Вы тут

Цукразамяняльнікі: карысная альтэрнатыва, маркетынгавы ход ці шкода здароўю?


Заменнікі цукру б'юць рэкорды продажу. Попыт на салодкія двайнікі падаграваюць урачы, якія часта выступаюць супраць звычайнага цукру, называючы яго адным з галоўных ворагаў здароўя.


Вытворцы запэўніваюць, што цукразамяняльнік больш карысны за цукар, і спасылаюцца на Сусветную арганізацыю аховы здароўя, якая рэкамендуе памяншаць колькасць цукру ў рацыёне. Урачы не кажуць прама, што трэба пераходзіць на заменнікі і падсаладжальнікі, але, як пацвярджаюць фінансавыя справаздачы кампаній па вытворчасці заменнікаў цукру, чыстая выручка ад іх продажу дасягае 20 мільярдаў долараў. Гэта ўжо толькі ў два разы менш, чым ад продажу цукру, і разрыў імкліва скарачаецца.

Найбольшы ўклад уносіць самы папулярны ў свеце падсаладжальнік — аспартам, ён жа Е951, яго ж найбольш крытыкуюць, што і кідае цень на ўсе падобныя рэчывы. Першае, што насцярожвае, гэта тое, што вынайдзены аспартам быў памылкова — падчас хімічных доследаў амерыканскага навукоўца, які марыў адкрыць новыя лекі ад хвароб страўніка. Але пра свае добрыя намеры ён забыўся, калі аб аспартаме даведаліся харчовыя кампаніі-монстры. З тых часоў аспартам часцей за іншыя іранічна дадаюць у газіроўкі, жуйкі, чыпсы, соусы, ледзянцы — не самыя дружалюбныя для страўніка прадукты.

Аднак у 1990-я вакол аспартаму ўсё ж здарыўся скандал: СМІ ў адзін голас загаварылі, што падсаладжальнік смяротна небяспечны. Хімікі высветлілі, што, награваючыся ў арганізме, аспартам распадаецца на тры кампаненты, у тым ліку метанол, аднак у мікраскапічных дозах. Урачы з ЗША пасля шуміхі правялі маштабнае даследаванне аспартаму і па яго выніках прызналі падсаладжальнік абсалютна бяспечным.

На некаторых расійскіх заводах, дзе вырабляюць нізкакаларыйную газіроўку, вельмі выгадны аспартам, які зніжае сабекошт, не дадаюць менавіта з-за яго дрэннага іміджу, замяніўшы на іншы падсаладжальнік — Е952, або цыкламат натрыю. Гэта таксама ветэран на рынку салодкіх дабавак. Міністэрства аховы здароўя Злучаных Штатаў прызнала яго бяспечным і дазволіла ў канцы 50-х гадоў мінулага стагоддзя, аднак праз 12 гадоў рэчыва ў тых жа ЗША забаранілі.

Зрэшты, амерыканскія даследаванні не пераканалі ўрачоў і чыноўнікаў з Еўропы, Канады, Аўстраліі, бо даследчыкі кармілі цыкламатам натрыю пацукоў, анатомія і метабалізм якіх моцна адрозніваюцца ад чалавечых. Прычым давалі жывёлінам штодня проста гіганцкую дозу цыкламату — столькі ж, колькі ў палове тысячы слоікаў дыетычнай газіроўкі. На рак у выніку захварэлі ўсяго толькі 8 паддоследных з 240, але непасрэднай сувязі з ужываннем цыкламату натрыю так і не ўстанавілі. Таму ва ўсіх развітых краінах, акрамя ЗША, цыкламат ніхто не забараняў, а непераканаўчае даследаванне аб яго шкодзе і «чарнуха» ў СМІ, як запэўніваюць некаторыя навукоўцы, — нішто іншае, як змова ад вытворцаў цукру.

Цыкламат натрыю трапіў пад забарону роўна ў той момант, калі выручка ад яго продажаў дасягнула мільярда долараў, а продажы цукру ўпершыню ў гісторыі замарудзіліся. Дадаваць яго ў напоі, выпечку стала нявыгадна не толькі з пункту гледжання маркетынгу, але і з прычыны банальнага разліку: нягледзячы на тое, што цыкламат натрыю ў дзесяць разоў даражэйшы за цукар, расход падсаладжальніка ў 50 разоў меншы. Гэта значыць, замест дзвюх шклянак цукру ў торт можна замяшаць чайную лыжку цыкламату.

Але цікава, што супраць яшчэ аднаго падсаладжальніка з нулявой каларыйнасцю — сукралозы — верхаводы цукровага бізнесу нічога супраць не маюць і ў СМІ яе не крытыкуюць, хоць сукралоза ў 600 разоў саладзейшая за цукар. А ўсё таму, што сукралозу робяць са звычайнага бураковага цукру. І хоць яго хларыруюць для гэтага, усё роўна баяцца няма чаго, запэўніваюць тэхнолагі. Апасацца, аказваецца, трэба іншага — таго, што замест сукралозы могуць насыпаць банальны цукар. І так робяць, бо сукралоза ў вытворчасці даражэйшая, а на смак і па колеры яна і цукар — адно пад адно.

Большасць прафесійных сродкаў па доглядзе за зубамі ўтрымлівае падсаладжальнік ксіліт. Гэты салодкі кампанент робяць з бярозы і кукурузы. Для чалавека ён бяспечны, а бактэрыі, здольныя выклікаць карыес, проста не могуць ксіліт ператравіць.

Алена КРАВЕЦ

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.

Гандаль

Кандытарскія вырабы — брэнд беларускай харчовай прамысловасці

Кандытарскія вырабы — брэнд беларускай харчовай прамысловасці

Напярэдадні Міжнароднага сімпозіума кандытараў эксперты расказалі аб планах і перспектывах кандытарскай галіны.

Сям'я і дэмаграфія

Святлана Клачкова: Чым больш дзяцей, тым больш любові

Святлана Клачкова: Чым больш дзяцей, тым больш любові

Як жа шматдзетная сям’я спраўляецца з хатнімі клопатамі?