Вы тут

Ці магчыма ахова прыроды без дыялогу?


Рэспубліка Беларусь з'яўляецца ўдзельніцай 22 міжнародных дагавораў, якія рэгулююць супрацоўніцтва дзяржаў у галіне аховы навакольнага асяроддзя, рацыянальнага (устойлівага) выкарыстання прыродных рэсурсаў і змякчэння наступстваў змены клімату. Але апошнім часам наша краіна сутыкаецца з пэўнымі складанасцямі дыялогу на міжнародных пляцоўках. Чаму так адбываецца, расказала намеснік начальніка галоўнага ўпраўлення экалагічнай палітыкі, міжнароднага супрацоўніцтва і навукі, начальнік аддзела міжнароднага супрацоўніцтва Мінпрыроды Ларыса Лукіна.


— Наша дзяржава заўсёды добрасумленна і ў поўнай меры выконвае ўсе ўзятыя на сябе міжнародныя абавязацельствы, — падкрэслівае Ларыса Лукіна. — Гэта значыць, што Беларусь удасканальвае сваё прыродаахоўнае заканадаўства і ўносіць змены ў дзейнасць сваіх органаў дзяржкіравання, бізнес-колаў, акадэмічнай супольнасці і іншых зацікаўленых. Усё гэта патрабуе вялікай работы з боку дзяржавы.

Удзел нашай краіны ў рабоце міжнародных пляцовак ставіць за мэту наступнае: па-першае, беларускія прадстаўнікі прасоўваюць і абараняюць нацыянальныя інтарэсы, а, па-другое, бяруць удзел у фарміраванні правілаў гульні на міжнароднай арэне ў галіне аховы навакольнага асяроддзя.

Актыўны ўдзел у рабоце міжнародных арганізацый і органах міжнародных дагавораў садзейнічае таму, што Беларусь з'яўляецца адной з дзяржаў — заканадаўцаў у фарміраванні трэндаў і тэндэнцый развіцця міждзяржаўнага супрацоўніцтва ў прыродаахоўнай сферы.

Разам з тым, паводле слоў прадстаўніцы Мінпрыроды, апошнія два гады Беларусь сутыкнулася з беспрэцэдэнтнай палітызацыяй усіх пытанняў міждзяржаўнага супрацоўніцтва, у тым ліку ў галіне аховы навакольнага асяроддзя. З-за ўвядзення аднабаковых абмежавальных мер, спроб выключэння дзяржавы з работы органаў міжнародных дагавораў парушаецца ўніверсальны характар міжнароднага супрацоўніцтва, вырашэнне экалагічных пытанняў сыходзіць на другі план. Выключэнне любой дзяржавы з міждзяржаўнага супрацоўніцтва прыводзіць да зніжэння эфектыўнасці намаганняў, якія прадпрымаюцца. Пытанні аховы навакольнага асяроддзя практычна заўсёды носяць трансгранічны характар, а экасістэмы залежаць адна ад адной. І дзяржаве ці групе краін з абмежаваным удзелам комплексна і эфектыўна рашыць такія праблемы немагчыма,

— Цяпер пытанні аховы навакольнага асяроддзя выкарыстоўваюцца як інструмент ціску і ўмяшання ва ўнутраныя справы дзяржавы, — кажа Ларыса Лукіна. — Яркім прыкладам гэтаму служыць апошняе пасяджэнне органаў і нарады бакоў Орхускай канвенцыі, калі Рэспубліку Беларусь абвінавачвалі ў парушэнні палажэнняў міжнароднага дагавора. Пры гэтым аргументы і доказы беларускага боку не прымаліся да ўвагі. Больш за тое, падчас нарады дзяржаў — удзельніц Орхускай канвенцыі калектыўным Захадам была зроблена спроба ўмяшацца ва ўнутраныя справы суверэннай дзяржавы, што катэгарычна забаронена нормамі міжнароднага права, і прымусіць Беларусь змяніць сваю знешнюю палітыку, каб дагадзіць калектыўнаму Захаду. Зразумела, Беларусь не магла дапусціць такога развіцця сітуацыі і прыняла рашэнне выйсці з Орхускай канвенцыі.

Яшчэ адным абуральным прыкладам палітызацыі экалагічнага парадку спецыяліст называе адсутнасць адэкватнай рэакцыі міжнародных арганізацый і органаў міжнародных дагавораў на сітуацыю, выкліканую ўзвядзеннем загараджальнага збудавання Рэспублікай Польшча ўздоўж беларуска-польскай мяжы, у тым ліку на тэрыторыі аб'екта Сусветнай спадчыны ЮНЕСКА «Белавежская пушча».

Прадстаўнікі краіны на пляцоўках ЮНЕСКА, ЮНЕП, Савета Еўропы, Еўрапейскай эканамічнай камісіі ААН у ходзе пасяджэнняў органаў міжнародных дагавораў звярталі ўвагу на ўсе неспрыяльныя наступствы, з якімі сутыкаецца Белавежская пушча з-за разрыву адзінага трансгранічнага прыроднага аб'екта, а таксама на стан яе экалагічных сістэм, які выклікае хваляванне спецыялістаў.

— Неаднаразова беларускія прадстаўнікі запрашалі міжнародныя экспертныя місіі наведаць Белавежскую пушчу і сваімі вачыма ацаніць тую сітуацыю, якая была створана неабдуманымі палітызаванымі дзеяннямі польскага боку, — падкрэслівае прадстаўніца прыродаахоўнага ведамства. — Аднак зразумелага адказу мы не атрымалі. Вымушаны канстатаваць, што цяпер мы назіраем сапраўдны крызіс міжнародных намаганняў у галіне аховы навакольнага асяроддзя ў сувязі з палітызацыяй гэтай сферы міждзяржаўных адносін. І ён не можа быць вырашаны самавольным выключэннем асобных дзяржаў з міжнароднага дыялогу.

Таццяна ІВАНОЎСКАЯ

Прэв’ю: pixabay.com

Выбар рэдакцыі

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі. 

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.