У НММ экспануюцца традыцыйныя ўпрыгожванні народаў Еўразіі

Шэдэўры народнага мастацтва нярэдка знаходзіліся ў куфрах і шкатулках... Традыцыйныя ўпрыгожванні, частка народнага строя, перадаваліся ў спадчыну, складалі пасаг, аздаблялі выгляд красунь на святах... Палюбавацца на іх можна на выставе «Шкатулка каштоўнасцей» у Нацыянальным мастацкім музеі. На ёй прадстаўлена 250 шэдэўраў — традыцыйных упрыгожванняў народаў Еўразіі XVIII–XX стагоддзяў з калекцыі Расійскага этнаграфічнага музея ў Санкт-Пецярбурзе. Вырабы чатырох дзясяткаў народаў даказваюць самабытнасць кожнай нацыянальнай культуры. Каралі, паясы, завушніцы, какошнікі, разнастайныя падвескі, выкананыя і прафесійнымі ювелірамі, і народнымі майстрамі з металу, каменняў, скуры, тканінаў. Ёсць магчымасць вывучыць мноства экзатычных назваў — архалукамі называлася жаночае верхняе адзенне ў аварцаў, ізу — нагруднік для замужняй жанчыны ў казанскіх татар, а жыхары Левабярэжнай Украіны з манет, часта дукатаў, рабілі падвескі-дукачы. У адной з вітрын прадстаўлены і беларусы — два слуцкія паясы і некалькі сціплых упрыгажэнняў, хаця ў анатацыі гаворыцца, што толькі ў Полацку было знойдзена восем ювелірных майстэрняў XII-XIII і XVII-XVIII стагоддзяў, на беларускіх землях існавалі цэлыя дынастыі майстроў. Але народныя строі беларусаў былі настолькі прыгожыя, складаныя і кампазіцыйна завершаныя, што амаль не мелі патрэбы ў дадатковых упрыгожваннях. 

Да экспанатаў дадаюцца фотаздымкі, на якіх можна пабачыць прадстаўнікоў розных народаў у нацыянальных строях. Той, хто паходзіць па выставе, упэўніцца, што гэтыя традыцыйныя вырабы з’яўляюцца крыніцай натхнення для сучасных майстроў, а многія са старажытных упрыгожванняў з задавальненнем насіла б любая сучасная модніца.

Выстава працягне сваю працу да 11 снежня 2022 года.

Людміла ІВАНОВА