«Мы трымаем гэтую сітуацыю на кантролі». Качанава аб маніторынгу тавараў

Члены Савета Рэспублікі трымаюць на асаблівым кантролі маніторынг асартыменту тавараў, заявіла журналістам старшыня Савета Рэспублікі Наталля Качанава, паведамляе БелТА.

«За мінулы тыдзень мы праманіторылі 286 аб’ектаў у 92 раёнах нашай краіны і членамі Савета Рэспублікі парушэнняў у асартыментным пераліку выяўлена не было. Гэта адназначна. Акрамя членаў Савета Рэспублікі да гэтай работы таксама падключыліся работнікі сакратарыята. Мы збіраем інфармацыю, калі размаўляем з людзьмі, выязджаем у рэгіёны. Я сама ў выхадныя дні бываю магазінах, у рэгіёнах абавязкова заходжу ў гандлёвыя аб’екты для таго, каб праверыць, наколькі вытрымліваецца сёння асартыментны пералік тавараў, — расказала Наталля Качанава. — Мы цяпер сталі маніторыць яшчэ тую інфармацыю, якая размяшчаецца на інтэрнэт-сайтах. Таму што часта яна абсалютна ілжывая і не пацверджаная ніякімі фактамі.Мы гэтую інфармацыю абавязкова правяраем, накіроўваем для праверкі ў мясцовыя органы ўлады, якія выязджаюць, правяраюць і тут жа нам дасылаюць інфармацыю з гэтых гандлёвых аб’ектаў не з пустымі паліцамі, а з паліцамі, дзе маса тавараў.Таму, вядома, мы трымаем гэтую сітуацыю на кантролі, і Прэзідзнт нашай краіны папрасіў нас актыўна далучыцца да гэтай працы».

— Разумееце, тут трэба ставіцца спакойна, — адзначыла старшыня Савета Рэспублікі. — Гэта ідзе інфармацыйная вайна, калі нядобрасумленныя людзі проста жадаюць унесці раскол у грамадства для таго, каб гэта з’явілася яшчэ адным трыгерам, каб выклікаць неспакой у нашых грамадзян. Абсалютна няма ніякіх падстаў, каб сёння казаць аб тым, што заўтра з паліц крам знікнуць нейкія тавары. Больш вам скажу, сустракаючыся сёння з моладдзю, адно з першых пытанняў, якое яны задалі мне: мы чытаем (а яны ж у асноўным чытаюць інтэрнэт), што вось дзесьці знікаюць нейкія тавары з паліц крам і заўтра ў нас нечага раптам не стане. На што я ім сказала: для таго каб ведаць праўду, трэба чытаць дзяржаўныя СМІ і глядзець дзяржаўнае тэлебачанне — тады вы будзеце ведаць праўду».

«Таму мы займаліся гэтай работай і абавязкова будзем займацца ў далейшым для таго, каб даносіць да людзей праўду», — канстатавала Наталля Качанава.

«Павінна быць вельмі хуткая рэакцыя. Бо калі пачынаюць з аднаго сайта на іншы перапампоўваць хлуслівую інфармацыю, людзі ўсё гэта бачаць. І нам штодня паступае такая інфармацыя з усіх крыніц, мы яе акумулюем і адразу аддаём для праверкі ў мясцовыя органы ўлады. Тут нават не трэба чакаць нейкіх сігналаў. І не толькі члены Савета Рэспублікі ўключыліся ў гэтую работу, але і супрацоўнікі апарата Савета Рэспублікі. І ў гэтым нічога складанага няма. Мы ўсе з вамі бываем у крамах. І кожны з нас купляе прадукты, тавары першай неабходнасці, іншыя тавары. Таму многія інфармуюць нас па гэтых пытаннях, — расказала Наталля Качанава. — У тым ліку і на прыёмах грамадзян па асабістых пытаннях я задаю ўсім пытанне аб асартыменце ў магазінах. Таму што людзі прыязджаюць з розных рэгіёнаў краіны. Шчыра скажу, што не было ніводнага факта, каб людзі сказалі, што чагосьці няма ў крамах ці чагосьці не хапае».

Разам з тым спікер не выключае, што пры вялікай колькасці гандлёвых кропак у некаторых з іх магчымыя нейкія парушэнні. «На павышэнне цэн мы таксама звяртаем увагу. Калі ты купляеш адзін і той жа тавар, то можаш гэта вызначыць. На нешта павысіліся цэны. Напрыклад, у Нясвіжы на 20% павысілася цана на воцат. Але разам з тым ёсць зніжэнне цэн на рапсавы алей, на раслінны — у Бабруйску. І такіх прыкладаў магу прыводзіць дастаткова шмат, — адзначыла старшыня Савета Рэспублікі. — Вядома, у кожны гандлёвы аб’ект нашы прадстаўнікі не зайшлі, магчыма, дзесьці і ёсць нейкія недахопы. Але яны былі яшчэ да пастановы Савета Міністраў, тады яшчэ не было таго ажыятажу, які некаторыя спрабуюць стварыць сёння вакол гандлю, Таму ўсё ў выканаўчай дысцыпліне і тых людзях, якія займаюцца гэтымі пытаннямі, мы займаліся і будзем займацца маніторынгам так, як таго патрабуе ад нас жыццё. І будзем прымаць меры. У гэтай рабоце мы выкарыстоўваем усе крыніцы для таго, каб валодаць праўдзівай, дакладнай інфармацыяй».

«Вядома, у першую чаргу гэта ўсё накіравана супраць улады. Паглядзіце, калі ў нас сёння няма праблем? Калі мы гаворым аб тым, як завяршыўся сельскагаспадарчы год. Колькі вырашчана збожжа ў гэтым годзе — па 1 т на кожнага жыхара краіны, і нават больш. Тады, калі ў нас такі асартыментны пералік прадуктаў харчавання, якімі мы сёння ганарымся. І якасць цудоўная, і выпускаюць нашы таваравытворцы беларускія. І мы нават наадварот думаем, і такія задачы нам ставіць Прэзідэнт — адпраўляць на экспарт. Але ў першую чаргу мы павінны забяспечыць свой народ таварамі народнага спажывання і прадуктамі харчавання, што і робіцца. Таму падстаў у людзей для панікі няма, — сказала Наталля Качанава. — А тыя нядобрапрыстойныя грамадзяне, якія былі, ёсць і будуць, яны, вядома, жадаюць, каб у краіне нешта было не так. Але ведаеце, мне здаецца, гэтая патугі абсалютна нікчэмныя».

Людзі самі бачаць і разумеюць, як добра жывуць беларусы, зазначыла спікер. «Нават мяркуючы па тым, як да нас прыязджаюць у краіну. Я ў папярэднія выхадныя пабывала ў Гомельскай вобласці (мы праводзілі там мерапрыемствы), у сваёй роднай Віцебскай вобласці дастаткова шмат пабывала ў гандлёвых аб'ектах, размаўляла з прадаўцамі, людзьмі. Яны расказвалі, колькі прыязджае зараз грамадзян з Прыбалтыкі, Польшчы ў Беларусь, якія за выходныя проста вывозяць нашы тавары. Добра, няхай людзі прыязджаюць.Калі ў іх недахоп гэтых тавараў — мы ж не забараняем нікому. Вы бачыце, што ў нас бязвізавы рэжым. Няхай людзі прыязджаюць і купляюць беларускую прадукцыю добрай якасці. Мы будзем гэтаму толькі рады», — дапоўніла старшыня Савета Рэспублікі.