Фільм пра бразільскага кампазітара Дарывала Каімі паказалі ў Мінску

Дакументальны фільм пра вядомага бразільскага кампазітара, выканаўцу сваіх песен Дарывала Каімі паказалі на «Беларусфільме».

На паказ кіналенты «На памяць усім — Дарывал Каімі» аматараў лацінаамерыканскай музыкі запрасіла Пасольства Федаратыўнай Рэспублікі Бразіліі ў Рэспубліке Беларусь. Кампазітар Дарывал Каімі вядомы ў нас, дзякуючы сваім цудоўным мелодыям, гучанне якіх упрыгожыла культавы фільм мінулага стагоддзя «Генералы песчаных кар’ераў», тэлевізійны серыял «Рабыня Ізаўра». 

Стваральнік песеннай бразільскай музыкі мае фантастычную папулярнасць у сваёй краіне і за яе межамі. Пяцьдзесят гадоў свайго жыцця ён прысвяціў стварэнню песень і выкананню іх пад уласную гітару, а таксама пры суправаджэнні груп і аркестраў. Ён зрабіў уплыў на фарміраванне многіх вядомых музыкантаў наступнага пакалення, пакінуўшы ў спадчыну больш ста кампазіцый жанра яскравага самба і боса-новы.

Цікава дазнацца, што напісаная ім песня, якая гучыць у вядомым гледачам з 70-х гадоў мінулага стагоддзя фільме «Генералы пясчаных кар’ераў» не мае ні воднага радка, які супадаў бы з аўтарскім арыгіналам. На самой справе Дарывал Каімі напісаў тэкст сваёй песні пра простых мясцовых рыбакоў, чыі лодкі штораніцу пакідалі родны бераг, а самі рыбакі заўжды верылі ў шчаслівае вяртанне.

Перад пачаткам сеанса выступіў Надзвычайны і Паўнамоцны Пасол Федэратыўнай Рэспублікі Бразілія ў Рэспубліке Беларусь Бернард Жорг Леапольд дэ Гарсіа Клінгл, які расказаў гледачам пра свайго вядомага кампазітара-суайчынніка і шчыра падзякаваў за магчымасць паказаць гэты фільм у Беларусі. У зале прысутнічалі студэнты, выкладчыкі музыкі, аматары бардаўскай песні, грамадскія і палітычныя дзеячы.

Маляўнічыя лацінаамерыканскія краявіды, прыгажосць акіянскіх прастораў, шчыры і аптымістычны характар мясцовых жыхароў — пра што ствараў свае песні Дарывал Каімі — сталі тэмай невялікай выставы бразільскіх фотамайстроў, якую маглі ўбачыць прысутныя на паказе. 

Яўген ПЯСЕЦКІ

Фота аўтара