Што робіцца ў Беларусі для папулярызацыі ўнутранага турызму? Сёння, як сцвярджаюць прадстаўнікі турыстычнай справы, якраз гэты кірунак выклікае найбольшую цікавасць. І менавіта на яго накіраваны шэраг сацыяльных праектаў, якія рэалізоўваюцца ў Беларусі. Адзін з такіх — рэспубліканскі конкурс сацыяльнай рэкламы «#Пазнай Беларусь», які праходзіў у маі — верасні гэтага года. Любы ахвотны мог даслаць на адрас журы сваю работу ў трох намінацыях: «Слоган», «Плакат», «Відэаролік», прысвечаныя любому кутку Беларусі. Што з гэтага атрымалася, расказалі прадстаўнікі аргкамітэта конкурсу.
Бясспрэчна, што інфармацыйнае прасоўванне з'яўляецца адным з галоўных складнікаў у турызме. І найлепшыя работы конкурсу па сацыяльнай рэкламе якраз будуць выкарыстоўвацца для папулярызацыі маршрутаў па Беларусі.
— Нядаўна мы зацвердзілі новыя ролікі па розных відах турызму для дэманстрацыі і прасоўвання як унутры краіны, так і за мяжой. Але добра мець не толькі прафесійныя працы, якія мы выкарыстоўваем на канферэнцыях і сімпозіумах. Для нас важна, каб у стварэнні прынялі ўдзел беларусы — як прафесіяналы, так і непрафесіяналы. Нас парадавала, што ў конкурсе прыняла ўдзел вялікая колькасць дзяцей з розных навучальных устаноў, — адзначыла дырэктар Дэпартамента па турызме Міністэрства спорту і турызму Ірына ВАРАНОВІЧ.
Лічба ўдзельнікаў конкурсу сацыяльнай рэкламы таксама ўнушальная — пададзена больш за 500 заявак. Дарэчы, столькі ж удзельнікаў і ў рэспубліканскай акцыі «Вандруй. Адчуй. Натхняйся». У конкурсах былі прадстаўлены ўсе рэгіёны Беларусі.
— І, як і летась, больш за ўсё заявак паступіла з Гродзенскай вобласці, другое месца займае Гомельшчына. Актыўнасць жыхароў гэтых рэгіёнаў вельмі высокая, — падкрэсліла Ірына Варановіч. — Ад іншых абласцей хацелася б такой жа актыўнасці. Магчыма, хтосьці яшчэ прыглядаецца да нашага конкурсу і прыме ўдзел на наступны год. Уразіла разнастайнасць падачы, асабліва ў дзяцей. Яны знаходзяць такія формы, якія здзіўляюць нават дарослых. Напрыклад, мы бачым у 9-гадовым хлопчыку ўсе задаткі прафесійнага экскурсавода.
Большасць слоганаў удзельнікі стварылі на беларускай мове. Сярод відэматэрыялаў палова таксама была на роднай мове.
— Работы пераможцаў мы мяркуем выкарыстоўваць: размесцім плакаты, прычым не толькі ў Мінску, але і ў іншых гарадах, бузем трансліраваць відэаролікі — гэта важна для заахвочвання турыстаў падарожнічаць па сваёй краіне, — дадала Ірына Варановіч.
Акрамя таго, работы-пераможцы будуць размешчаны на сайце Нацыянальнага агенцтва па турызме і яго YouTube-канале, а таксама ў якасці сацыяльнай рэкламы на нацыянальным тэлебачанні. А некаторыя конкурсныя заяўкі стануць асновай для стварэння новых турыстычных маршрутаў.
Як адзначыў дырэктар Нацыянальнага агенцтва па турызме Дзмітрый Марозаў, журы конкурсу было складана выбіраць паміж работамі дзяцей і прафесіяналаў з музейных устаноў ці прамысловых прадпрыемстваў. Пры гэтым адна справа — расказаць пра Мірскі ці Нясвіжкі замкі, Косаўскі палац, і зусім іншая — стварыць паўнавартасную работу пра невялічкі населены пункт, дзе не так шмат гісторыка-культурнай спадчыны.
