніцай і днём месцамі па краіне пройдуць невялікія кароткачасовыя дажджы. У начныя і ранішнія гадзіны ў асобных раёнах чакаецца туман. Удзень паветра прагрэецца да плюс 9—14 градусаў, а па поўдні — да плюс 16 градусаў.

І ў сераду ўначы чакаецца пераважна без ападкаў. Днём месцамі па Беларусі прагназуюцца невялікія кароткачасовыя дажджы. Ноччу і раніцай слабы туман. Тэмпература паветра ўначы будзе вагацца ад плюс 1 градуса да 7 цяпла. У асобных раёнах — замаразкі ад 0 да мінус 3 градусаў. Удзень тэмпература паветра складзе плюс 8—15 градусаў.

Абсалютна не будзе дажджоў і ў чацвер. У гэты дзень ноччу і раніцай слабы туман. Тэмпература паветра ўначы складзе плюс 1—7 градусаў. Месцамі будуць начныя замаразкі ад 0 да мінус 3 градусаў. Удзень паветра прагрэецца да плюс 8—15 градусаў.

У пятніцу таксама пераважна без ападкаў. Ноччу і раніцай у асобных раёнах туман. Тэмпература паветра ўначы будзе плюс 1—7 градусаў, месцамі замаразкі ад 0 да мінус 3 градусаў. Днём слупок тэрмометра дасягне адзнакі плюс 8—15 градусаў.

Паводле папярэдняга прагнозу айчынных сіноптыкаў, у ноч на суботу яшчэ захаваецца антыцыкланальны характар надвор'я, а вось у ранішнія гадзіны да заходніх рэгіёнаў нашай краіны наблізіцца франтальны раздзел. У гэты час атмасферны ціск пачне падаць, павялічыцца колькасць аблокаў і пераважна па заходняй палове краіны пойдуць кароткачасовыя дажджы. Таму ў суботу ўначы надвор'е будзе пераважна без ападкаў. Раніцай і днём у асноўным па заходняй палове краіны пройдуць кароткачасовыя дажджы. У начныя і ранішнія гадзіны слабы туман. Уначы тэмпература паветра будзе вагацца ад плюс 1 да плюс 8 градусаў, месцамі замаразкі — ад 0 да мінус 3 градусаў. Днём тэмпература паветра падымецца да плюс 9—16 градусаў.

У Белгідрамеце папярэдзілі, што ў сувязі з начнымі замаразкамі не варта пакідаць без хованкі на палях выкапаную сельскагаспадарчую прадукцыю. У начныя і ранішнія гадзіны месцамі па краіне будуць згушчацца туманы, таму варта быць уважлівымі на дарогах.

Сяргей КУРКАЧ