Вы тут

Сямейны код таленту


Праз туман праступаюць сілуэты старых дрэваў, самотныя калоны пазначаюць уваход у нябачны храм, ... Тонкая, загадкавая графіка... І тут жа — відочная, матэрыяльная кераміка, якая працягвае графічныя вобразы, уцялеснівае ў іншым вымярэнні. "Суладдзе«— назва адной з карцін можа ўспрымацца назвай усёй выставы, а таксама дэвізам жыцця двух яе аўтараў, сямейнай мастакоўскай пары Уладзіміра Васюка і Тамары Васюк. У мастацкай галерэі «Універсітэт культуры» ў апошні перадзімні дзень адкрылася іх выстава графікі і керамікі «Творцы», у межах праекта «Лінія і форма». Выстава прымеркаваная адразу да некалькіх сёлетніх юбілеяў: Уладзіміру — 75 гадоў, Тамары — 70, творчы шлях мастакоў складае 50, а яшчэ і залатое вяселле незвычайнай сямейнай пары адзначаецца.


Па іх выставе можна хадзіць бясконца, разгадваючы сімвалы, а яшчэ наталяючыся беларускасцю, адсылкамі да гісторыі. Вось ваза, у якой угадваюцца абрысы пані з сармацкіх партрэтаў, графіка, прысвечаная свету паэзіі Алеся Пісьмянкова, вось кампазіцыя, сімвалізуючая лёс беларускай мовы... А вось самы беларускі сімвал, пад назвай «Татэм»... Як вы думаеце, што? Мілы гліняны кабанчык дагары нагамі! Сала, вёска, аўтэнтыка... Адразу ўспамінаецца і «Смаленне вепрука» Міхася Стральцова, і «Дзяльба кабанчыка» Віктара Карамазава... Непаўторны беларускі гумар, іронія, часам мяккая, часам горкая — тое, што робіць працы абодвух творцаў такімі запамінальнымі.

Брэндам беларускага сучаснага мастацтва назваў унікальны творчы тандэм падчас цырымоніі адкрыцця выставы генеральны дырэктар Нацыянальнага мастацкага музея Беларусі Уладзімір Пракапцоў.

— Канешне, кожны з іх працуе ў сваім накірунку, але іх яднае адно: любоў да сваёй радзімы, да сваіх каранёў.

Абодва сужонцы шмат гадоў перадаюць сваё майстэрства маладым. Уладзімір Васюк — у Беларускай акадэміі мастацтваў, Тамара Васюк — у Беларускім універсітэце культуры. Прадстаўнікі абодвух навучальных устаноў павіншавалі калег, распавялі пра іх дасягненні як педагогаў — абодва людзі не толькі вялікага таленту, але і шчодрай душы і вялікай дабрыні. Падкрэсліла высокі ўзровень творчасці юбіляраў намеснік старшыні Беларускага саюза мастакоў Наталля Шаранговіч.

— Мастак намалюе неба,

і неба праз міг — жыве,

і воблакаў белых срэбра

спакойна праз дзень плыве... — дадаў творам выставы яшчэ адно вымярэнне сваімі вершамі намеснік дырэктара выдавецтва «Мастацкая літаратура» — галоўны рэдактар часопіса «Полымя» паэт Віктар Шніп.

У хуткім часе плён працы творчага тандэму можна будзе пабачыць на выставе ў Нацыянальным мастацкім музеі.

Людміла ІВАНОВА

Фота аўтара

Выбар рэдакцыі

Грамадства

Мабільны дадатак Фонду сацыяльнай абароны насельніцтва раскажа пра будучую пенсію

Мабільны дадатак Фонду сацыяльнай абароны насельніцтва раскажа пра будучую пенсію

Спампаваўшы яго, можна даведацца інфармацыю аб будучай пенсіі: ваш страхавы стаж, найменні работадаўцаў і час, які вы ў іх адпрацавалі, узносы, якія выплачвае работадавец.

Здароўе

Новыя тэхналогіі супраць раку. Анколагі расказалі, як лечаць пацыентаў, якія раней лічыліся неперспектыўнымі

Новыя тэхналогіі супраць раку. Анколагі расказалі, як лечаць пацыентаў, якія раней лічыліся неперспектыўнымі

Вядучыя анколагі расказалі пра новыя метады лячэння, якія яшчэ нядаўна былі недаступныя, а сёння выратоўваюць жыцці пацыентам.

Грамадства

Як жывуць і каго чакаюць у госці жыхары адрэзанай вадой Палянаўкі

Як жывуць і каго чакаюць у госці жыхары адрэзанай вадой Палянаўкі

Працягваем сачыць за развіццём паводкавай сітуацыі.

Калейдаскоп

100 гадоў Леаніду Шчамялёву. Як добра вы ведаеце жыццё і творчасць мастака? Тэст

100 гадоў Леаніду Шчамялёву. Як добра вы ведаеце жыццё і творчасць мастака? Тэст

Леанід Дзмітрыевіч стаў сапраўдным класікам беларускага жывапісу.