Шэраг работ было ўдастоена спецыяльных прызоў, бо яны прысвечаны тэматыцы Года гістарычнай памяці.
— Такія работы і тэмы мы выкарыстаем на інфармацыйных шчытах, якія размяшчаюцца ў якасці сацыяльнай рэкламы для раскрыцця турыстычнага патэнцыялу таго ці іншага раёна горада. У Мінску існуе некалькі зацверджаных Нацыянальным агенцтвам па турызме маршрутаў: па тэрыторыі Мінскага гета, лагераў «Трасцянец» і «Масюкоўшчына». Было б нядрэнна адлюстраваць на сацыяльных плакатах па гэтых маршрутах і іншыя мясціны.
Намеснік начальніка ўпраўлення электронных СМІ і інтэрнэт-рэсурсаў Міністэрства інфармацыі Галіна Гусакова звярнула ўвагу, што цяпер існуе вялікі попыт на інфармацыю па ўнутраным турызме.
— Перад выхаднымі назіраецца цікавасць да варыянтаў адпачынку, каб далёка не ехаць і паболей убачыць, асабліва летам і ў добрае надвор'е. Што датычыцца СМІ, ва ўсіх дзяржаўных маюцца адпаведныя раздзелы ці тэматычныя старонкі, прысвечаныя тэмам турызму. Спецыялізаваныя інтэрнэт-рэсурсы імкнуцца ахапіць усё больш і больш, але адчуваецца недахоп інфармацыі ў адносінах да малавядомых куткоў нашай краіны, — расказала Галіна Гусакова.
Адным з актуальных накірункаў турызму з'яўляецца гастранамічны. Пра яго развіццё ў нашай краіне расказаў начальнік упраўлення міжнароднага супрацоўніцтва і прымянення мер нетарыфнага рэгулявання Міністэрства антыманапольнага рэгулявання і гандлю Яўген Бялоў.
Асноўнай мэтай гастранамічнага турызму з'яўляецца знаёмства з той ці іншай краінай праз нацыянальную кухню. У Беларусі праводзіцца шэраг мерапрыемстваў, накіраваных на развіццё і папулярызацыю беларускай нацыянальнай кухні, развіццё зон гастратурызму, фарміраванне турыстычных маршрутаў з гастранамічным складнікам, а таксама прасоўванне гастранамічнага патэнцыялу Беларусі, у тым ліку і праз удзел у міжнародных турыстычных выставах.
У краіне працуе 446 аб'ектаў гастратурызму, з іх 73 спецыялізуецца на страваў беларускай кухні. Сярод папулярных мерапрыемстваў, накіраваных на папулярызацыю гастранамічнага турызму, — «Мотальскія прысмакі» ў Іванаўскім раёне, «Бульба-фэст» у Віцебску, «Браслаўскія зарніцы», «Юраўскі карагод».
— Расце колькасць турыстычных маршрутаў з гастранамічным складнікам, цяпер іх 75, у тым ліку тры распрацавана леатсь. Ідзе работа па правядзенні дзён беларускай культуры, майстар-класаў па прыгатаванні беларускіх страў, развіцці рэстаранаў і сетак грамадскага харчавання з нацыянальным каларытам, такія як «Васількі», «Гараж», «Літвіны», — адзначыў Яўген Бялоў.
Распрацоўваюцца і рэгіянальныя мабільныя дадаткі. Пакуль іх чатыры: «Мой горад» у Оршы і Полацку, «Гродна-гід», «М-6», які дзейнічае на аднайменнай аўтадарозе. Хутка з'явяцца два новыя: «Гомель-трэвэл» для Гомельскай вобласці і «Гродна-Р» — для Гродзенскай.
Алена КРАВЕЦ
Мерапрыемства праводзілася на добраахвотнай аснове.
Не выявіць ні секунды абыякавасці.