Сенатар Алена Зяблікава наведала гандлёвы пункт «Веста-Барысаў»

У Барысаўскім раёне працягваецца маніторынг цэн. Днямі член Савета Рэспублікі Алена Зяблікава разам з прадстаўнікамі Мінскага абласнога аб'яднання прафсаюзаў наведала гандлёвы дом адкрытага акцыянернага таварыства «Веста-Барысаў». У дадзенае аб'яднанне ўваходзіць звыш сарака гандлёвых аб'ектаў, якія знаходзяцца ў крокавай даступнасці і карыстаюцца папулярнасцю ў жыхароў горада. Сапраўды, сюды можна заскочыць па дарозе з работы і набыць неабходныя прадукты, паколькі тут заўсёды шырокі выбар прадукцыі — як харчовай, так і прамысловай.

«Кантралёры» звярталі ўвагу не толькі на асартымент, але і звяралі цэннікі на тавары з коштам, які выбіваецца па штрых-кодзе. Калі цэннік быў устаноўлены пасля 5 кастрычніка, даныя звяралі з накладнымі.

Камісія наведала практычна ўсе прадуктовыя секцыі, пагутарыла з пакупнікамі. Так, Алена Зяблікава пацікавілася ў адной з пакупніц думкамі наконт асартыменту малочных прадуктаў.

— Мне падабаецца прадукцыя пад нашай барысаўскай гандлёвай маркай, выбар «малочкі» дастатковы, не прыкмеціла, што цэны павысіліся. Мне здаецца, яны засталіся ранейшымі, — такі быў адказ.

Іншая жанчына заклапочаная, што раней было малако малой тлустасці. А цяпер прапаноўваюць 3,2, 3,4, 3,6-працэнтнай тлустасці. У той жа час асартымент стаў больш разнастайны. Кожны можа выбраць малако па сваім кашальку.

— Вы заўважаеце, што з 5 кастрычніка цэны не павышаюцца. Яны павінны быць замарожаны, каб у далейшым выпрацаваць цанавую палітыку, — канстатавала сенатар.

— Сапраўды так. Не бачу, каб яны рушылі ўверх. Я практычна кожны дзень хаджу ў «Весту» і бачу гэта на свае вочы. Акрамя таго, тут вельмі ўважлівы персанал. Заўсёды параяць, што выбраць. Падабаецца і тое, як выкладзены тавары — прыгожа, акуратна.

Шырока прадстаўлена і лінейка барысаўскай прадукцыі — мукі, хлебабулачных, мясных вырабаў. Стаіць задача, каб паліцы магазінаў напаўняліся прадукцыяй буйных мясцовых прадпрыемстваў. Гэта будзе ўплываць на цэны, бо ў цэнаўтварэнні не апошняе месца займае лагістыка.

— У «Весце» добрая раскладка тавараў, вырабы айчыннай вытворчасці займаюць самыя прыметныя месцы. Мы за гэтым сочым, — дадала Алена Алегаўна. — Радуе і тое, што ў крамах згаданай сеткі не назіраецца пратэрмінаванай прадукцыі.

Помніцца, яшчэ нядаўна пакупнікі змяталі з паліц цукар. У «Весце» гэты салодкі прадукт прадстаўлены рознымі прадпрыемствамі, ёсць рафінад, трысняговы цукар. На паліцах шмат і солі, якую не так даўно куплялі мяшкамі. Соль рознай цанавой катэгорыі, самая танная — па 28 капеек за ўпакоўку.

На паліцах — шырокі асартымент круп, у тым ліку рысу, грэчкі ад розных вытворцаў. Людзі спакойна падыходзяць, бяруць па кілаграму, ажыятажу няма.

— Радуе, што беларускія вытворцы сталі рабіць добрую расфасоўку. Мне, як спажыўцу, падабаецца, што сталі выпускаць разнастайныя крупяныя шматкі — аўсяныя, грачаныя, кукурузныя для правільнага і рацыянальнага харчавання занятых людзей, — дзеліцца сенатар.

Алей таксама на розны густ і кашалёк, у тым ліку і айчынны, рапсавы. Апошні, дарэчы, вельмі карысны для спажывання.

Карыстаецца попытам і дзіцячае харчаванне. Маці разумеюць, што вытворца робіць прадукт высокай якасці. Вядома, што ў некаторых малых алергія, а ў Беларусі самая пільная ўвага да гэтага віду харчавання, высокія стандарты. Таму бацькі ахвотна бяруць кашы, фруктовыя, мясныя кансервы, сокі. І цана на іх даволі прымальная. Дзеці — наша будучыня, на іх нельга нажывацца.

Яшчэ нядаўна кошт курыных яек набліжаўся да 4 рублёў за дзясятак. Цяпер гэты каштоўны прадукт стаў у раёне 3 рублёў. Няма дэфіцыту і з курыным мясам — цэлыя тушкі, кумпяк, крылы, грудзінка, філе.

У кулінарыі можна набыць паўфабрыкаты — галубцы, катлеты, адбіўныя, піханую пальцам каўбасу, шашлыкі, мяса ў марынадзе ўласнай вытворчасці. Вельмі зручна для гаспадынь — не трэба стаяць пасля рабочага дня за плітой. Кінула на патэльню далікатэс — і хутка вячэра гатовая.

Загадчыца харчовага комплексу гандлёвага дома ААТ «Веста-Барысаў» Святлана Мароз расказала, што гандлёвы аб'ект працуе з беларускімі пастаўшчыкамі, тавар паступае без перабояў.

Дадам, што праводзіцца таксама і маніторынг прамысловых тавараў, мыйных сродкаў, лекаў у аптэчнай сетцы, паслуг медыцынскіх устаноў — МРТ, КТ, УГД.

— Спажыўцы павінны разумець, што цэны пад строгім кантролем. Гэта яшчэ раз даказвае, што наша дзяржава клапоціцца пра чалавека, у нас няма месца карупцыйным схемам, усё адкрыта, празрыста для людзей з захаваннем айчыннага заканадаўства. У нас сфарміравана таксама група з 13 чалавек прафсаюзных актывістаў. Гэта людзі розных прафесій, узростаў. Штодзень яны наведваюць па два магазіны, адсочваюць цэны. Вынікі маніторынгу акумулююцца ў райвыканкаме, аддзеле гандлю, — падкрэсліла Алена Зяблікава.

— Мы маніторым аб'екты ў кожным рэгіёне Мінскай вобласці, нашы прадстаўнікі ўваходзяць у рабочыя групы, якія створаны ў кожным раёне, падключаны да работы прафсаюзны актыў. Праманіторана больш як паўтары тысячы гандлёвых аб'ектаў, — падкрэсліў намеснік старшыні Мінскага абласнога аб'яднання прафсаюзаў Дзмітрый Бачкоў. — У гэтай справе ўзаемадзейнічаем з райвыканкамамі, Камітэтам дзяржкантролю.

— Дзмітрый Уладзіміравіч, а ці шмат парушэнняў выяўляеце? — пацікавілася ў свайго суразмоўніка.

— Сістэмных парушэнняў няма. Яны адзінкавыя, не ўплываюць на агульную сістэму. Калі выяўляюцца такія выпадкі, то ім даецца ацэнка, ставіцца задача па выпраўленні становішча. Наша мэта — справядлівасць, паказаць вытворцу, як фарміруецца цана, каб ён разумеў, як узаемадзейнічаць з гандлёвымі сеткамі і наадварот.

Таццяна ЛАЗОЎСКАЯ