З якімі пытаннямі людзі звяртаюцца да ўчастковых

Карэспандэнт «Звязды» пабывала на прыёме грамадзян на адным з участкаў Маскоўскага РУУС г. Мінска.

Нагадаем: кожны тыдзень па серадах з 17.00 да 20.00 участковыя інспектары міліцыі па ўсёй краіне праводзяць прыём грамадзян у сваіх працоўных кабінетах —- грамадскіх пунктах аховы правапарадку.

На днях у грамадскім пункце аховы правапарадку № 302 па вуліцы Волаха на пытанні жыхароў участка адказваў супрацоўнік Маскоўскага РУУС сталіцы Даніла Місун.

Пасля шасці вечара да ўчастковага зазірнулі адразу двое: сямейная пара слёзна прасіла міліцыянера паўплываць на суседа, які рэгулярна курыць каля пад’езда.

«Цыгарэтны дым ляціць прама ў адчыненае акно нашай кватэры, размешчанай на першым паверсе, —- скардзіліся мінчане. —- А дома ж маленькія дзеці! Катэгарычна супраць, каб яны дыхалі гэтай гадасцю!»

Галава сям’і ўжо некалькі разоў прасіў мужчыну адыходзіць далей ад пад’езда, аднак просьбаў той не чуе.

Даніла Місун выслухаў сужэнцаў і паабяцаў: паразмаўляе з суседам пра шкодныя звычкі, хоць закон не забараняе яму курыць каля пад’езда. «Зраблю ўсё, каб вы знайшлі кампраміс і ўсім стала камфортна», —- падкрэсліў афіцэр.

Прыйшла на прыём і пенсіянерка. Жанчына расказала, што ў кватэры па суседстве рэгулярна адбываюцца скандалы, нярэдка чутны плач дзяцей.

«Там жыве сям’я: муж, жонка і трое дзяцей, —- патлумачыла гараджанка. —- На ўсе прапановы дапамагчы гаспадыня заўсёды адказвае адмовай, сцвярджаючы, што ўсё ў парадку. Але мне падаецца, што сусед б’е жонку. Так не павінна быць!»

Супрацоўнік міліцыі запісаў інфармацыю і паабяцаў разам з інспектарам па справах непаўналетніх наведаць сям’ю ў выхадны дзень.

У міліцыі нагадваюць: участковыя інспектары па серадах вядуць прыём грамадзян ва ўсіх грамадскіх пунктах аховы правапарадку з 17.00 да 20.00. Усе жадаючыя могуць звярнуцца да праваахоўнікаў і задаць пытанні, якія адносяцца да кампетэнцыі органаў унутраных спраў.

Вераніка КАНЮТА

Фота прадастаўленна прэс-службай Маскоўскага РУУС г. Мінска