Быццам бы на вуліцы досыць цёпла, а зіма пакуль «за гарамі», але гуру моднай індустрыі заўсёды на крок наперадзе падзей. Трэнды хуткай зімы яны прадставілі грамадскасці яшчэ летам, зараз калекцыі ўжо адшытыя, трэнды растыражаваныя — ад буцікаў да масмаркета — і прыйшла пара прымяраць іх на сябе. Дык давайце высветлім, якія модныя тэндэнцыі прынясе з сабой гэтая зіма і наколькі яны сёння даступныя беларускаму спажыўцу.
Галоўны набытак да халоднага сезона, зразумела, — верхняя вопратка, адначасова і стыльная, і цёплая. Зіма — гэта, вядома ж, футравыя рэчы: тут новы халодны сезон цалкам кансерватыўны. Але жывёлы зноў у бяспецы — экафутра не здае сваіх пазіцый, а натуральнае — па-ранейшаму не на піку актуальнасці. Галоўнае правіла — сучаснае экафутра не павінна быць «родам» з вашага дзяцінства або імітаваць котку пасля дажджу. Яно наогул не створана, каб імітаваць нейкага звера — не павінна стварацца ўражання, што вам проста не хапіла грошай на «шанхайскага барса», і вы замянілі яго бюджэтным аналагам. Штучнае футра — гэта самадастатковы модны матэрыял, так ён і павінен выглядаць. На подыумах былі прадстаўлены і яркія, акцэнтныя мадэлі з каляровага футра, і футрачкі і паліто ў стрыманай, натуральнай гаме — але ўсё роўна штучнае павінна заставацца такім, а не «падробкай пад натуральнае». Гэта важна ўлічваць, выбіраючы абноўку.
Футравыя аксесуары — тое, што прыўнясе гэтая зіма ў наш гардэроб. Абутак, сумкі, галаўныя ўборы са штучным футрам — усё гэта можна ўбачыць у калекцыях Bottega Veneta, Versace і Guccі. Асабліва цікавыя мініяцюрныя футравыя сумачкі і бацільёны з футравым аздабленнем — не надта практычна, але вельмі прыгожа!
— Калі казаць пра кажушкі і паліто з экафутра, то тут, безумоўна, нельга не ўспомніць пра дызайнера Вольгу Люціч, — распавядае стыліст Ірына Грыцук. — Экафутра — адзін з яе любімых матэрыялаў, і калекцыі з яго яна стварае ўжо не першы халодны сезон. Некаторыя беларускія модніцы іх даўно ацанілі. У новай калекцыі (брэнд так і называецца — Вольга Люціч: @brand_olga_lyutіch) можна знайсці вельмі актуальныя мадэлі для дзяцей і падлеткаў на рост да 160 см. Калі мама невысокая, яна цалкам можа падабраць што-небудзь і для сябе.
Але важна памятаць, што ў кажушку са штучнага футра будзе цёпла і ўтульна толькі да 10—15 градусаў марозу, кажа Ірына. Так што, улічваючы непастаянны і непрадказальны характар беларускай зімы, у зімовым гардэробе не абысціся без пухавіка. Зразумела, прашыванага. Хоць у дачыненні да пухавікоў мода гэтай зімой неверагодна дэмакратычная. Актуальныя мадэлі пухавікоў 2022—2023 года — гэта самыя розныя варыянты крою, ад класічнага прамога фасону да асіметрычных формаў. Даўжыня трэндавага пухавіка таксама любая. Згаджаецца мода гэтай зімой і на мідзі, і на максі, актуальныя і кароткая, і зусім скарочаная даўжыня пухавіка. Аб'ядноўвае ўсе гэтыя варыянты дызайн у аверсайз-стылі, дзякуючы чаму вобразы атрымліваюцца нядбайнымі і разняволенымі, а жаноцкасці дадае колеравая гама — у трэндзе далікатныя адценні. Хоць і карычневая гама не здае пазіцый.
— Трэнд на прашыванае аздабленне дадае вобразу эстэтыкі, уносіць нотку класікі ў расслаблены аверсайз-вобраз і робіць яго больш гарманічным, — адзначае стыліст.
Актуальныя дызайнерскія пухавікі яна раіць шукаць у той жа Вольгі Люціч (у яе калекцыі таксама ёсць модныя гэтай восенню «пуховыя» камізэлькі: яны не страцяць актуальнасці і зімой, калі насіць іх «ніжнім пластом»). А калі казаць аб масавым вытворцы, то гэта, вядома, апошнія калекцыі «ELEMA» і «Panda».
