Вы тут

Карэспандэнт «Звязды» паспрабавала сябе ў ролі ваеннага курсанта


Ваенная акадэмія — галоўная кузня армейскіх кадраў. Гэта 11 факультэтаў, 39 кафедраў, 35 спецыяльнасцяў, тысячы прафесійна падрыхтаваных афіцэраў. Лічбы ўражваюць. Але абітурыенту цікава іншае: што схавана за фасадам будынка, як пражываюць свой дзень курсанты, як выглядае іх дом на чатыры гады. Карэспандэнту ўдалося прыадкрыць заслону жыцця будучых афіцэраў і хоць часова, але пабыць курсантам Ваеннай акадэміі.


Каб цалкам пагрузіцца ў курсанцкія будні, я вырашыла не проста правесці дзень за партай у акадэміі, а ад світання да змяркання з курсантамі факультэта сувязі і аўтаматызаваных сістэм кіравання пражыць маленькае жыццё.

Паўгадзіны на зборы

Кожная раніца будучых афіцэраў пачынаецца з зарадкі. Пасля пад'ёму ёсць усяго некалькі хвілін, каб прачнуцца, хутка апрануцца і выйсці на пастраенне. Відовішча зачароўвае: з усіх бакоў сыходзяцца людзі. У прыцемках ліхтара можна разглядзець толькі сонныя сілуэты. Але літаральна праз дзесяць хвілін на тварах курсантаў ужо і ўсмешка, і чырвань. І ўсё роўна — на вуліцы плюс або мінус 20 — заняткі заўсёды пачынаюцца ў адзін і той жа час.

Праз сорак хвілін мы вяртаемся ў інтэрнат: прыняць душ, навесці парадак у пакоі — на ўсё гэта паўгадзіны. Праўда, дзяўчатам трэба крыху больш часу: прыгажосць, нават у сценах ваеннай ВНУ, ніхто не адмяняў. Дарэчы, першае, што павінен зрабіць курсант Ваеннай акадэміі, пераступіўшы парог навучальнай установы, — здаць мабільны тэлефон. Выкарыстоўваць мабільныя прыстасаванні можна толькі ў вольны час, а гэта або вечар, або выхадныя.

Перад тым як пайсці на сняданак — зноў пастраенне. Старшы афіцэр дасканала правярае вонкавы выгляд. На заметку будучым курсантам: калі вы не прызвычаіліся снедаць, то пасля фізкультуры і ранішніх працэдур вы будзеце абганяць усіх па дарозе да сталовай — абы хутчэй пакласці ў рот запаветную лыжку цёплай кашы. У ранішнім меню — аўсяная каша, варанае яйка, салодкі чай, батон і кавалачак сметанковага масла. Гэта вельмі смачна. Наступны прыём ежы — бліжэй да гадзіны дня, таму ў талерках нічога не застаецца.

Навучанне для інтэлектуалаў

На тэрыторыі акадэміі — дзясяткі будынкаў і пабудоў. У бясконцых калідорах аднаго толькі галоўнага корпуса можна заблукаць. Белыя калоны, на сценах — партрэты легендарных военачальнікаў. Той, хто пераступае парог КПП, усведамляе: тут рыхтуюць ваенную эліту, людзей, здольных абараніць сваю краіну.

Сучасны профіль навучання ў Ваеннай акадэміі ўлічвае прыярытэтныя напрамкі ваеннай справы: супрацьпаветраную абарону, авіяцыю, сілы спецыяльных аперацый, сувязь і аўтаматызаваныя сістэмы кіравання. Дарэчы, менавіта па апошняй спецыяльнасці я і буду праходзіць навучанне. Пасля першых двух заняткаў становіцца зразумела, наколькі няпроста гуманітарыю асвойваць гэтую спецыяльнасць. Любы кірунак патрабуе інтэлектуальнай падрыхтоўкі.

Працэс навучання ў акадэміі ўражвае. Дух захоплівае толькі ад таго, як тут вітаюць выкладчыка. Сучасныя навучальныя класы, дзе замест партаў — навінкі ўзбраення. Унікальны падыход да навучання: курсант імгненна асвойвае не толькі тэорыю, але і практыку. Каб азнаёміцца з узорамі тэхнікі для сувязі, не трэба выязджаць на палігон — яны ўстаноўлены адразу ж у аўдыторыях. Тут размешчаны і сапраўдныя радыёрэлейныя станцыі. Стаяць і апаратныя, з якіх курсанты факультэта сувязі вядуць кіраванне самімі станцыямі: атрымліваюць розныя каардынаты, наладжваюць кантакт з атрымальнікам. Чым жа яны адрозніваюцца ад тых, што знаходзяцца на палях? Толькі тым, што гэта стацыянарныя станцыі, а там — мабільныя. Да сярэдзіны дня ўдалося авалодаць тэрміналогіяй сувязістаў, і я ўжо лёгка тлумачыла аператарам, чым адрозніваюцца радыёрэлейныя станцыі ад трапасферных.

Насычаны дзянёк!

Дзень настолькі насычаны, што першы час без нататак не абысціся — усё трэба запісваць. Пара, яшчэ пара, практыка ў вайсковай часці. Што там далей? Агнявая, страявая, марш-кідок. Потым усё? Як не? Яшчэ пары?

Я паспяваю наведаць заняткі па агнявой падрыхтоўцы і асвяжыць навыкі стральбы з пісаталета Макарава. Пасля мы скідваем бронекамізэлькі і ляцім на пляц. Затым экіпіруемся і выходзім на старт. Наперадзе — марш-кідок на пяць кіламетраў. Для курсантаў гэта не мяжа: бегаюць яны і па 10, і па 30 кіламетраў. Я ўжо стамілася, а яшчэ толькі абед. Пасля невялікага перапынку пераапранаемся — і зноў на факультэт. Наперадзе яшчэ тры пары.

Завяршаецца дзень вячэрняй паверкай. Для курсантаў гэта штодзённасць, для мяне — цэлая падзея. Увесь факультэт строіцца на пляцы акадэміі. Курсавыя называюць прозвішчы: трэба пераканацца, ці ўсе на месцы.

Некаторым курсантам яшчэ няма і дваццаці гадоў, але яны ўжо добра разумеюць, што такое вернасць і абавязак. Многія з іх дагэтуль і цяжкасцяў не ведалі, а тут з годнасцю пераносяць усе нягоды і пазбаўленні. Усе з іх упэўненыя ў сваім выбары — стаць курсантамі галоўнай ваеннай ВНУ краіны.
А значыць, беларускімі афіцэрамі і прафесіяналамі ваеннай справы.

Ганна ЧЫЖ-ЛІТАШ

Фота з архіва аўтара

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.