Выстаўка-продаж работ маладых мастакоў Беларусі «Асенні салон» скончыла сваю работу месяц таму. Фіналам буйнога праекта стала абвяшчэнне пераможцаў і дэманстрацыя твораў найлепшых мастакоў гэтага года. Невялічкая экспазіцыя доўжылася літаральна пару дзён, што не дало магчымасці ахвотным асэнсаваць і, магчыма, ацаніць выбар болей як 20 тысяч гледачоў. А менавіта яны вызначалі пераможцаў «Асенняга салона». Наўздагон выстаўцы дзелімся некаторымі думкамі пра яе.
Жывапіс, графіка, скульптура, інсталяцыя, дэкаратыўна-прыкладное мастацтва і фатаграфія — творы гэтых кірункаў былі прадстаўлены на фестывалі. Здаецца, сёлетнія трыумфатары наўрад ці могуць здзівіць тых, хто хоць крышачку сочыць за мастацкім працэсам у краіне.
Па выніках галасавання гледачоў арганізатары назвалі імёны 32 пераможцаў. У «Жывапісе» перамогу атрымалі Наталля Неўмяржыцкая, Kate Shi, Андрэй Пічушкін, Вольга Мілюк і Аляксандр Даманаў. Намінацыю «Графіка» прадставілі пераможцы Лізавета Пастушэнка, Уладзіслаў Заяц, Кацярына Коўзусь, Марыя Сыракваш і Ганна Кохан. Сярод скульптараў гледачам прыйшліся даспадобы творы Фёдара Каштанава, Арцёма Мядзведзева, Ільі Гічана, Максіма Шчавеля і Яна Басалыгі. У секцыі «Інсталяцыя» пераможцамі сталі Надзея Хмыль, Ірына Котава, Юлія Качур, Паліна Корзун-Фомчанка і Мар’яна Карповіч. У намінацыі «Дэкаратыўна-прыкладное мастацтва» гледачы вылучылі работы Марыі Рудакоўскай, СВЕЧКІ, Юліі Цярэшкі, Анастасіі Каліноўскай і Юліі Дранец. Найбольш выдатнымі фатографамі наведвальнікі «Асенняга салона» палічылі Аляксандра Шкарубу, Ганну Мельнікаву, Bikimaksi, Ксенію Лакотку і Віталя Жыхарова. Многія з гэтых аўтараў невядомыя шырокаму колу гледачоў. У гэтым і фішка — быць заўважаным даецца шанс любому творцу, нават таму, хто толькі-толькі пачынае свой шлях у мастацтве. Хоць адсюль зразумелыя шматлікія негатыўныя водгукі, абурэнне і пытанні да мастацкай вартасці тых ці іншых работ пасля прагляду выстаўкі цалкам. Ці было б мэтазгодным у большай ступені абмяжоўваць ахвотных паўдзельнічаць (а патрабаванняў да якасці твораў, здаецца, і так дастаткова)? Натуральна, гэта не ў інтарэсах арганізатараў, якія штогод так ці інакш імкнуцца адлюстраваць актуальныя плыні ў сучасным айчынным мастацтве.
Самае цікавае, што абсалютнымі пераможцамі «Асенняга салона» сталі жывапісцы Алеся Скарабагатая і Фёдар Бажын. Работы Алесі Скарабагатай атрымліваюць самыя станоўчыя водгукі ад гледача не толькі беларускага, але і замежнага. Творчасць жа Фёдара Бажына, брэсцкага аўтара, які не мае спецыяльнай мастацкай адукацыі, унікальная па-свойму. Яго творы, недзе абстрактныя, але ў большасці канцэптуальныя, схіляюць да разважанняў аб шчасці і радасці, аб незаўважаных баках жыцця, якія дазваляюць адчуць задаваленне ад існавання на гэтай планеце. Здаецца, менавіта гэтым гледачоў прывабліваюць поўныя яркіх колераў няхітрыя карціны Фёдара Бажына.
Яўгенія ШЫЦЬКА
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.
