З 25 снежня да 8 студзеня вучоба беларускіх школьнікаў пастаўлена на паўзу. Зімовы адпачынак абяцае быць цікавым, насычаным і бяспечным. Аб гэтым паклапаціліся педагогі...
З 15 снежня ў краіне стартавала дабрачынная акцыя «Нашы дзеці». А з 26 да 31 снежня будзе рэалізаваны маштабны анлайн-праект «Ліст Зюзю». «Яго ўдзельнікам прапануецца вывучыць гісторыю і культуру правядзення навагодніх і калядных свят на тэрыторыі нашай краіны, а затым падрыхтаваць уласны ліст беларускаму Дзеду Марозу», — расказала кансультант упраўлення сацыяльнай, выхаваўчай і ідэалагічнай работы Міністэрства адукацыі Наталля ЧААБ.
Яна адзначыла, што ў перыяд зімовых канікул пры арганізацыі вольнага часу дзяцей асаблівая ўвага будзе ўдзяляцца ідэалагічнаму і грамадзянска-патрыятычнаму выхаванню. З дзецьмі, якія патрабуюць павышанай увагі, знаходзяцца ў сацыяльна небяспечным становішчы, будзе праводзіцца індывідуальная прафілактычная работа. Пры рабоце над праграмай на канікулярны перыяд улічваліся пажаданні саміх дзяцей і іх бацькоў, таму на канікулах пройдзе шмат фізкультурна-аздараўленчых і спартыўна-масавых мерапрыемстваў, дзён здароўя і фестываляў.
«Калі гаварыць аб бяспецы школьнікаў, то на канікулах будуць праведзены рэйды па выяўленні стыхійных месцаў катання з горак, каб мінімізаваць патэнцыяльныя траўмы. Акрамя таго, з прадстаўнікамі АСВОДа праводзяцца мерапрыемствы па навучанні дзяцей бяспечнаму знаходжанню на лёдзе», — дадала Наталля Чааб.
Установы дадатковай адукацыі дзяцей і моладзі рэспубліканскага і рэгіянальнага ўзроўню правядуць для школьнікаў на зімовых канікулах мноства мерапрыемстваў, у тым ліку экскурсіі і выстаўкі. Пра гэта расказала журналістам начальнік упраўлення сацыяльнай і выхаваўчай работы Акадэміі паслядыпломнай адукацыі Алена МІХАЛЕВІЧ.
29 і 30 снежня ў Мінску пройдзе Маладзёжны форум выпускнікоў Нацыянальнага дзіцячага тэхнапарка. Тэхнапарк арганізуе ў канікулярны перыяд для вучняў рознага ўзросту тэматычныя экскурсіі па выставачных экспазіцыях з элементамі інтэрактыўных гульняў. На яго базе арганізаваны рэспубліканскі конкурс «ТэхнаЁлка». А Рэспубліканскі цэнтр экалогіі і краязнаўства запрашае ўсіх ахвотных на рэспубліканскую выставу-конкурс «Лёд. Кветкі. Фантазія», якая праходзіць з 22 снежня да 20 студзеня.
У Нацыянальным цэнтры мастацкай творчасці дзяцей і моладзі ў перыяд канікулаў будзе прадстаўлена экспазіцыя па выніках рэспубліканскай выставы-конкурсу дэкаратыўна-прыкладной творчасці навучэнцаў «Калядная зорка» (больш як 500 творчых работ). 5 студзеня тут будзе разыграны Рэспубліканскі кубак па інтэлектуальных гульнях сярод школьнікаў «Зіма-2023», у якім возьмуць удзел каля 35 каманд з устаноў агульнай сярэдняй і дадатковай адукацыі — больш як 200 чалавек. А 27 снежня ў фармаце дыскусійнай пляцоўкі адбудзецца пасяджэнне Рэспубліканскага дзіцячага і падлеткавага парламента пры Нацыянальным цэнтры мастацкай творчасці дзяцей і моладзі.
Традыцыйна ў перыяд зімовай перадышкі ад заняткаў для мінскіх школьнікаў будзе арганізавана работа аздараўленчых лагераў, забяспечана магчымасць наведвання спартыўных залаў і камп'ютарных клубаў ва ўстановах адукацыі, а таксама будуць пракладзены лыжныя трасы, заліты каткі і падрыхтаваны хакейныя каробкі.
— Работа аздараўленчых лагераў з кругласутачнай і дзённай формамі знаходжання арганізоўваецца для сталічных школьнікаў на зімовых канікулах з году ў год. І гэтыя канікулы не стануць выключэннем, — запэўнівае начальнік аддзела выхаваўчай і ідэалагічнай работы камітэта па адукацыі Мінгарвыканкама Ганна РЫСЯВЕЦ. — Акрамя лагераў на базе ўстаноў адукацыі будуць працаваць чатыры загарадныя аздараўленчыя лагеры: «Палітэхнік», «Гарызонт», «Барок» ААТ «МАПІД» і лагер Белпошты «Дружба». Арганізатары распрацавалі для выхаванцаў адпаведныя праграмы па розных профілях. Лагеры з кругласутачнай і дзённай формамі знаходжання прымуць больш як 11,5 тысячы дзяцей.
Як адзначыла Ганна Рысявец, у перыяд зімовых канікул установы адукацыі прадоўжаць працаваць у штатным рэжыме, і ўся інфраструктура школ будзе прапанавана дзецям. Навучэнцаў чакаюць не толькі спартыўныя гульні, але і забаўляльная праграма.
У рамках дабрачыннай акцыі «Нашы дзеці» ўсе сталічныя школы правядуць навагоднія святы, а ўстановы дадатковай адукацыі распрацавалі свае навагоднія пастаноўкі паводле казак. У Мінску запланавана больш як 700 розных святочных мерапрыемстваў для школьнікаў і іх бацькоў. Сярод самых яскравых можна згадаць рэспубліканскі навагодні баль для навучэнскай і студэнцкай моладзі, які пройдзе 28 снежня ў Палацы Незалежнасці. Не пакіне школьнікаў абыякавымі і галоўная ёлка краіны, запланаваная на 29 снежня.
Таксама навучэнцам сталічных устаноў адукацыі будуць прапанаваны экскурсійныя праграмы, у тым ліку прафарыентацыйнай накіраванасці. Школьнікі на зімовых канікулах змогуць наведаць вядучыя прадпрыемствы краіны і пазнаёміцца з флагманамі беларускай эканомікі.
Што датычыцца другаснай занятасці старшакласнікаў, то, як заўважыла Ганна Рысявец, яна арганізоўваецца круглы год. Да 28 снежня ўстановы адукацыі распрацуюць і прадставяць праекты па формах і відах занятасці, а таксама па месцах, якія дадаткова ствараюцца для навучэнцаў, на 2023 год. Найбольшы пік цікавасці да магчымасці падзарабіць традыцыйна прыпадае на май — верасень.
Для асобнай катэгорыі навучэнцаў зімовыя канікулы — гарачы перыяд падрыхтоўкі да наступнага этапа алімпіяд па вучэбных прадметах, які пройдзе з 9 да 13 студзеня на базе 13 устаноў адукацыі сталіцы. У гэтым этапе прымуць удзел каля 1,5 тысячы мінскіх школьнікаў, якія прадоўжаць актыўна рыхтавацца са сваімі кіраўнікамі ў перыяд зімовых канікул.
Надзея НІКАЛАЕВА
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
