Як даглядаць пакаёвыя расліны зімой?

Вядома, кожны вазон унікальны і правілы догляду ў зімовы перыяд кожнага з іх розны, але праблемы, з якімі мы сутыкаемся ў перыяд ацяпляльнага сезона, часта аднолькавыя, паспрабуем з імі разабрацца і знайсці шляхі іх вырашэння.

Ні для каго не сакрэт, што адной з галоўных праблем зімовага перыяду з'яўляецца недахоп сонечных прамянёў. А асабліва гэтая праблема востра стаіць для святлалюбных раслін, якім недастаткова зімовага святладня.

Практычна ўсе расліны рэагуюць на недахоп святла аднолькава, іх афарбоўка бляднее, міжвузеллі выцягваюцца, а рост запавольваецца. Пры першых прыкметах дэфіцыту сонечных прамянёў варта пераставіць кветку ближэй да акна ці паставіць побач з кветкай дадатковую крыніцу святла.

З надыходам зімы, акрамя недахопу сонечных прамянёў, расліны пакутуюць ад нізкай вільготнасці ў кватэры, а прычына перасушанага паветра — батарэі і каларыферы. Дапамагчы раслінам перажыць гэты перыяд дапаможа ўвільгатняльнік паветра. Другая карысная прылада, якая дапаможа павысіць вільготнасць паветра ў кватэры, гэта пульверызатар. Ранішнія і вячэрнія апырскванні дапамагаюць раслінам перажыць ацяпляльны сезон, як кажуць, без страт.

Самы просты, але не менш дзейсны метад барацьбы з залішняй сухасцю паветра — паддоны з вадой, у якіх насыпаны керамзіт і мох. Такое напаўненне, залітае вадой, дапаможа расліне не перасушыць карані. Большасць раслін у зімовы перыяд пераходзяць у стан спакою і не патрабуюць вялікай колькасці вады пры паліве, таму яе варта значна паменшыць. Гэта парада сапраўды актуальная, калі вашы кветкі жывуць у неацяпляльным (або слаба ацяпляльным) зімовым садзе, дзе летам сярэдняя тэмпература 25 градусаў, а зімой — 10—15 °C. Калі ж кашпо з кветкамі стаяць у звычайнай кватэры з цэнтральным ацяпленнем, у паліве яны маюць патрэбу не радзей, чым у цёплую пару года. А калі расліны жывуць на падаконніках або зблізку радыятараў, паіць іх узімку прыйдзецца нават часцей.

Правільней за ўсё арыентавацца не на тэмпературу паветра ці сезон, а на стан грунту: большасць кветак рэкамендуецца паліваць, калі верхні пласт глебы папрасыхае на 2-3 см. Паліваць расліны нельга халоднай вадой, аптымальнай будзе вада пакаёвай тэмпературы.

Вельмі важна разумець, якая фаза — актыўнага росту ці адпачынку — прыпадае на зіму ў расліны. Адны віды «засынаюць» у верасні — кастрычніку і прачынаюцца ў сакавіку. Другія — наадварот. Большасць пакаёвых кветак у зімовы перыяд адпачываюць і набіраюцца сіл для новага вясновага цвіцення, таму не маюць патрэбы ў вялікай колькасці ўгнаенняў. Нельга ўдабраць у перыяд спакою. Калі кветка не расце і не цвіце, падкормліваць яе як мінімум няма сэнсу, як максімум — шкодна. У фазу росту кветкі падкормліваюць раз на 2-3 тыдні, у фазу цвіцення — раз на 7-10 дзён. Калі рабіць гэта часцей, можна спаліць карані і дабіцца зваротнага эфекту: не ўмацаваць і падтрымаць, а забіць свае расліны. Зімой падкормку лепш за ўсё скараціць да аднаго разу на месяц ці ж спыніць наогул. Нават для тых раслін, якія маюць патрэбу ў падкорме, частату ўнясення угнаенняў лепш паменшыць як мінімум удвая.

Свежае паветра неабходна і людзям, і кветкам, таму вокны часта пакідаюць на праветрыванне, вось толькі ўлетку тэмпература ў памяшканні і на вуліцы практычна аднолькавая, а ўзімку ледзяны струмень паветра з акна можа стаць фатальным для любой расліны.

У любым выпадку трэба паспрабаваць, каб у памяшканні, дзе знаходзяцца кветкі, паветра было свежае, але тэмпература не ніжэйшая за 15 градусаў.

З надыходам зімы варта прыбраць пакаёвыя расліны з халодных балконаў і неацяпляных лоджый, а таксама адставіць вазоны далей ад вокнаў, калі з іх дзьме халоднае паветра ці яны змерзлі. Уся справа ў тым, што вільгаць у грунце астуджаецца і карэнішча больш паддаецца разнастайным хваробам. Таксама лепш прыбраць расліны ад каларыфераў і батарэй, яны занадта гарачыя.

Ірына ТАМКОВІЧ