— На гэтую зіму ў беларускіх дызайнераў ёсць цікавыя мадэлі — напрыклад, пухавікі з каўняром-шалікам, якія дазваляюць атрымаць актуальны «надзіманы» каўнер.
Прашываныя рэчы цяпер на грэбні моднай хвалі, і гэта не толькі пухавікі: у трэндзе прашываныя сумкі, абутак і галаўныя ўборы ў тым жа стылі, распавяла Ірына.
Паколькі беларуская зіма пераменлівая і можа быць як вельмі халоднай, так і нечакана папесціць цяплом, раскажам таксама аб куртках-кашулях. Яны перавандруюць у зімовую моду з восені і стануць «знаходкай» для адліг, але наогул, кажа Ірына, гэты трэнд ужо сыходзіць.
— Такія курткі былі на піку ў мінулых сезонах, хоць і сёння яшчэ актуальныя. Упішуцца яны не ў любы гардэроб — падыдуць у першую чаргу творчым людзям. У іх гардэробе (з пэўным чынам падабранымі рэчамі ў стылях кэжуал і боха) гэтая досыць яркая і самабытная рэч можа стаць асновай многіх вобразаў.
Сакрэт, якога не ведаюць жыхары цёплых краін і які добра вядомы тым, хто пражывае ў нашым клімаце: самае цёплае футра не сагрэе, калі надзець яго на майку. На шчасце, шматслойнасць па-ранейшаму актуальная. Халады даюць прастору для стыльных эксперыментаў — магчымасць мяняць месцамі пласты і ствараць крэатыўныя камбінацыі. Гэты момант — патэнцыйную камбінатыўнасць той ці іншай рэчы — варта ўлічваць, адпраўляючыся на шопінг.
Але, дарэчы, якія айчынныя калекцыі заслугоўваюць увагі?
— Актуальныя рэчы, асабліва для моладзі і падлеткаў (а таксама для тых, хто малады душой) можна знайсці ў новых калекцыях «Калінкі», «Купалінкі» і «Світанка», — распавядае стыліст. — Гэтыя брэнды мамы школьнікаў і студэнтаў ацанілі ўжо даўно: іх фішка — вельмі нядрэнныя калекцыі дзелавога адзення.
Вяртаючыся да тэмы моднай зімы, таксама абавязкова трэба сказаць пра брэнд «НашаМода», адзначыла Ірына.
— Гэты брэнд на рынку ўжо больш за 12 гадоў. Ён аб'яднаў таленавітых вытворцаў беларускага трыкатажу. У інтэрнэт-краме брэнда падбяруць што-небудзь нават самыя капрызныя.
Але пагаворым аб трэндах у цэлым.
— І гэта, у прыватнасці, прынт «гусіная лапка». Гэты прынт заяўляе пра сябе кожны халодны сезон, але наступнай зімой ён — на піку. Яго дадаюць ўсюды — нават на кішэні і каўняры пухавікоў-оверсайз. І гэта, на мой погляд, некаторы перабор. Словам, у дачыненні да гэтага прынта (як і любога іншага трэнду) мая парада — суадносіць модныя тэндэнцыі са здаровым сэнсам і добрым густам.
Аверсайз, як ужо было сказана, нікуды не сышоў, ён па-ранейшаму з намі. Але ў гэтым сезоне ён набыў новыя рысы.
— Шырокі верх + шырокі ніз — болей не актуальнае спалучэнне, яно засталося ў мінулых сезонах. Цяпер аверсайз спалучаем з рэчамі па памеры. Прынцып просты: калі выбіраеце шырокі верх, хай ніз будзе вузкі. І наадварот: трэндавыя шырокія джынсы спалучаем з верхам па памеры, — раіць Ірына.
Заўважым, што ў гэтым халодным сезоне крэатыўныя дырэктары модных дамоў рэкамендуюць насіць максімальна шырокія джынсы з высокай пасадкай — натхняемся калекцыямі Balmaіn, Gіvenchy і Acne Studіos.
— Калі вельмі хочацца надзець шырокі верх пад такі вось шырокі ніз — хай гэта будзе кашуля, пінжак ці талстоўка на маланцы, надзетыя на топ або бодзі і расшпіленыя. У крайнім выпадку, калі верхняя рэч шырокая і без зашпількі, варта хоць бы заправіць яе краёчак у шырокія штаны ці спадніцу, каб пазначыць талію і зрабіць вобраз больш сабраным і стройным.
