Качанава: у Жыровіцкім манастыры выкананы вялікі аб’ём рамонтных работ

У Свята-Успенскім Жыровіцкім стаўрапігіяльным мужчынскім манастыры выкананы вялікі аб’ём рамонтных работ, але па некаторых пытаннях варта паскорыцца, заявіла журналістам старшыня Савета Рэспублікі Наталля Качанава пасля выязной нарады па пытаннях правядзення рамонтна-рэстаўрацыйных работ у гэтым манастыры, перадае БелТА.

Наталля Качанава нагадала, што пры наведванні ў 2021 годзе манастыра Прэзідэнт паставіў дакладную задачу — адрамантаваць храм, які знаходзіцца на яго тэрыторыі, а таксама прывесці ў ідэальны стан аграгарадок Жыровічы. У мэтах развіцця гэтага даручэння была распрацавана праграма па навядзенні парадку ў Жыровічах і рамонтных работах у манастыры. Сёння на нараду запрасілі зацікаўленых, у тым ліку прадстаўнікоў Гродзенскага аблвыканкама, Слонімскага райвыканкама, праектныя арганізацыі, падрадчыкаў, каб прааналізаваць, якія работы выкананы, і вызначыць, што яшчэ неабходна ў гэтым годзе для іх завяршэння.

«Інвестыцыйнай праграмай дакладна вызначана фінансаванне на гэты год. Па некаторых пытаннях трэба паскорыцца, таму што ў цэлым усё, што прадугледжана праектна-каштарыснай дакументацыяй па храме, павінна быць выканана ў гэтым годзе», — сказала спікер.

Больш таго, старшыня Савета Рэспублікі цікавілася далейшымі работамі на 2023 год. «Задача стаіць — выканаць работы ў адпаведнасці з гэтай праграмай да 2025 года. Ёсць яшчэ два гады на рэалізацыю тых задач, якія вызначаны праграмай па навядзенні парадку, добраўпарадкавання на тэрыторыі аграгарадка Жыровічы і Жыровіцкага манастыра», — адзначыла Наталля Качанава.

Спікер заўважыла, што з сакавіка, калі яна была ў Жыровічах мінулы раз, тут выканана даволі шмат работы. У прыватнасці, завяршаюцца работы па даху. «Работы праводзяцца. Вядома, хацелася б, каб яны былі больш інтэнсіўнымі, таму што надыходзіць не вельмі спрыяльны перыяд для рамонту даху і фасадаў. Таму сёння мы вызначыліся, што да канца кастрычніка гэтыя работы будуць выкананы», — падкрэсліла Наталля Качанава, дадаўшы, што далей можна будзе праводзіць работы ўнутры храма.

«У параўнанні з сакавіком, вядома, работы выканана даволі шмат. Распрацавана ў поўным аб’ёме праектна-каштарысная дакументацыя, узгоднены тыя пытанні, якія былі спрэчнымі, з Міністэрствам культуры, таму што гэты храм — гістарычная каштоўнасць, а да такіх аб’ектаў асаблівае стаўленне і асаблівыя патрабаванні з боку Міністэрства культуры», — заўважыла старшыня Савета Рэспублікі.

Спікер таксама звярнула ўвагу, што дзяржава асаблівую ўвагу надае праваслаўнай царкве, якой аказваецца значная падтрымка. «Падтрымка сур’ёзная, але ў такіх пытаннях і людзі павінны па-іншаму ставіцца да валанцёрства, мецэнацтва, — лічыць Наталля Качанава. — Сёння мы ўручылі падзяку аднаму мецэнату, які дапамагае (добраўпарадкоўваць тэрыторыю манастыра. — Заўвага БелТА) фінансава. Гэта годна ўсякай хвалы і прыклад для іншых, калі мы ўсе разам, светам робім вельмі важныя і патрэбныя справы для нашай краіны, нашага народа і нашай Праваслаўнай Царквы».

Фота: БелТА