Сучасны адпачынак на дарозе павінен быць зручным, бяспечным і якасным для розных катэгорый падарожнікаў: дарослых, дзяцей і жывёл, таму прыдарожны сэрвіс развіваецца адпаведна з пажаданнямі наведвальнікаў, сцвярджаюць спецыялісты транспартнай галіны. Яны расказалі, што могуць атрымаць вандроўнікі на аб'ектах уздоўж трас краіны.
Патрабаванні па размяшчэнні аб'ектаў і іх архітэктурным напаўненні вызначаюцца шэрагам дакументаў. У прыватнасці, была прынятая Генеральная схема развіцця прыдарожнага сэрвісу на рэспубліканскіх дарогах на 2021—2025 гады.
— У дакуменце ўказаны аб'екты, якія існуюць, праектуюцца і будуюцца, а таксама тыя, якія прапануюцца для размяшчэння. Схема ўзгоднена з аблвыканкамамі, каб у дакуменце былі адлюстраваны тыя ўчасткі ўздоўж дарог, дзе няма абмежаванняў, звязаных з выключэннем зямель сельскагаспадарчага і ляснога карыстання. Гэта зручна і для інвестараў, якія могуць па схеме выбраць упадабаны кавалак дарогі і ў межах аднаго кіламетра вызначыцца, дзе яны захочуць збудаваць новы аб'ект, — расказаў Сяргей ЛЯВОНЧЫК, начальнік упраўлення развіцця аўтамабільных дарог галоўнага ўпраўлення аўтамабільных дарог Міністэрства транспарту і камунікацый.
Сумесна з Міністэрствам спорту і турызму транспартнікі манітораць і аналізуюць існуючыя аб'екты. Многія аб'екты ўражваюць асартыментам і колькасцю тавараў, а новыя і рэканструяваныя запраўкі аб'яднання «Беларуснафты» зручныя для наведвальнікаў сваім стандартызаваным уладкаваннем. У гандлёвых залах тут на звыклых месцах змяшчаюцца касы і кавааўтаматы, а ўваход у санітарную зону добра відаць адусюль, дадаў прадстаўнік Мінтранса.
У межах праграм Саюзнай дзяржавы спецыялісты прааналізавалі нормы і стандарты, якія дзейнічаюць у дачыненні да прыдарожнага сэрвісу ў Расіі і Беларусі, і сфарміравалі табліцу, дзе прапісалі ўсе асаблівасці і нюансы. Аднак у большасці ўсе гэтыя нормы ідэнтычныя ў абедзвюх краінах, а вопыт развіцця прыдарожнага сэрвісу Беларусі пераймаюць рэгіёны Расіі.
575 аўтазаправак «Беларуснафты» размеркаваны па ўсёй краіне, і тут прапануюцца розныя паслугі, якія могуць спатрэбіцца аўтамабілісту на шляху, запэўніў Юрый АНАНЧАНКА, начальнік упраўлення нафтазабеспячэння аб'яднання «Беларуснафта»:
— Гэта і разнастайныя тэхнічныя і харчовыя тавары, падкачка шын, пыласосы і нават асобныя пункты па шынамантажы, якія месцяцца на тэрыторыі нашых аўтазаправак. Новыя станцыі мы стараемся будаваць у найбольш запатрабаваных на трасах месцах. Увага ўдзяляецца таксама магчымасці паркавацца велікагрузам — зроблена 20 пляцовак для караванераў.
Паколькі «Беларуснафта» з'яўляецца дзяржаўным аператарам па электразарадках, на 600 запраўках ужо можна зарадзіць электрамабілі. Яшчэ 33 будуць збудаваны да канца 2022-га, і электразаправачныя станцыі развіваюцца адпаведна магчымасцям, якія ёсць у пэўных рэгіёнах па падключэнні. Напрыклад, плануецца будаўніцтва дзвюх электразарадных станцый у раёне Лагойска, а ў 2023-м з'явіцца электразапраўка ў Глыбокім.
Гандлёвыя залы на запраўках сталічнага рэгіёна сёлета актыўна мадэрнізуюцца (удасканалены чатыры аб'екты), і налета гэтая работа працягнецца яшчэ на шасці, дадаў Максім РАДАБОЛЬСКІ, намеснік дырэктара па рознічным гандлі прадпрыемства «Беларуснафта-Мінскаўтазапраўка»:
— Лепш прадставяць асартымент прадукцыі агульнага харчавання і лінейку спадарожных тавараў. Будуць зручныя месцы, каб падсілкавацца, а на прыдарожных аб'ектах — прыняць душ ці зарадзіць электрамабіль.
