Рэспубліканскі Прававы турнір «Сіла закона» дазваляе далучаць моладзь да вывучэння прававой культуры, асноўных напрамкаў павышэння яе ўзроўню ва ўмовах фарміравання сацыяльнай прававой дзяржавы і прававой грамадзянскай супольнасці. Такім меркаваннем падзяліўся з БелТА першы сакратар Цэнтральнага камітэта Беларускага рэспубліканскага саюза моладзі Аляксандр Лук’янаў.
II Рэспубліканскі Прававы турнір для старшакласнікаў «Сіла закона», прысвечаны ў новым сезоне Асноўнаму закону нашай краіны, стартуе 1 снежня. Яго арганізатары — Нацыянальны Цэнтр прававой інфармацыі і БРСМ пры падтрымцы Міністэрства адукацыі і іншых зацікаўленых — запрасілі да ўдзелу ў праекце навучэнцаў 9-11 класаў. Інтэлектуальнае спаборніцтва пройдзе ў тры туры ў фармаце анлайн-тэсціравання. Імя пераможцы стане вядома падчас рэспубліканскага фіналу, правядзенне якога запланавана 21 снежня на базе Беларускага дзяржаўнага ўніверсітэта.
«Жыццё паказала, што прававых ведаў у 2020 годзе маладым беларусам не хапала. Ён стаў для нас пэўным урокам, мы зрабілі сур’ёзныя высновы. У год, калі ў нашай краіне ішла падрыхтоўка прыняцця абноўленай Канстытуцыі, праект БРСМ адкрыты дыялог «Сіла Асноўнага закона» стаў адным з інфармацыйных навігатараў у моладзевых аўдыторыях, — распавёў Аляксандр Лук’янаў. — Знайсці тую сцежку, па якой будзе цікавей і больш эфектыўна маладому чалавеку развіваць веды сваіх правоў, аказваць яму дапамогу ў фарміраванні сябе як законапаслухмянага грамадзяніна спрыяюць моладзевыя прававыя праекты. Адным з іх з’яўляецца турнір для старшакласнікаў «Сіла закона».
Першы сакратар ЦК БРСМ падкрэсліў, што ў прасоўванні прававой асветы моладзі за апошнія паўтара года БРСМ удалося знайсці надзейную апору і падтрымку ў асобе шэрагу структур. «Павышэнню ўзроўню прававой пісьменнасці моладзі спрыяе цеснае і ўзаемавыгаднае супрацоўніцтва маладзёжнай арганізацыі з Нацыянальным цэнтрам прававой інфармацыі, Нацыянальным цэнтрам заканадаўства і прававых даследаванняў, Інстытутам павышэння кваліфікацыі і перападрыхтоўкі Следчага камітэта, Беларускай рэспубліканскай калегіяй адвакатаў і Беларускім рэспубліканскім саюзам юрыстаў. Мы аб’ядналі свае намаганні і ў рамках прававога турніру будзем навучаць маладое пакаленне — нашых школьнікаў, старшакласнікаў, якія стаяць на парозе выхаду ў сур’ёзнае дарослае жыццё», — дапоўніў ён.
Паводле яго слоў, мэтанакіраваная сістэмная работа па прававым выхаванні юнакоў і дзяўчат з’яўляецца свайго роду засцерагальнікам і нават стоп-кранам для тых, хто спрабуе маніпуляваць іх свядомасцю, у тым ліку і праз інфармацыйныя каналы — сацыяльныя сеткі. «Хлопцы ніколі не парушаць закон, калі будуць ведаць, якая яго сіла ў прамым сэнсе гэтага слова (пра што, дарэчы, і кажа назва турніру «Сіла закона»), як закон можа ўздзейнічаць на маладых грамадзян, калі яны не будуць законапаслухмянымі», — падсумаваў Аляксандр Лук’янаў.
Прэв’ю: БелТА
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.