Агульны аб’ём кітайскай эканомікі перавысіў 120 трыльёнаў юаняў

Як паведамілі ў Дзяржаўным статыстычным упраўленні КНР, паводле папярэдніх разлікаў, у мінулым годзе ВУП Кітая перавысіў 121 трыльён юаняў, што на 3 працэнты больш, чым у 2021-м, перадае «Жэньмінь жыбаа» анлайн».

«Пераадолеўшы адзнакі ў эканамічным аб’ёме ў 100 трлн. і 110 трлн. юаняў у 2020-м і 2021-м гадах, эканоміка Кітая выйшла на новы ўзровень», — заявіў начальнік Дзяржаўнага статыстычнага ўпраўлення КНР Кан І.

У 2022 годзе эканоміка Кітая прадэманстравала ўстойлівы рост, нягледзячы на такія неспрыяльныя фактары, як ўспышкі каранавіруснай інфекцыі COVID-19 і складанае міжнароднае становішча. КНР каардынуе развіццё і бяспеку, узмацняе меры па макракантролі для барацьбы з уздзеяннем непрадбачаных фактараў, а таксама для захавання эканамічнай і сацыяльнай стабільнасці.

Летась агульны аб’ём вытворчасці збожжа ў КНР склаў 686,5 мільёна тон. Гэта на 3,68 млн. тон больш у параўнанні з 2021 годам. У вытворчасці збожжа назіраецца пастаянны рост. У гарадах і пасёлках створана больш чым 12 мільёнаў працоўных месцаў, што перавысіла планавы паказчык у 11 млн. Індэкс спажывецкіх цэн за мінулы год узрос на 2 працэнты. Ва ўмовах рэзкага росту сусветных цэн на прадукты харчавання і энерганосьбіты, а таксама даволі моцнага імпартуемага інфляцыйнага ціску, сітуацыя з цэнамі ў Кітаі стабільная, што значна адрозніваецца ад абстаноўкі з высокай інфляцыяй у краінах Еўропы і ЗША.

«Эканоміка Кітая працягвала развівацца, нягледзячы на паніжальны ціск на эканоміку краіны. Сукупны аб’ём эканомікі дасягнуў новага ўзроўню, занятасць і цэны на тавары ў цэлым былі стабільнымі, жыццё насельніцтва пастаянна паляпшалася, былі дасягнуты станоўчыя вынікі ў галіне высакаякаснага развіцця, а агульная сацыяльна-эканамічная абстаноўка засталася стабільнай і гарманічнай», — адзначыў Кан І.

Аднак аснова для аднаўлення эканомікі ўсё яшчэ не трывалая, паколькі міжнародная сітуацыя застаецца складанай і напружанай, у той час як эканоміка Кітая па-ранейшаму знаходзіцца пад трайным ціскам — з боку скарачэння попыту, шоку прапановы і паслаблення чаканняў, адзначыў Кан І. У гэтым годзе акцэнт у рабоце будзе зроблены на забеспячэнні эканамічнай стабільнасці. Краіна будзе дабівацца прагрэсу пры забеспячэнні стабільнасці, дадаў Кан І.