Вы тут

Вызначыліся пераможцы прававога турніру «Сіла закона»


Фінальнае інтэлектуальнае спаборніцтва прайшло на базе юрыдычнага факультэта БДУ і аб’яднала вучняў 9-11-х класаў — пераможцаў раённых, абласных і Мінскага гарадскога тураў праекта, прысвечанага Канстытуцыі Рэспублікі Беларусь.


За першынство змагаўся 21 старшакласнік (па адным прадстаўніку ад кожнай вобласці і сталіцы ў сваіх узроставых катэгорыях). Дарэчы, геаграфія ўдзельнікаў аказалася дастаткова шырокая: Баранавічы, Драгічын, Шаркаўшчына, Орша, Ашмяны, Ліда, Гомель, Лоеў, аграгарадок Ціхінічы Рагачоўскага раёна, Клімавічы, Круглае, Лагойск, Любань, Крупкі і, канешне, Мінск.

У фінале ўдзельнікам турніру трэба было за 60 хвілін у фармаце анлайн-тэсціравання на Дзіцячым прававым сайце адказаць на 30 пытанняў, якія датычацца Канстытуцыі Беларусі і яе гісторыі.

Прызавыя месцы ў турніры размеркаваліся наступным чынам. Першае месца занялі вучань 9 класа Плешчаніцкай сярэдняй школы № 1 Лагойскага раёна Барыс Буцько, вучань 10 класа любанскай сярэдняй школы № 3 Максім Пляханаў і вучаніца 11 класа баранавіцкай сярэдняй школы № 9 Анастасія Цыуньчык.

На другой пазіцыі размясціліся вучаніца 9 класа ашмянскай сярэдняй школы № 3 Лізавета Лабачэўская, вучань 10 класа гомельскай сярэдняй школы № 26 Аляксандр Андык і вучаніца 11 класа Лоеўскай раённай гімназіі Анастасія Куцарэнка.

«Бронза» прававога турніру — у дзевяцікласніка Германавіцкай сярэдняй школы Шаркаўшчынскага раёна Глеба Свілёнка, дзесяцікласніцы гімназіі Драгічына Крысціны Гарадзецкай і адзінаццацікласніка сярэдняй школы № 1 горада Круглае Аляксандра Мініна. Пераможцы (кожны ў сваёй узроставай катэгорыі) былі ўзнагароджаны дыпломамі I, II, III ступені, сертыфікатамі доступу да інфармацыйна-пошукавай сістэмы «ЭТАЛОН-ONLINE», а таксама каштоўнымі падарункамі ад арганізатараў і партнёраў праекта. Узнагароджанне адбылося ў Музеі беларускай дзяржаўнасці.

Моладзь зацікаўлена ў прававой асвеце, заявіў журналістам другі сакратар Цэнтральнага камітэта БРСМ Аляксандр Прохараў

Другі сезон прававога турніру стартаваў 1 снежня 2022 года і быў прымеркаваны да Дня юрыста. У праекце прынялі ўдзел 25 626 старшакласнікаў. Арганізатарамі турніру «Сіла закона» выступілі Нацыянальны цэнтр прававой інфармацыі (НЦПІ) і Беларускі рэспубліканскі саюз моладзі сумесна з Міністэрствам адукацыі пры падтрымцы БДУ, Беларускага рэспубліканскага саюза юрыстаў, Беларускай рэспубліканскай калегіі адвакатаў і Інстытута павышэння кваліфікацыі і перападрыхтоўкі Следчага камітэта.

«Гэта прафесійна арыентаванае мерапрыемства насамрэч вельмі важнае для моладзі, — падзяліўся сваімі думкамі намеснік дырэктара Нацыянальнага цэнтра прававой інфармацыі Вячаслаў Бекета. — Падчас абласных этапаў старшакласнікі пабывалі ва ўніверсітэтах на юрыдычных факультэтах. Найлепшыя з іх прыехалі ў Мінск на фінальны тур, які прайшоў на базе юрыдычнага факультэта БДУ. Думаю, яны захочуць абавязкова вярнуцца і стаць студэнтамі гэтай ВНУ. Наш цэнтр праводзіць шмат мерапрыемстваў, накіраваных на павышэнне прававой культуры і стымуляванне маладых людзей да вывучэння законаў нашай дзяржавы. Яны павінны ведаць і разумець свае правы, але і не забываць аб адказнасці. НЦПІ курыруе дзяржаўны інфармацыйна-прававы рэсурс для дзяцей — Дзіцячы прававы сайт. Дзякуючы яму школьнікі маюць магчымасць азнаёміцца з правам, атрымаць актуальныя веды, а таксама паўдзельнічаць у тэматычных гульнях і конкурсах».

«Моладзь зацікаўлена ў прававой асвеце, — лічыць другі сакратар Цэнтральнага камітэта БРСМ Аляксандр Прохараў. — Колькасць удзельнікаў турніру расце, пашыраецца іх геаграфія, павышаецца ўзровень ведаў і падрыхтоўкі канкурсантаў. І гэта не з’яўляецца для нас нейкім адкрыццём. У ходзе шырокамаштабнай работы па абмеркаванні праекта Канстытуцыі Беларусі на дыялогавых пляцоўках і праекта закона аб Усебеларускім народным сходзе моладзь, старшакласнікі — навучэнцы ўстаноў агульнай сярэдняй адукацыі — былі ў авангардзе. Яны былі па-сапраўднаму актыўныя, ад іх паступіў шэраг канкрэтных і канструктыўных прапаноў па дадзеных пытаннях.

Часта моладзь ведае свае правы, але не ведае свае абавязкі. Сёння мы выхоўваем прававую культуру ў маладых грамадзян. Як гаворыцца, папярэджаны — значыць, узброены. Увогуле неабходна адзначыць, што сумесна з НЦПІ, Міністэрствам адукацыі і іншымі зацікаўленымі мы ставім перад сабой задачу далейшага актыўнага развіцця гэтага напрамку...»

Надзея НІКАЛАЕВА

Фота БРСМ

Выбар рэдакцыі

Жыллё

Па якіх крытэрыях дамы ўваходзяць у праграму па капрамонце?

Па якіх крытэрыях дамы ўваходзяць у праграму па капрамонце?

Пра ўсе тонкасці правядзення капітальнага рамонту расказалі спецыялісты.

Рэгіёны

Самы працяглы ўрок гістарычнай праўды і сяброўства

Самы працяглы ўрок гістарычнай праўды і сяброўства

Удзельнікі «Цягніка Памяці» папярэдніх гадоў дзеляцца сваімі ўражаннямі ад праекта.

Экалогія

Якія прагнозы на лета робяць метэаролагі?

Якія прагнозы на лета робяць метэаролагі?

Тры месяцы суцэльнай спякоты нам не абяцаюць

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.