Вы тут

Цэнтр карэкцыйна-развіваючага навучання ў Брэсце адкрылі пасля рэканструкцыі


Брэсцкаму абласному цэнтру карэкцыйна-развіваючага навучання і рэабілітацыі сёлета спаўняецца трыццаць гадоў. Да юбілею ўстанова атрымала важкі падарунак — цалкам абноўлены корпус і адпаведна з’явіліся магчымасці аказваць дапамогу значна большай колькасці дзяцей.


— Мы практычна адкрылі новы сучасны аб’ект, — заявіў намеснік старшыні Брэсцкага аблвыканкама Вадзім Краўчук. — У ходзе капітальнага рамонту будынак не толькі цалкам абноўлены: удалося дасягнуць галоўнага — павялічыць яго плошчу ў тры разы. Зараз яна складае каля тысячы квадратных метраў. На гэта пайшло каля двух мільёнаў рублёў сродкаў з абласнога бюджэту. Але ж затраты таго вартыя. Цяпер з’явілася магчымасць павялічыць штат супрацоўнікаў, адпаведна вырасце і колькасць дзяцей, якіх зможа прыняць цэнтр.

Дырэктар цэнтра Таццяна Жук расказала, што да рэканструкцыі карэкцыйна-педагагічную падтрымку тут атрымлівалі ўсяго 30 хлопчыкаў і дзяўчынак. Зараз ужо займаецца 53 дзіцяці, і колькасць будзе толькі ўзрастаць.

— Дзеці, якія патрабуюць асаблівай увагі і асаблівай дапамогі, атрымліваюць яе, — падкрэсліла дырэктар. — Акрамя таго, у цэнтры штогод праходзяць псіхолага-педагагічнае абследаванне больш за 300 дзяцей з асаблівасцямі псіха-фізічнага развіцця. Больш за 600 хлопчыкаў і дзяўчынак з вобласці атрымліваюць кансультацыі.

Ва ўстанове зараз з’явіўся шэраг новых кабінетаў. Напрыклад, дыягнастычны абсталяваны па самых сучасных патрабаваннях. Для кабінета рухальнай актыўнасці набыта новае абсталяванне, ёсць дзве сэнсарныя залы: цёмная і светлая. З’явілася пад’ёмная платформа вертыкальнага перамяшчэння для інвалідаў.

Шматгадовыя напрацоўкі ўстановы паспрыялі адкрыццю рэсурснага цэнтра па інклюзіўнай адукацыі. Асноўныя яго мэты, паводле слоў намесніка дырэктара Галіны Бусько, —максімальнае ўключэнне дзяцей з асаблівасцямі псіха-фізічнага развіцця ў соцыум, а таксама фарміраванне інклюзіўнай культуры ва ўдзельнікаў адукацыйнага працэсу, і ў выніку — стварэнне інклюзіўнага грамадства. Цэнтр пастаянна праводзіць інклюзіўныя фестывалі, ладзіць выставы творчых работ сваіх выхаванцаў і іншыя мерапрыемствы.

З улікам пералічаных раней фактараў і праводзілася рэканструкцыя. Спецыялісты ААТ «Брэстжылпраект» і ААТ «Палессежылбуд» улічылі пажаданні супрацоўнікаў цэнтра. Пры правядзенні аддзелачных работ выкарысталі колеравую гаму, якую хацелі бачыць педагогі.

Вельмі важна, што зараз у кожнага педагога ёсць асобны кабінет, а гэта дазваляе праводзіць не толькі індывідуальныя заняткі, але і заняткі з невялікімі групамі выхаванцаў. У цэнтры працуе дзіцячы ўрач-псіхіятр. Хутка пачнуць працаваць яшчэ некалькі супрацоўнікаў медыцынскага профілю. Педагогі падкрэсліваюць важнасць і такога набытка, як дыдактычны матэрыял, развіваючыя дапаможнікі.

Якасць рэканструкцыі і праведзенай работы ўжо ацанілі і дзеці, і дарослыя. Мама выхаванкі Ала Андрановіч выказала падзяку і будаўнікам, і работнікам цэнтра: «Сучасныя дзеці павінны займацца ў сучасных умовах, і нашым дзецям яны тут забяспечаны».

Дэпутат Палаты прадстаўнікоў Нацыянальнага сходу краіны Марына Васько, якая прыйшла павіншаваць калектыў Цэнтра з наваселлем, адзначыла, што капітальны рамонт і рэканструкцыя ўстановы не з’яўляюцца выпадковай падзеяй:

— Гэта вынікі сацыяльнай палітыкі нашай дзяржавы з улікам падыходаў, якія рэгламентуе Кодэкс Рэспублікі Беларусь аб адукацыі, дзе шмат увагі нададзена інклюзіўнаму накірунку, — адзначыла яна.

Святлана ЯСКЕВІЧ

Фота Аляксандра ШУЛЬГАЧА

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.