Трыкатаж — гэта заўсёды модна: мяняецца толькі крой і дэталі, а сама сукенка застаецца вечнай класікай. Галоўны плюс трыкатажу — нязмушанасць, камфорт і ўніверсальнасць. Даўно развеяны стэрэатып аб тым, што трыкатажная сукенка — нешта сумнае, і яе носяць выключна на працу. Насамрэч яна можа стаць асновай і для дзелавых, і для рамантычных вобразаў. Якія мадэлі ў трэндзе гэтай зімой?
Модныя дызайнеры прапануюць шырокі выбар практычных і элегантных сукенак з трыкатажу. Кожная жанчына можа знайсці мадэль на свой густ. Трэба толькі ўлічваць асаблівасці фігуры і памятаць, што на розных жанчынах адна і тая ж мадэль глядзіцца па-рознаму.
Па-ранейшаму актуальныя мадэлі з арыгінальнымі выразамі на плячах, грудзях, спіне. Невялікі далікатны выраз не дазволіць вам адчуць холад, затое стане дэталлю моднага вобразу, якая інтрыгуе. Перавага такога ўбору ў тым, што з паўсядзённага ён ператвараецца ў вячэрні, варта толькі змяніць класічныя боты на модныя з прынтам, надзець доўгія завушніцы і каралі.
Сукенка з адкрытым дэкальтэ — гэта вытанчана і стыльна. У сёлетнім сезоне папулярныя дэкальтэ ў форме кроплі, асіметрычнае дэкальтэ. І класічны круглы выраз моднымі дызайнерамі не забыты. Адмысловы варыянт — сукенкі з глыбокім выразам на спіне. Яны звычайна доўгія і прызначаны для ўрачыстых выпадкаў.
Па-ранейшаму ў модзе асіметрыя — модныя куцюр’е прапануюць варыянты з выразам на адным плячы. Такія мадэлі глядзяцца далікатна і па-жаноцку. Па сцвярджэнні стылістаў, сукенкі з асіметрыяй могуць дапамагчы схаваць недахопы фігуры. Сукенкі з бакавымі разрэзамі таксама ў трэндзе, як і сукенкі з запахам.
Простая трыкатажная сукенка з падкрэсленай лініяй стану сярэдняй даўжыні — базавая рэч, чый лаканізм дазваляе камбінаваць яе з чым заўгодна, ствараць паўсядзённыя і святочныя вобразы. Ёсць дзе разгуляцца фантазіі: модны жакет, шалік ці хустка, боты ці берцы — тыя дэталі, якія нададуць вобразу «разынку».
Новы пік папулярнасці перажываюць доўгія трыкатажныя сукенкі. Модныя акцэнты — карункі, стыльныя гузікі ў радок, валаны, фальбоны ў нечаканых месцах. Вельмі вытанчана і элегантна глядзіцца трэнд сезона — сукенка з высокай манжэтай і аб’ёмным вышэй локця рукавом. Такая сукенка можа мець высокую гарлавіну — прыдатны варыянт для марознай зімы.
Сукенкі міні таксама не забытыя моднымі дызайнерамі. Мадэль, якая нагадвае доўгі світэр, па-ранейшаму ў трэндзе. Сёння шырока прадстаўлены як дзёрзкія, так і спакойныя мадэлі, як сілуэты па фігуры, так і аверсайз — выбірайце на свой густ. Нюанс у тым, што экстрэмальна модныя варыянты маюць самы просты крой.
Няма ніякіх абмежаванняў у палітры адценняў модных сукенак. Актуальныя як яркія «электрычныя», так і пастэльныя расфарбоўкі. Чырвоны, бірузовы, гарчычны, аранжавы, зялёны, фіялетавы — для яркіх вобразаў. Шакаладны, шэры, бэжавы — для прыхільніц спакойных адценняў. Мадэль можа быць упрыгожана геаметрычным прынтам, анімалістычнай расфарбоўкай, клеткай, «ялінкай» ці вязанымі косамі.
У гэтым выпадку пазбягайце аблеглых сілуэтаў, такіх як сукенка-футарал. Для дзяўчат «у целе» ідэальныя варыянты — сукенка-трапецыя, сукенка-туніка, а таксама сукенка-світэр у стылі «аверсайз». Гэтыя мадэлі схаваюць недахопы фігуры дзякуючы складкам, якія мякка спадаюць. Магчыма, таму мадэлі «аверсайз» надоўга занялі месца сярод трэндаў жаночага адзення.
Агата СЛАВІНА
У сталіцы адкрылася ХХХ Мінская міжнародная кніжная выстаўка-кірмаш.
«Мы плануем навучыць аднаўленчым медыятыўным практыкам 20 чалавек з розных устаноў».
«Важны момант, што яўныя сімптомы аўтызму ёсць, але бацькі не жадаюць заўважаць іх».
Ужо традыцыя з нагоды Дня роднай мовы прапаноўваць чытачам праверыць свае веды.
