Напярэдадні кожных летніх выхадных Міністэрства па надзвычайных сітуацыях рэкамендавала быць пільнымі на вадзе, асабліва берагчы дзяцей, — адпаведныя смс-паведамленні атрымліваў кожны, хто мае мабільны тэлефон. Хочацца верыць, што падобным спосабам удалося папярэдзіць не адну трагедыю. З пачаткам восені, а, адпаведна, пажаранебяспечнага сезона, пры дапамозе смс-апавяшчэння ратавальнікі просяць грамадзян быць асцярожнымі пры абыходжанні з агнём, нагадваюць, што з-за бестурботнасці дарослых на пажарах гінуць дзеці...
Днём 4 кастрычніка ратавальнікі атрымалі сігнал аб пажары ў адной з кватэр дзевяціпавярховага жылога дома ў Мінску. Выратаваць знойдзенага гаспадара і яго сына 2017 года нараджэння не ўдалося...
Жудасная трагедыя адбылася вечарам 9 кастрычніка ў Барысаве. Ратавальнікам паступіла паведамленне аб узгаранні ў адной з кватэр шматпавярховіка. Падчас ліквідацыі пажару супрацоўнікі Міністэрства па надзвычайных сітуацыях выявілі трох чалавек. Усе з іх — 37-гадовая жанчына, а таксама дзеці трох і сямі гадоў — знаходзіліся ў беспрытомным стане. Нягледзячы на намаганні ўрачоў, выратаваць браціка і сястрычку не ўдалося. Жанчына, іх маці, па сёння знаходзіцца ва ўстанове аховы здароўя.
Дык што ж здарылася ў той дзень? Па папярэдняй версіі следства (Следчым камітэтам узбуджана крымінальная справа), незадоўга да трагедыі бацькі ўжывалі алкагольныя напоі, пасля чаго заснулі. Без нагляду засталіся іх трое непаўналетніх дзяцей: трох, шасці і сямі гадоў. Малыя не прыдумалі нічога лепшага, як пагуляць з агнём: па папярэдняй інфармацыі, менавіта дзіцячае свавольства стала прычынай трагедыі. Калі ўзнік пажар, самастойна яго патушыць дзеці не змаглі. Не былі здольныя на гэта і дарослыя. Пакінуць моцна задымленае памяшканне, якое гарэла адкрытым полымем, змаглі толькі бацька і шасцігадовая дзяўчынка.
Яшчэ адно свавольства дзяцей у ліпені вылілася ў пажар, які адбыўся ў аграгарадку Багушэвічы, што ў Бярэзінскім раёне. На шчасце, у гэтым выпадку абышлося без ахвяр. Затое пра новы дах над галавой бацькам юных «эксперыментараў» паклапаціцца прыйшлося: ад іх ранейшага жылля мала што засталося. Напярэдадні дзеці гаспадароў — дзевяці і 11 гадоў, якія засталіся адны дома, — вырашылі прыгатаваць поп-корн з крупаў. Ідэю «эксперыменту» хлопцы падгледзелі ў адной з сацыяльных сетак. Дзеці нагрэлі сланечнікавы алей да такой ступені, што ён загарэўся. Хлопцы не прыдумалі нічога лепшага, як патушыць полымя вадой, чаго рабіць катэгарычна нельга. У выніку адбыўся выбух, і агонь распаўсюдзіўся па ўсёй кухні. На шчасце, юныя «эксперыментатары» своечасова пакінулі хату, іх жыццю і здароўю нічога не пагражала.
Дзіцячае свавольства з агнём — адна з прычын пажараў. Многіх трагедый можна было б пазбегнуць, калі б побач з непаўналетнімі ў гэты небяспечны момант знаходзіўся хтосьці з дарослых. Дарослы чалавек здольны самастойна справіцца з невялікім узгараннем, рацыянальна ацаніць абстаноўку, дапамагчы ўсім жыхарам пакінуць жыллё ў выпадку, калі патушыць агонь не ўдалося. Аднак, як сведчыць статыстыка, нават дарослыя ў такіх сітуацыях часта не памочнікі: будучы ў стане алкагольнага ап'янення, яны не могуць дапамагчы не толькі навакольным, але і нават сабе.
