Як правільна абрэзаць герань на зіму

Герань — непатрабавальная расліна, яна будзе прыгожа расці на любым падаконніку. У яе ёсць тoлькі адзін, але знaчны мінуc — кветка выцягваецца ўверх вельмі хутка, бeз належнага догляду яе вонкавы выгляд cтaнoвіцца нe вельмі прывабным: расліна ператвараецца ў некалькі доўгіх вузлаватых галінак, якія пазбаўлены лістоў. Але герань добра пераносіць абрэзку, становіцца пасля гэтай працэдуры больш пышнай.

Альтэрнатывы абрэзцы няма. Герань заўсёды цягнецца ўверх і без дапамогі не зможа даць бакавых парасткаў. І толькі абрэзка (ці больш ахоўная працэдура — прышчыпванне) дапамогуць сфарміраваць прыгожую крону і стымуляваць з'яўленне бакавых парасткаў.

Абрэзка дапамагае абудзіць спячыя ў ствале пупышкі, якія нельга актывізаваць па-іншаму. Акрамя таго, гэта працэдура спрыяе фарміраванню ў будучыні новых бутонаў: заўважана, што герань, якую прышчыпвалі ці абразалі, дае больш суквеццяў і выглядае нашмат прыгажэйшай, чым куст, які толькі палівалі.

Як запасны варыянт, можна зрэзаць пару маладых парасткаў з верхняй часткі расліны і вырасціць новыя герані. Якія менавіта зразаць, залежыць ад формы канкрэтнага куста. Але ёсць важныя ўніверсальныя правілы абразання кветкі, адзіныя для ўсіх відаў герані, у тым ліку і для герані ампельнай (паўзучай).

Карэкцыя формы расліны звычайна праводзіцца два разы на год — вясной і восенню. Разгледзім восеньскую абрэзку герані, калі мы рыхтуем кветку да зімовага адпачынку. Хутчэй за ўсё, герань за лета разраслася, і працэдура абразання будзе для яе гаючай. Праводзіць яе варта ўжо пасля таго, як адцвітуць апошнія суквецці. Для гэтага спатрэбяцца канцылярскі нож ці лязо, а вось звычайны нож ці секатар — непажадана, гэтыя інструменты могуць паціскаць расліну. Варта прадэзынфіцыраваць інструмент звычайным спіртам або гарэлкай.

Таксама варта загадзя падрыхтаваць яшчэ адзін сродак для дэзынфекцыі — тоўчаны актываваны вугаль. І ў ідэале добра было б узяць фосфарнае ўгнаенне, каб адразу ж падкарміць абрэзаную расліну.

Калі кусцік нядрэнны, яшчэ не страціў форму, то трэба проста падтрымаць яго з дапамогай абразання. У гэтым выпадку прыбіраюць пажоўклыя і завялыя лісты, выдаляюць лішнія бакавыя парасткі, пакінуўшы толькі самыя здаровыя і моцныя.

У залежнасці ад аб'ёму куста ўтвараюць ад трох да шасці бакавых парасткаў. Ад верхавіны таксама варта збавіцца, але калі вышыня куста задавальняе, выдаляюць толькі самы верхні парастак.

Калі ж герань ужо страціла форму, то практычна цалкам выдаляюць асноўнае сцябло, пакідаючы толькі невялікі пянёк (каля дзесяці сантыметраў). Герань — вельмі трывалая і жыццелюбівая расліна, яна з задавальненнем выпусціць з пянька, які застаўся, новыя духмяныя парасткі.

Што важна памятаць:

• не перастарайцеся з абрэзкай! Зразаем не больш за 20 працэнтаў зялёнай масы, інакш расліне будзе цяжка справіцца са стрэсам;
• не праводзім абрэзку пазней за снежань, таму што зімой герань павінна адпачыць, набрацца сіл;
• значная абрэзка адсоўвае тэрміны цвіцення, паколькі з'яўляецца стрэсам для расліны, але затое ў выніку атрымаеце пышную крону;
• доўгія скрыўленыя галінкі можна адразу цалкам выдаляць (пакідаем ствол вышынёй прыкладна дзесяць сантыметраў);
• адразу пасля працэдуры трэба апрацаваць зрэзы тоўчаным вугалем і падкарміць расліну ўгнаеннем;
• у летнія месяцы карысна перыядычна прышчыпваць герань, гэта значыць — выдаляць верхавіну, што дапаможа расліне сфарміраваць прыгожую крону;
• пасля восеньскай абрэзкі варта ўважліва сачыць за станам зрэзу: калі ён пачарнеў, стаў гніць, то неабходна зноў падкараціць сцябло ў тым жа месцы, зрэзаўшы пацямнелы ўчастак. У гэтым выпадку варта добра прадэзынфіцыраваць нож і апрацаваць зрэзы тоўчаным актываваным вугалем.

Ірына ТАМКОВІЧ