Прэзідэнт Рэспублікі Беларусь Аляксандр Лукашэнка зацвердзіў рашэнні па ахове дзяржаўнай граніцы органамі пагранічнай службы ў 2023 годзе. Сёлета іх два — на абарону дзяржаўнай граніцы пагранічнікамі на зямлі, СПА — на небе. Бяспека на граніцы сёння — надзвычай важнае пытанне. Як паведамілі ў Дзяржаўным пагранічным камітэце, абстаноўка на дзяржаўнай граніцы застаецца прагназуемай і кантралюемай. Але захоўваюцца знешнія выклікі пагранічнай бяспецы, звязаныя з мілітарызацыяй прыгранічных рэгіёнаў Украіны і сумежных дзяржаў Еўрасаюза і актывізацыяй разведвальнай дзейнасці, а таксама спробамі пранікнення ў Беларусь радыкальна настроеных асоб. Таму размова ў Прэзідэнта мела шырокі і падрабязны характар. На мерапрыемства былі запрошаны дзяржаўны сакратар Савета бяспекі Аляксандр Вальфовіч, міністр абароны Віктар Хрэнін, старшыня Дзяржаўнага пагранічнага камітэта Анатоль Лапо і начальнік Генеральнага штаб Узброеных сіл, першы намеснік міністра абароны Віктар Гулевіч
Кіраўнік дзяржавы падкрэсліў, што гэта традыцыйнае мерапрыемства. Заўжды ў пачатку года прымаецца рашэнне аб ахове дзяржаўнай граніцы. «Асаблівасць гэтага года ў тым, што як ніколі раней абстаноўка вакол Беларусі, ваенна-палітычная абстаноўка, ды і эканамічная не такая простая. У гэтым ёсць адметнасць нашай сённяшняй сустрэчы», — сказаў Аляксандр Лукашэнка. Прэзідэнт пацікавіўся ў старшыні Дзяржаўнага пагранічнага камітэта Анатоля Лапо характарыстыкай сітуацыі на граніцы на раніцу панядзелка.
Другой тэмай, акрэсленай Аляксандрам Лукашэнкам, стала праблема з бежанцамі. Кіраўнік дзяржавы звярнуў увагу, што пра гэту тэму даўно не гаварылі і для грамадства яе не асвятлялі. «Мы цудоўна разумеем, што, хоць паток і зменшыўся, але ўсё роўна людзі ўцякаюць ад вайны. Добра, тут з Украіны, гэта людзі нашы, праблем тут асаблівых няма. Хто хоча прыязджае, застаецца ў нас на пастаяннае месца жыхарства, хтосьці просіць аказаць ім пэўныя паслугі: накарміць, напаіць, абагрэць, падлячыць. Гэта мы робім, тут праблем асаблівых няма», — сказаў ён. Але разам з тым, па словах Прэзідэнта, не спыняецца паток людзей з Азіі, з такіх краін як Афганістан, Іран і іншых Аляксандр Лукашэнка пацікавіўся, людзі якой нацыяльнасці сюды ідуць, з якіх дзяржаў і як мяняецца паток бежанцаў.
Трэцяе вельмі важнае пытанне, якое тычыцца аховы дзяржаўнай граніцы, — армія. «Мы гэта не хавалі, мы прыцягнулі немалыя сілы ў падтрымку пагранічным войскам з боку нашай арміі. Якая сітуацыя ў гэтым плане? Вы як камандуючы гэта павінны адчуваць, ці дастаткова сіл і сродкаў, якія мы накіроўваем для ўзмацнення дзяржаўнай граніцы, у тым ліку і на поўдні Беларусі, на граніцу з Украінай». — звярнуўся кіраўнік дзяржавы да Анатоля Лапо, — Там і міліцыя прыцягваецца і мясцовыя органы ўлады, малайцы, падтрымліваюць, ні ў чым не адмаўляюць, ды і падраздзяленні Узброеных сіл«, — дадаў ён.
Гэты комплекс пытанняў быў разгледжаны, перш чым было зацверджана рашэнне на ахову дзяржаўнай граніцы.
Як далажыў старшыня Дзяржаўнага пагранічнага камітэта генерал-лейтэнант Анатоль Лаппо, усе даручэнні кіраўніка дзяржавы органам пагранічнай службы ў 2022 годзе выкананы. Таксама Прэзідэнту далажылі аб выніках аховы граніцы ў 2022 годзе.
У размове з журналістамі старшыня Дзяржаўнага пагранічнага камітэта, Генерал-лейтэнант Анатоль Лапо падкрэсліў, што ніколі ў гісторыі суверэннай Беларусі не прыходзілася ахоўваць граніцу з дзяржавай, дзе ідуць баявыя дзенняі. Гэта таксама накладвае свой адбітак. «Нам прыйшлося перабудаваць ахову граніцы на паўднёвых накірунках па ўсіх параметрах», — адзначыў ён.
Анатоль Лапо расказаў, што на 2023 год Прэзідэнтам пастаўлены задачы па ахове граніцы не менш важныя, чым былі ў мінулым годзе. Па яго словах, тых сродкаў і сіл, якія маюць пагранічнікі, дастаткова, каб выканаць пастаўленыя задачы і забяспечыць надзейную ахову граніцы.
«Наша задача ў гэтым годзе — забяспечыць надзейнасць пагранічнай абароны, забяспечыць пропуск у нашу краіну законапаслухмяных грамадзян і стаць надзейным шчытом ад тых, хто ідзе да нас з дрэннымі намерамі. І тэхнічных сродкаў, і персаналу дастаткова, каб гэта выканаць. Будуць новыя задачы — будзе новае абсталяванне». — падкрэсліў Анатоль Лапо.
Начальнік Генеральнага штаба Узброеных сіл, першы намеснік міністра абароны Віктар Гулевіч расказаў, што напружанасць ваенна- палітычнай абстаноўкі прывяла да таго, што да рашэння аб абароне дзяржаўнай граніцы быў дададзены кампанент абароны ў паветранай прасторы. Адказнасць за гэтую задачу нясуць Узброеныя сілы, з улікам разівцця ваенна-палітычнай абстаноўкі гэтая адказнасць толькі ўзрастае.
«Нашы сілы і сродкі гатовыя да прыкрыцця аператыўных накірункаў. Яны могуць зрэагаваць на рызыкі, праблемы і пагрозы. Менавіта развіццё абстаноўкі, яе напружанасць прымусіла нас у мінулым годзе павялічыць сілы і сродкі ў радыётэхнічных войсках, ракетных і зенітных войсках. Прымяннне гэтых сродкаў дазваляе паніжаць і ў пэўнай ступені выключаць верагоднасць пралёту парушальнікаў граніцы на тэрыторыю нашай краіны», — сказаў Віктар Гулевіч.
Валерыя СЦЯЦКО
Фота: БелТА
Крыху больш чым 2 % беларусаў ужо маюць біяметрычныя дакументы.
Адна з галоўных прыкмет, што вясна прыйшла, — змешаны з першымі водарамі акрыялай прыроды апетытны дымок.
Літаральна днямі ў населеным пункце пачнецца маштабная работа чарговага народнага патрыятычнага праекта.
Разбіраемся разам з урачом па медыцынскай прафілактыцы.