І калі ад п'янства чалавецтва, напэўна, ніколі не пазбавіцца, то прадухіліць дзіцячае свавольства з агнём цалкам магчыма. «Выхоўваючы дзіця і прывіваючы яму неабходныя навыкі бяспечных паводзін у побыце, перш за ўсё, самі бацькі павінны паказваць належны прыклад паводзін, — звяртае ўвагу афіцыйны прадстаўнік Мінскага абласнога ўпраўлення Міністэрства па надзвычайных сітуацыях Анастасія ШВАЙБОВІЧ. — Задача бацькоў — максімальна засцерагчы сваё дзіця ад надзвычайнага здарэння, прывіць навыкі абачлівасці, дысцыплінаванасці і бяспечных паводзін. Размаўляйце са сваімі дзецьмі, будуйце дыялог, цікаўцеся іх справамі і жыццём. Вы павінны ведаць, з кім сябруе ваша дзіця, з кім мае зносіны, дзе бавіць вольны час. Прыводзьце прыклады, расказвайце пра розныя надзвычайныя сітуацыі, тлумачце і нагадвайце аб бяспецы. Толькі вялікім клопатам аб нашых дзецях мы зможам папярэдзіць пажары па прычыне дзіцячага свавольства з агнём, захаваць свой дом, маёмасць і самае дарагое — жыццё дзіцяці».
Не будзе лішнім навучыць дзіця правільным дзеянням пры пажары, паказаць яму магчымыя выхады для эвакуацыі. Яшчэ важна патлумачыць, чаму ў выпадку надзвычайнай сітуацыі нельга панікаваць і хавацца.
Кожны дзень у МНС паступае звыш дзясятка паведамленняў аб узгаранні. Немалая доля з іх заканчваецца не толькі знішчаным жыллём, але і гібеллю чалавека. Узяць хаця б сутачную зводку Міністэрства па надзвычайных сітуацыях за 16 кастрычніка. За адны суткі — шэсць ахвяр агню.
У Чавускім раёне загінуў мужчына, папярэдняя прычына пажару — неасцярожнасць пры курэнні. У адным з прыватных дамоў у Магілёве загінулі два пенсіянеры, прычына — тая ж. Ва ўстанове аховы здароўя ад апёкаў, атрыманых у выніку ўзгарання, памёр жыхар Рэчыцы. На пажары ў Пінскім раёне без прыкмет жыцця знойдзена гаспадыня. На Салігоршчыне загінуў мужчына.
— З пачатку года ў краіне ад пажараў загінула звыш 470 чалавек, у тым ліку восем дзяцей, — паведамляе афіцыйны прадстаўнік Міністэрства па надзвычайных сітуацыях Яўген Бараноўскі. — Аналіз паказвае, што 67 працэнтаў пажараў з гібеллю людзей адбываецца ў перыяд з кастрычніка да сакавіка. Пры гэтым пік росту прыпадае на снежань — студзень. Пераважнай прычынай гібелі людзей ад пажараў з'яўляецца няведанне або грэбаванне мерамі бяспекі, так званы чалавечы фактар ??— бестурботныя, неасцярожныя дзеянні. Найбольшая колькасць людзей загінула ад пажараў, якія адбыліся ў аднакватэрных жылых дамах у сельскай мясцовасці, у асенне-зімовы ацяпляльны перыяд, у начны час.
Па словах афіцыйнага прадстаўніка ведамства, асноўнай прычынай гібелі людзей ад пажараў з'яўляецца неасцярожнае абыходжанне з агнём пры курэнні. Большасць загінулых былі непрацоўнымі грамадзянамі працаздольнага ўзросту і непрацоўнымі пенсіянерамі, якія знаходзіліся напярэдадні пажару ў стане алкагольнага ап'янення або загінулі па віне такіх асоб.