У Беларусі існуюць рэкамендаваныя адлегласці размяшчэння заправачных станцый для розных катэгорый дарог (40—50 кіламетраў), аднак яны неабавязковыя і выконваць іх на шкоду рэнтабельнасці і прыбытку не варта, адзначыў Сяргей Лявончык:
— Калі аўтамабіліст рухаецца па аўтабане, скажам, у Германіі, то ён праязджае гэтыя 60 кіламетраў за 20 хвілін. Вядома ж, у яго няма патрэбы рабіць прыпынкі кожныя 20 хвілін. У Беларусі свае дазволеныя хуткасныя рэжымы, таму і запраўкі будуюцца на адпаведных ім адлегласцях. Пры будаўніцтве новай запраўкі вельмі сур'ёзна мадэлююцца патокі транспарту ў прывязцы да пэўнага рэгіёна, існуючай запраўкі, інтэнсіўнасці руху. Таму на ўсіх дарогах будаваць такія аб'екты часта не трэба.
Існуюць пэўныя катэгорыі, мінімальныя патрабаванні, сацыяльныя стандарты — гэтага дастаткова. А кожны рэгіён у сваіх патрэбах абапіраецца на запыты людзей. Насельніцтва прывыкае да іх размяшчэння, і, нават калі аб'ект закрываецца на рэканструкцыю, побач абавязкова ставіцца модульная запраўка, каб паслугі аказваліся, дадаў ён.
Наладжваць узаемадзеянне аўтазаправак з мясцовымі жыхарамі, якія маглі б прапаноўваць на рэалізацыю сваю прадукцыю з уласнага ўчастка, не плануецца, кажуць спецыялісты.
— На запраўках прапануюцца рэальна запатрабаваныя тавары, якія неабходныя ў дарозе. А на прадукцыю патрабуюцца сертыфікаты, якія пацвярджалі б яе бяспечнасць, а таксама месца і ўмовы для захоўвання. Ланцужок па прыёмцы тавару, яго рэалізацыі і адказнасці за якасць жорстка рэгламентаваны, таму проста прыняць ад некага прадукцыю і гандляваць ёю немагчыма, — канстатаваў Максім Радабольскі. — Да таго ж існуюць патрабаванні да наяўнасці пэўнага тавару: ён або павінен знаходзіцца на паліцы, або не.
З іншага боку, прыдарожныя комплексы скіраваны прымаць і задавольваць патрэбы ўсіх наведвальнікаў, таму ствараюцца ўмовы для баўлення часу малых і магчымасці для знаходжання хатніх гадаванцаў. Гульнявая зона для дзяцей, якая знаходзіцца на вуліцы, павінна быць агароджана і мець толькі адзін уваход, каб бацькі кантралявалі, дзе іх малы.
Новыя аб'екты прыдарожнага сэрвісу можна ўбачыць на сайце ў інтэрнэце і там жа задаць пытанне і ўнесці прапанову. Адной з запатрабаваных паслуг з'яўляецца наяўнасць месца для арганізацыі сустрэч. На запраўцы ў аэрапорце, напрыклад, ужо ёсць невялікая зала чалавек на дзесяць, дзе можна правесці канферэнцыю, і ёй карыстаюцца, удакладніў Юрый Ананчанка:
— Там ёсць магчымасць падключыцца да інтэрнэту, правесці нейкую прэзентацыю. Мы бачым, што часта на запраўках проста ў зале кафетэрыя, калі там няма асобнага памяшкання, людзі садзяцца за столікі, адкрываюць ноўтбукі і нешта абмяркоўваюць. Здараюцца і наведвальнікі, адзін з якіх мясцовы, а другі рухаецца па трасе, і яны ладзяць сустрэчу на запраўках. Гэта ўжо запатрабаваная рэальнасць, таму каля столікаў арганізавана магчымасць зарадкі тэлефонаў і ноўтбукаў.
Спецыялісты запэўнілі, што колькасць паслуг і надалей будзе павялічвацца адпаведна патрэбам спажыўца.
Ірына СІДАРОК
Восень для спецыялістаў аграрнай галіны — час падводзіць вынікі, і сёлета яны годныя.
6 кастрычніка архівісты адзначылі сваё прафесійнае свята.
У поўным аб’ёме задаволена патрэба краіны ў калійных і каменных солях, торфе, сапрапелі, будаўнічым камені, падземных водах.
