У ДТЗ у Магілёўскім раёне загінула 15-гадовая пасажырка

Аўтамабіль Renault сутыкнуўся з грузавым аўтамабілем Scania. У выніку ДТЗ загінула 15-гадовая дзяўчынка, паведамляе БелТА са спасылкай на МУС.

ДТЗ адбылося каля 18.30 паблізу вёскі Засценкі Магілёўскага раёна. 46-гадовы кіроўца Renault не ўлічыў умовы надвор’я, не абраў бяспечную дыстанцыю да трактара, які рухаўся ў спадарожным напрамку і займаўся ўборкай праезнай часткі ад снегу. У выніку іншамарку занесла на паласу сустрэчнага руху, дзе адбылося сутыкненне з грузавым аўтамабілем Scania.

Ад атрыманых траўмаў 15-гадовая дзяўчынка, пасажырка Renault, загінула на месцы. Кіроўца і яшчэ адна пасажырка легкавушкі дастаўлены ў бальніцу.

На легкавым аўтамабілі ўстаноўлены зімовыя шыны з моцным зносам пратэктара.