З мэтай павышэння ўзроўню бяспекі насельніцтва Міністэрства па надзвычайных сітцацыях з 17 кастрычніка да 2 лістапада праводзіць рэспубліканскую пажарна-прафілактычную акцыю па папярэджанні пажараў і гібелі людзей ад іх у жыллёвым фондзе ў асенне-зімовы перыяд «За бяспеку разам». Ратавальнікі і іншыя зацікаўленыя асобы абследуюць супрацьпажарны стан домаўладанняў адзінокіх пажылых грамадзян, пенсіянераў, якія жывуць адны, інвалідаў, сем'яў, дзе дзеці знаходзяцца ў сацыяльна небяспечным становішчы. Праводзяць з грамадзянамі тлумачальную работу па выкананні правілаў пажарнай бяспекі, інфармуюць насельніцтва аб магчымасцях дзяржаўных арганізацый па паслугах бяспекі.
Мерапрыемствы, якія праводзяцца, у першую чаргу, прызначаны найбольш уразлівым катэгорыям грамадзян, якія ў сілу свайго ўзросту і матэрыяльнага становішча не могуць прадугледзець магчымыя рызыкі. Аднак падрыхтавацца да асенне-зімовага перыяду з пункту гледжання бяспекі варта кожнаму чалавеку. Як мінімум — праверыць на спраўнасць аўтаномныя пажарныя апавяшчальнікі. Калі ж такія адсутнічаюць, іх неабходна ўстанавіць, прычым у кожным жылым пакоі, — такая нязначная, на першы погляд, рэч выратавала жыццё ні аднаму чалавеку.
— З мэтай павышэння ўзроўню бяспекі, а таксама ўлічваючы высокую эфектыўнасць аўтаномных пажарных апавяшчальнікаў (АПА), неабходна ўстанавіць у кожны жылы пакой гэты найпрасцейшы і даступны сродак супрацьпажарнай абароны, — рэкамендуе Яўген Бараноўскі. — У 2021 годзе ў краіне зарэгістравана 88 фактаў спрацоўкі АПА, дзякуючы чаму пажары былі выяўлены і ліквідаваны на пачатковай стадыі. У выніку было выратавана 97 чалавек, у тым ліку 26 дзяцей. За дзевяць месяцаў гэтага года дзякуючы аўтаномным пажарным апавяшчальнікам другое жыццё атрымалі 48 чалавек, з іх — 13 дзяцей.
У гэты перыяд важна пракантраляваць і спраўнасць ацяпляльнага абсталявання, электрычнай праводкі. Асабліва ўважліва да пытання бяспекі варта падысці тым, хто ў якасці абагрэву выкарыстоўвае пячное ацяпленне. Няспраўная печ, няправільная яе эксплуатацыя — прычыны многіх пажараў з трагічным фіналам. Асабліва гэта датычыцца ўладальнікаў прыватных жылых дамоў — варта набыць і размясціць у сябе ў домаўладанні вогнетушыцель.
У МНС рэкамендуюць наведаць родных і блізкіх, якія жывуць у сельскай мясцовасці, дапамагчы ім падрыхтавацца да ацяпляльнага сезона. Калі ж яны гэта ўжо зрабілі, не будзе лішнім пракантраляваць, наколькі якасна печ падрыхтавана да зімы. У адпаведнасці з беларускім заканадаўствам, адказнасць за выкананне патрабаванняў пажарнай бяспекі ў жылых дамах, якія належаць грамадзянам на правах прыватнай уласнасці, ускладзена на іх уласнікаў.
Каб прадухіліць дзіцячае свавольства з агнём:
Вераніка КАНЮТА
Фота Мінскага абласнога ўпраўлення МНС
У сталіцы адкрылася ХХХ Мінская міжнародная кніжная выстаўка-кірмаш.
«Мы плануем навучыць аднаўленчым медыятыўным практыкам 20 чалавек з розных устаноў».
«Важны момант, што яўныя сімптомы аўтызму ёсць, але бацькі не жадаюць заўважаць іх».
Ужо традыцыя з нагоды Дня роднай мовы прапаноўваць чытачам праверыць свае веды.
