Вы тут

Як школьнікі неслі Ганаровую Вахту Памяці ля Вечнага агню на плошчы Перамогі


З 7 па 10 снежня Ганаровую Вахту Памяці на пасту № 1 ля Вечнага агню на плошчы Перамогі сталіцы Беларусі нёс зводны мемарыяльны атрад, у склад якога ўвайшлі навучэнцы мінскіх устаноў адукацыі: гімназіі № 34 і сярэдняй школы № 48 ім. Ф. А. Малышава.


Падрыхтоўка дваццаці пяці юнакоў і дзяўчат уключала ў сябе правядзенне тэматычных класных і інфармацыйных гадзін па вывучэнні гісторыі паста № 1, горада Мінска, барацьбы ў гады Вялікай Айчыннай вайны юных герояў, партызан і падпольшчыкаў Беларусі. Таксама вывучаўся тэарэтычны матэрыял па нясенню Вахты Памяці, праводзіліся вучэбныя заняткі па страявой падрыхтоўцы.

Па прыбыцці на пост № 1 удзельнікі мемарыяльнага атрада прынялі ўрачыстую клятву ганаровай варты паста № 1 горада-героя Мінска.

9 снежня, у Міжнародны дзень памяці ахвяр злачынства генацыду, мемарыяльны атрад у поўным саставе на плошчы Перамогі прыняў удзел у хвіліне маўчання.

У адзін з дзён сваіх падапечных наведалі дырэктар гімназіі № 34 Зінаіда Міхайлава, дырэктар сярэдняй школы № 48 ім. Ф. А. Малышава Ларыса Стецкая.

Начальнік штаба паста № 1 горада-героя Мінска Сяргей Быкаў, які ўзначальвае штаб без малога пятнаццаць гадоў, распавёў чытачам партала Выдавецкага дома «Звязда»: «У першы дзень Вахты Памяці хлопцы апыняюцца ў новай абстаноўцы, псіхалагічна ім складана. Задача мая і суправаджаючых педагогаў — у самыя кароткія тэрміны дапамагчы маладым людзям адаптавацца, навучыць іх практычнаму выкананню сваіх абавязкаў, і тут не абысціся без метаду «рабі, як я». Таму мы паказваем і расказваем удзельнікам мемарыяльнага атрада ўсё, пачынаючы ад правілаў нашэння формы адзення, устаноўленага звароту да адзін аднаму і начальніку і заканчваючы дзеяннямі на пасту № 1.

У другі дзень пытанняў становіцца ўжо менш, на трэці дзень адбываецца замацаванне практычных навыкаў. А ў чацвёрты, заключны дзень, пасля заканчэння нясення вахты памяці мы падводзім вынікі, адзначаем лепшых. Кожны атрад выпускае Баявы лісток і афармляе асобны разварот, прысвечаны нясенню Вахты Памяці, у спецыяльным альбоме.

Элементы рытуалу на пасту № 1 былі распрацаваны ў 1984 годзе і застаюцца практычна нязменнымі да сённяшняга дня. 

У апошні час былі распрацаваны новыя напрамкі нашай сумеснай дзейнасці з установамі адукацыі: пошук «пастоўцаў» сваёй школы, якія неслі Вахту Памяці ў мінулыя гады, афармленне альбома па выніках пошукавай працы. А таксама кірунак «Па месцах баявой славы», які прадугледжвае распрацоўку не менш двух экскурсій па мясцінах, звязаных з ушанаваннем памяці абаронцаў Радзімы, пры гэтым «пастоўцы» прымаюць непасрэдны ўдзел у правядзенні рытуалаў.

У гэтым годзе выхаванцы паста № 1 сталі ўдзельнікамі праектаў: «Міжнародная Вахта памяці» ў Санкт-Пецярбургу (у сакавіку 2022 г.), «Міжнародная Вахта памяці» ў пасёлку Ідрыцы Себежскага раёна Пскоўскай вобласці (красавік 2022 г.), у Пскове (май 2022 г.)«.

— Для мяне нясенне Вахты памяці хвалюючая падзея. Гэта давер да мяне як да чалавека. І бацькі цалкам падтрымалі мяне ў маім рашэнні прыняць удзел у гэтым знакавым мерапрыемстве. Знаходзячыся на пасту № 1, я выразна адчула дачыненне да гісторыі маёй краіны, — падзялілася сваімі эмоцыямі «паставец», навучэнка 10 «Б» класа сярэдняй школы № 48 ім. Ф. А. Малышава Улада Агеенка.

Віктар ІВАНЧЫКАЎ

Фота аўтара

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.

Гандаль

Кандытарскія вырабы — брэнд беларускай харчовай прамысловасці

Кандытарскія вырабы — брэнд беларускай харчовай прамысловасці

Напярэдадні Міжнароднага сімпозіума кандытараў эксперты расказалі аб планах і перспектывах кандытарскай галіны.

Сям'я і дэмаграфія

Святлана Клачкова: Чым больш дзяцей, тым больш любові

Святлана Клачкова: Чым больш дзяцей, тым больш любові

Як жа шматдзетная сям’я спраўляецца з хатнімі клопатамі?