Вы тут

Як стаць легальным Дзедам Марозам і зарабіць на навагодніх святах


Ужо зусім мала часу засталося да таго моманту, калі на плошчах будуць прыгожа зіхацець святочным убраннем ёлкі, на вуліцах заззяюць навагоднія гірлянды, а на календары сустрэнуцца апошняя і першая лічбы адыходзячага і надыходзячага гадоў — 31 снежня і 1студзеня. У такія дні традыцыйна запатрабаванымі з’яўляюцца такія паслугі, як віншаванне з навагоднімі святамі і Калядамі ад Дзеда Мароза, яго ўнучкі Снягуркі і іншых казачных персанажаў, якія дапамагаюць зрабіць святы незабыўнымі, яркімі і падораць выдатны настрой і радасныя моманты чакання Новага года і Каляд. Акрамя таго, напярэдадні святаў павышаным попытам карыстаюцца і такія віды паслуг, як фота- і відэаздымка падзей, цырульніка, і касметолага, паслугі па манікюры і педыкюры, выступленні акцёраў, танцораў, музыкантаў, выканаўцаў размоўнага жанру, выступоўцаў індывідуальна, тамады і іншыя святочныя паслугі, якія можна ажыццяўляць па заяўным прынцыпе без рэгістрацыі ў якасці індывідуальнага прадпрымальніка.


Фота: pixabay.com

—Творчыя і таленавітыя людзі, якія прапануюць святочныя паслугі, павінны ведаць, што такую дзейнасць яны могуць ажыццяўляць толькі пасля аплаты адзінага падатку, — расказалі ў Інспекцыі па падатках і зборах па Мінскай вобласці. Так, напярэдадні мерапрыемстваў грамадзяне, якія плануюць на святы стаць галоўнымі дзеючымі асобамі дзіцячых ранішнікаў і карпаратываў, павінны падаць у падатковы орган пісьмовае паведамленне, у якім трэба ўказаць, дзе і калі будзе ажыццяўляцца такая дзейнасць. Дарэчы, для гэтага неабавязкова ісці ў падатковую інспекцыю; такое паведамленне можна адправіць праз асабісты кабінет плацельшчыка, седзячы дома на канапе. У сваю чаргу, падатковы інспектар, атрымаўшы гэтае паведамленне, разлічыць суму адзінага падатку ў залежнасці ад месца ажыццяўлення дзейнасці, стаўкі падатку і наяўнасці льгот. Грамадзянін і сам можа даведацца пра суму падатку ў тым рэгіёне, дзе ён плануе ажыццяўляць дзейнасць. Для гэтага трэба проста патэлефанаваць на кароткі нумар 189, і спецыялісты кантакт-цэнтра падатковых органаў падрабязна растлумачаць, якія крокі пры выплаце адзінага падатку неабходна зрабіць самазанятаму грамадзяніну — будучаму Дзеду Марозу або казачнаму персанажу. 

Пры аказанні некалькіх з пералічаных вышэй паслуг з рознымі стаўкамі падатка адзіны падатак будзе выплачваць па найбольшай стаўцы. Адпаведна калі стаўкі па розных відах дзейнасці супадаюць, дастаткова будзе заплаціць падатак у памеры адной стаўкі падатку (напрыклад, калі фізічная асоба на працягу аднаго каляндарнага месяца будзе з’яўляцца Снягуркай, музыкантам ці акцёрам). Пры аплаце адзінага падатку фізічныя асобы ў залежнасці ад наяўнасці падстаў маюць права карыстацца льготамі. Так, правам на льготу ў памеры 20 адсоткаў ад сумы падатку (прынаяўнасці адпаведных дакументаў) могуць карыстацца, напрыклад, пенсіянеры па ўзросце, інваліды, бацькі шматдзетных сем’яў, а таксама бацькі, якія выхоўваюць дзяцей-інвалідаў ва ўзросце да 18 гадоў. 

Калі ў плацельшчыка адзінага падатку ёсць права на льготы па некалькіх падставах, то стаўка адзінага падатку будзе зніжана на 45 адсоткаў. Але ёсць і такая катэгорыя плацельшчыкаў, якая вызваляецца ад адзінага падатку пры наяўнасці адпаведных дакументаў, што пацвярджаюць такое права — гэта плацельшчыкі-бацькі (усынавіцелі, удачарыцелі), якія з’яўляюцца інвалідамі I і II груп і выхоўваюць непаўналетніх дзяцей або дзяцей, якія атрымліваюць адукацыю на дзённай форме навучання. Памер льготы па адзіным падатку для такіх грамадзян, якія плануюць зарабіць на навагодніх і іншых святах, складае 100 адсоткаў.

Акрамя таго, у інспекцыі падкрэслілі, што фізічныя асобы, якія працуюць па заяўным прынцыпе, у месцы аказання паслуг павінны мець дакумент аб выплаце адзінага падатку. І няхай святы запомняцца ўсім не толькі навагоднімі падарункамі, цудам, святочным настроем, эмоцыямі і радасцю, але і прынясуць грамадзянам, якія дапамагаюць зрабіць іх незабыўнымі і яркімі, дадатковыя даходы.

Таццяна ЛАЗОЎСКАЯ

Выбар рэдакцыі

Грамадства

Як жывуць і каго чакаюць у госці жыхары адрэзанай вадой Палянаўкі

Як жывуць і каго чакаюць у госці жыхары адрэзанай вадой Палянаўкі

Працягваем сачыць за развіццём паводкавай сітуацыі.

Калейдаскоп

100 гадоў Леаніду Шчамялёву. Як добра вы ведаеце жыццё і творчасць мастака? Тэст

100 гадоў Леаніду Шчамялёву. Як добра вы ведаеце жыццё і творчасць мастака? Тэст

Леанід Дзмітрыевіч стаў сапраўдным класікам беларускага жывапісу.