Вальфовіч: Беларусы вязуць у Ерэван пазітыўны настрой

Частка беларускай дэлегацыі прыбыла ўжо ў Ерэван для ўдзелу ў мерапрыемствах саміту Арганізацыі Дагавора аб калектыўнай бяспецы, перадае БелТА.

Днём 22 лістапада ў сталіцы Арменіі прызямліўся ваенны борт ІЛ-76МД, на якім прыбылі дзяржаўны сакратар Савета бяспекі Аляксандр Вальфовіч, міністр абароны Віктар Хрэнін і міністр замежных спраў Уладзімір Макей.

Разам з імі ў Ерэван прыляцеў шэраг суправаджаючых асоб з адпаведных ведамстваў і пул беларускіх журналістаў. Умовы палёту былі даволі спартанскімі нават для высокіх службовых асоб, але атмасфера выключна рабочая.

Магчыма, для дзяржсакратара і міністраў было крыху нечаканым, падняўшыся на борт, сутыкнуцца з амаль дзясяткам журналістаў і ўключанымі камерамі. Аднак яны з гатоўнасцю згадзіліся коратка пракаменціраваць маючыя адбыцца ў Ерэване падзеі, наколькі гэта даваў магчымасць аглушальны роў рухавікоў ваенна-транспартнага самалёта.

Аляксандр Вальфовіч падкрэсліў важнасць усім разам, адной дружнай сям’ёй вырашаць праблемы, якія ўзнікаюць, абараняць ад пагроз народы краін АДКБ, забяспечваць бяспеку.

Ён упэўнены, што падагульняючы ў гэтым годзе саміт АДКБ павінен прайсці на добрым, пазітыўным настроі. «Беларусы, прынамсі, пазітыўны настрой вязуць у Ерэван. Таму што мы прымаем у сонечнай Арменіі старшынства. Таму мы павінны ўсё пазітыўнае, што напрацавана, забраць, нарасціць і ў наступным годзе з чыстым сумленнем перадаць ужо старшынства наступнай краіне», — заявіў дзяржсакратар Савета бяспекі.

Пасля размовы з журналістамі — адразу да работы. Уладзімір Макей, напрыклад, паглыбіўся ў вывучэнне дакументаў з важкай папкі. А крыху пазней можна было назіраць, як усе разам нешта ажыўлена абмяркоўваюць, седзячы за сталом у бізнес-класе самалёта.

Трэба адзначыць, што не абышлося і без галантнасці. Дзяўчатам з пула журналістаў прапанавалі заняць больш зручныя класічныя крэслы, якія першапачаткова прызначаліся для суправаджаючых з дзяржорганаў.

Астатнія разам з мужчынскай паловай журналісцкай браціі размясціліся далей у салоне на адкідных сядзеннях, якія выкарыстоўваюцца для перавозкі ваеннаслужачых. Дарэчы, менавіта гэты самалёт таксама выкарыстоўваўся для перакідкі беларускага міратворчага кантынгенту ў Казахстан у студзені гэтага года.

Як паведамлялася БЕЛТА, у Ерэван 23 лістапада прыбудзе Прэзідэнт Беларусі Аляксандр Лукашэнка. Ён прыме ўдзел у сесіі Савета калектыўнай бяспекі Арганізацыі Дагавора аб калектыўнай бяспецы. Мерапрыемства пройдзе ў вузкім і пашыраным складах.

Лідары краін абмяркуюць актуальныя праблемы міжнароднай і рэгіянальнай бяспекі, асноўныя вынікі дзейнасці АДКБ у міжсесіённы перыяд. Удзельнікі саміту таксама разгледзяць шырокі спектр пытанняў, якія датычацца розных сфер і напрамкаў узаемадзеяння.

З улікам пераходу старшынства ў АДКБ да Беларусі ў 2022-2023 гадах Аляксандр Лукашэнка агучыць прыярытэтныя напрамкі, на якіх у гэты перыяд трэба будзе сканцэнтраваць сумесныя намаганні.

Як раней інфармаваў прэс-сакратар АДКБ Уладзімір Зайнетдзінаў, у парадку дня пасяджэння СКБ шэраг дакументаў для падпісання, якія датычацца аснашчэння міратворчых сіл сучасным узбраеннем, ваеннай і спецыяльнай тэхнікай, сумеснага фарміравання радыяцыйнай, хімічнай і біялагічнай абароны і медыцынскага забеспячэння АДКБ, а таксама надання комплексу аператыўна-прафілактычных мерапрыемстваў «Наёмнік» статусу рэгіянальнай антытэрарыстычнай аперацыі. Будзе разгледжаны бюджэт АДКБ на 2023 год.

У сувязі з маючай адбыцца ратацыяй з 1 студзеня 2023 года Савет калектыўнай бяспекі разгледзіць пытанне аб генеральным сакратары Арганізацыі Дагавора аб калектыўнай бяспецы.

Перад пачаткам СКБ адбудзецца сумеснае пасяджэнне Савета міністраў замежных спраў, Савета міністраў абароны і Камітэта сакратароў саветаў бяспекі, у ходзе якога будзе абмяркоўвацца ваенна-палітычная абстаноўка ў рэгіёнах калектыўнай бяспекі АДКБ, парадак дня маючай адбыцца сесіі СКБ.

У ходзе пасяджэння СМЗС, СМА, КССБ плануецца прыняцце шэрага важных палітычных заяў, у тым ліку заявы міністраў замежных спраў дзяржаў — членаў АДКБ па пытаннях умацавання архітэктуры міжнароднай і рэгіянальнай бяспекі і кантролю над узбраеннямі, раззбраення і нераспаўсюджвання, а таксама заявы сакратароў саветаў бяспекі з асуджэннем спроб гераізацыі нацызму, неанацызму, экстрэмізму, шавінізму, усіх форм ксенафобіі. Плануецца прыняцце рашэння Камітэта сакратароў саветаў бяспекі АДКБ «Аб складзе Каарднацыйнага савета упаўнаважаных органаў дзяржаў — членаў Арганізацыі Дагавора аб калектыўнай бяспецы па пытаннях біялагічнай бяспекі».