Дарэчы, пра талію. Яна па-ранейшаму пераважна высокая, што б там модныя аналітыкі не пісалі пра джынсы і штаны з нізкай пасадкай. Сакрэт просты: нізкая талія падыходзіць толькі ідэальным постацям «нябесных істот» — мадэляў, большасць жа з нас — проста людзі, са сваімі схільнасцямі да смачнай і не заўсёды здаровай ежы. А высокая пасадка спадніц і джынсаў дазваляе больш надзейна схаваць наступствы любові да шакаладу і пірожных. Але ўсім, хто настальгіруе па 2000-х, таксама не варта засмучацца: мода прапануе міні, нягледзячы на халодны сезон. Гламурная эпоха «нулявых» вярнулася на подыумы міні-спадніцамі з дэніму, скуры, тонкага трыкатажу, воўны. Насіць іх рэкамендуецца з чым заўгодна — світарамі і кроп-світарамі, кашулямі, пінжакамі і гэтак далей. А таксама з акцэнтнымі калготкамі: іх гэтай зімой раяць падбіраць не толькі ў тон асноўнаму вобразу, але і кантраснага колеру, спалучаючы з міні-спадніцамі, сукенкамі і шортамі (па прыкладзе Chanel). Але і з міні, і з каляровымі калготкамі ўсё якраз складана — гэта свайго роду «лакмусавая паперка» вашага бездакорнага густу, і калі вы ў ім не зусім упэўнены, лепш не рызыкаваць.
— Тут таксама можна згадаць актуальны трэнд на грубую вязку шкарпэтак і гетраў, — адзначае Ірына. — Даводзілася бачыць, як нашы модніцы, не разабраўшыся ў нюансах, надзяваюць шкарпэткі звычайнай фабрычнай вязкі, падцягваюць іх як мага вышэй, а абутак выбіраюць любы, нават бацільёны. Здавалася б, якая розніца? Але калі гаворка ідзе пра такія складаныя і спрэчныя трэнды, важна ўлічыць усё: і вязку шкарпэтак або гетраў, і фасон абутку. Тое ж самае з міні-спадніцай (тым больш калі вам ужо не 18 гадоў). Асабліва — з міні ў спалучэнні з яркімі калготкамі. Выбіраючы такі вобраз, важна максімальна дакладна прадумаць яго цэласнасць: ад каляровай гамы да фасону сумкі і вашага макіяжу. І самае галоўнае — улічыць нюансы фігуры. Таму што няправільна падабраны look з разраду «ўльтрамодных» здольны сапсаваць знешнасць самай прыгожай дзяўчыны.
— Што датычыцца галаўных убораў, адзін з асноўных трэндаў надыходзячай зімы — берэты, прычым не бесказыркі, а берэты з казырком.
А калі казаць пра сумачкі, то, у прынцыпе, яны могуць быць самымі рознымі, але на піку папулярнасці — «памеру XXL», у першую чаргу шоперы.
— Не ўсе стылісты ў захапленні ад шопераў — многія кажуць пра іх «бабуліна авоська», — тлумачыць Ірына. — Але мне здаецца, шопер — гэта зручна, практычна і прыгожа. І такую сумку можна ўпісаць амаль у любы вобраз.
Абутак на зіму 2022—2023 — тэма для асобнай гутаркі са стылістам. Скажам толькі, што сярод фаварытаў абутковых трэндаў — па-ранейшаму трактарная падэшва, грубыя чаравікі, бацільёны на платформе, нізкі ход або тоўсты ўстойлівы абцас.
— Калі, абнаўляючы зімовы гардэроб, вы задумаліся аб новай пары актуальнага абутку, можна звярнуцца да трэнду «Нашы боты». Ён прапануе шырокі асартымент жаночага (а таксама мужчынскага) абутку, і ў апошніх калекцыях можна знайсці цікавыя мадэлі. У цэлым, на нашым модным рынку ёсць годныя вытворцы і брэнды. І на іх варта звярнуць увагу.
Аляксандра АНЦЭЛЕВІЧ
«Залатая падаплёка крылаў... »
АВЕН. На гэтым тыдні магчымыя даволі няпростыя сітуацыі.
Разбіраемся разам з урачом па медыцынскай прафілактыцы.
