Мужчына выратаваны пры пажары ва Ушацкім раёне

Пры пажары ў Ушацкім раёне выратаваны мужчына. Гук спрацаваўшага апавяшчальніка пачулі яго суседзі, паведамілі ў Віцебскім абласным упраўленні МНС.

Інцыдэнт адбыўся позна ўвечары 28 лістапада. У 23.05 на аварыйна-выратавальны пост № 12 Ушацкага раённага аддзела па НС паступіла паведамленне аб спрацаваным аўтаномным пажарным апавяшчальніку па вуліцы Паўднёвай у аграгарадку Глыбачка. Той, хто тэлефанаваў, таксама адзначаў, што з акна кватэры ідзе дым.

Прыехаўшы па названым адрасе, ратавальнікі ўбачылі дым у адной з кватэр аднапавярховага чатырохкватэрнага жылога дома. Суседка паказала работнікам МНС акно ў пакой, дзе звычайна знаходзіўся гаспадар жылля. Ратавальнікам прыйшлося разбіць акно, паколькі на стук у дзверы мужчына не адказваў. У поўным дыму пакоі яны знайшлі мужчыну 1959 года нараджэння. Пенсіянер быў у свядомасці, але казаў невыразна. Праз аконны праём яго даставілі на свежае паветра, да прыезду медыкаў аказалі першую медыцынскую дапамогу.

Пазней пацярпелага перадалі брыгадзе хуткай медыцынскай дапамогі. Яго з апёкамі і атручваннем прадуктамі гарэння даставілі ў бальніцу.

У аднапавярховым жылым доме, дзе здарыўся пажар, чатыры кватэры, тры з якіх жылыя. Гук пажарнага апавяшчальніка пачула гаспадыня адной з іх і паведаміла суседу. Той і патэлефанаваў ратавальнікам.

Агонь пашкодзіў у кватэры ложак і маёмасць. Па факце праводзіцца праверка. Мяркуецца, што прычынай пажару стала неасцярожнасць пры курэнні.

Фота: Віцебская абласное ўпраўленне МНС