«Вялікі камень» падпісаў мемарандум аб супрацоўніцтве з лагістычнай зонай Казахстана

У ходзе візіту ў Алматы паміж СЗАТ «Кампанія па развіцці індустрыяльнага парку» і першай прыватнай індустрыяльна-лагістычнай зонай Казахстана DAMU падпісаны мемарандум аб супрацоўніцтве, паведамілі ў прэс-службе «Вялікага каменя».

Мемарандумам прадугледжана супрацоўніцтва па прыцягненні інвестыцый у рамках ініцыятывы «Адзін пояс — адзін шлях».

DAMU Logistics з’яўляецца аператарам сеткі індустрыяльна-лагістычных паркаў і вядучым 3PL-аператарам ўсяго Цэнтральнаазіяцкага рэгіёну. Кампанія кіруе каля 300 тыс. кв. м складскіх памяшканняў класа А.

У ходзе візіту бакі абмяняліся вопытам па будаўніцтве і эксплуатацыі вытворча-складскіх памяшканняў, а таксама інжынерна-транспартнай інфраструктуры.

Кітайска-беларускі індустрыяльны парк «Вялікі камень» — асаблівая эканамічная зона з адмысловым прававым рэжымам, размешчаная ў 25 км ад Мінска. Прыярытэтныя для парку напрамкі — машынабудаванне, электроніка і тэлекамунікацыі, біятэхналогіі, фармацэўтыка, новыя матэрыялы, лагістыка, электронная камерцыя, захоўванне і апрацоўка вялікіх аб’ёмаў дадзеных.

Фота: industrialpark.by