Стужка Пятра Тадароўскага атрымала «Золата Лістапада»

Па традыцыі ў кінатэатры «Масква» прайшла цырымонія закрыцця XXVIII Мінскага міжнароднага фестываля «Лістапад». Ганаровымі гасцямі мерапрыемства, якое адбылося 11 кастрычніка, сталі ўдзельнікі форуму, культурныя дзеячы і аматары кінамастацтва. Акрамя імёнаў пераможцаў фестываля ў розных намінацыях, раскрылася галоўная інтрыга ўсяго «Лістападнага» тыдня — абвясцілі ўладальніка гран-пры.

Падчас цырымоніі намеснік прэм’ер-міністра Ігар Петрышэнка адзначыў, што конкурс дэманстраваў сапраўдныя каштоўнасці кінематаграфіі:

— Тыдзень «Лістапада» дэманстраваў Беларусі і краінам, якія прыехалі і прадставілі свае работы ў сферы кінамастацтва, сапраўдныя каштоўнасці кінематаграфіі. Асаблівыя словы ўдзячнасці хачу выказаць нашым сябрам, якія прыехалі з суседніх краін, найперш з Расіі. Яны бралі ўдзел ва ўсіх конкурсных намінацыях. Дзякуй аўдыторыі гледачоў за тое, што яны шчыра, з усёй увагай ацэньвалі ўсе кінатворы, якія дэманстраваліся на фестывалі. Я са шкадаваннем кажу: «Да пабачэння, кінафестываль-XXVIII, і мы чакаем усіх на XXIX-м міжнародным „Лістападзе“ ў наступным годзе», — падсумаваў Ігар Петрышэнка.

Адразу некалькі ганаровых узнагарод атрымаў фільм «Здаровы чалавек» расійскага рэжысёра Пятра Тадароўскага. Стужцы прысудзілі спецыяльны прыз Прэзідэнта Рэспублікі Беларусь «За гуманізм і духоўнасць у кіно». Прадстаўнік фільма Ганна Леонцьева, атрымліваючы на сцэне ўзнагароду, падзякавала Прэзідэнту краіны за ацэнку творчай работы. Аўтар сцэнарыя і рэжысёр фільма Пётр Тадароўскі-малодшы даслаў відэазварот, у якім падзякаваў за такую высокую ўзнагароду. Фільм «Здаровы чалавек» удзельнічаў у асноўным конкурсе ігравога кіно «Лістапада». Прэм’ера фільма падчас кінафестывалю адбылася 5 лістапада. Галоўныя ролі ў карціне выканалі Мікіта Яфрэмаў, Ірына Старшэнбаўм, Яўген Ткачук.

Менавіта стужка Пятра Тадароўскага перамагла ў конкурсе — «Здаровы чалавек» атрымаў гран-пры «Золата Лістапада»:

— Самае галоўнае, што фільм знайшоў водгук у гледачоў. Падчас яго паказу на кінафестывалі ў Мінску нехта плакаў, нехта смяяўся, а значыць, карціна не пакінула людзей абыякавымі, — адзначыла прадстаўнік фільма. Узгагародамі і дыпломамі была адзначана вялікая колькасць стужак, прадэманстраваных падчас конкурснага тыдня. Так, прыз за лепшую жаночую ролю атрымала Святлана Чуйкіна, якая выканала галоўную ролю ў фільме «Плакаць нельга». Прызам за лепшую мужчынскую ролю ўдастоілі Алега Чугунова за работу ў карціне «Здаровы чалавек».

Прыз глядацкіх сімпатый за лепшы ігравы фільм атрымала кітайская стужка «Сястра» рэжысёра Жасінь Інь.

Гран-пры за лепшы дакументальны фільм удастоілі работу «Агонь» расійскага рэжысёра Ганны Янкоўскай.

Лепшым фільмам конкурса анімацыйных фільмаў стала стужка Адама Сійяра, Габрыэль Сельнэ і Хлоі Фар «Бывай, Жэром!», Францыя. А лепшым анімацыйным фільмам для дзяцей стала работа рэжысёра Уры Лотана «Чорная горка», Ізраіль-Велікабрытанія.

Прызам за лепшы фільм конкурса імя кінарэжысёра Віктара Турава ўзнагародзілі фільм Арсенія Кайдацкага і Юліі Сергінай «Уральскае дэрбі». Таксама падчас цырымоніі закрыцця было ўручана некалькі спецыяльных прызоў. Так, айчынная стужка «Класікі і шахматы» Наталлі Касцючэнкі атрымала спецыяльны прыз Мінскага гарадскога выканаўчага камітэта за ўвасабленне духоўнасці ў мастацтве.

Спецыяльны прыз СНД «Кіно без межаў» за развіццё культурнага супрацоўніцтва і ўмацаванне сяброўства паміж народамі ўручаны творчаму калектыву ігравога кыргызскага фільма «Шамбала», рэжысёр Артыкпай Суюндукаў.

Прызам прадстаўніцтва Міждзяржаўнай тэлерадыёкампаніі «МІР» у Беларусі «Мова кіно — мова дружбы» ўзнагароджаны фільм Акрама Шахназарава «101-рэйс», Узбекістан.

Спецыяльны прыз журы за лепшы фільм фестываля прысудзілі сербскай стужцы «Прэбілаўцы — там нават у камянёў ёсць шнары», рэжысёр Саня Драгічэвіч Бабіч.

Фінальным акордам цырымоніі закрыцця XXVIII «Лістапада» стала выступленне ансамбля «Песняры»: выканаўцы падарылі гасцям песню «Золата „Лістапада“», якая была напісана спецыяльна для фестываля.

Арына КАРПОВІЧ

Фота Лізаветы ГОЛАД