Узнагароджаны найлепшыя журналісты, якія пішуць пра навуку

Сёння ў Нацыянальнай акадэміі навук былі ўшанаваны пераможцы конкурсу на найлепшае прадстаўленне навуковых дасягненняў 2022 года ў сродках масавай інфармацыі. У намінацыі «Найлепшая публікацыя» прэмію конкурсу атрымала рэдактар аддзела газеты «Звязда» Надзея Нікалаева. 

Конкурс праводзіўся ў трынаццаты раз па чатырох намінацыях: «Найлепшая публікацыя», «Найлепшы сюжэт (праграма) на радыё і тэлебачанні», «Найлепшая публікацыя ў навукова-папулярным выданні» і «Найлепшае прадстаўленне дасягненняў НАН Беларусі ў сетцы Інтэрнэт». 

Па кожнай з намінацый прысуджаны тры прэміі. У конкурсе маглі прымаць удзел як прафесійныя журналісты, так і непрафесійныя аўтары, папулярызатары навукі. Усяго было прадстаўлена 126 работ 38 аўтараў.

— Для таго, каб данесці да грамадскасці вынікі работы нашых вучоных, надзвычай актуальна працаваць з журналістамі, мы гэта цудоўна разумеем. Дзякуй усім, хто папулярызуе беларускую навуку. Вялікая просьба да вас — працягвайце гэта рабіць, — падкрэсліў падчас урачыстай цырымоніі ўзнагароджвання прадстаўнікоў СМІ старшыня Прэзідыума Нацыянальнай акадэміі навук Беларусі акадэмік Уладзімір Гусакоў. — Грамадству трэба ведаць, чым жыве беларуская навука. Менавіта на яе папулярызацыю і была скіравана маштабная выстаўка «Беларусь інтэлектуальная», арганізаваная па даручэнні кіраўніка дзяржавы напярэдадні Дня беларускай навукі. Там былі прадстаўлены найбольш значныя распрацоўкі за апошні перыяд. Выстаўка атрымала шырокі рэзананс, у тым ліку дзякуючы СМІ, станоўчыя водгукі і цяпер яна будзе праходзіць ў рэгіёнах. Напэўна, першым абласным цэнтрам, які падхопіць эстафету, будзе Гомель. Мы і раней праводзілі навуковыя выстаўкі, але такая маштабная, міжведамасная і дэталёва прадуманая, з кластарнай арганізацыяй прайшла ў нас упершыню. 

Уладзімір Гусакоў уручыў таксама дыпломы пераможцаў конкурсу «100 маладых талентаў НАН Беларусі» і конкурсу «ТОП-10 вынікаў дзейнасці акадэмічных вучоных». Штогадовы конкурс «100 маладых талентаў НАН» быў заснаваны ў 2018 годзе. Да ўдзелу ў ім дапускаюцца кандыдаты навук ва ўзросце да 30 гадоў і дактары навук ва ўзросце да 40 гадоў, якія працуюць у арганізацыях НАН Беларусі. Агульная колькасць маладых вучоных, якія адначасова ўваходзяць у банк даных «100 маладых талентаў Нацыянальнай акадэміі навук Беларусі», не можа перавышаць 100 чалавек, а штогадовая колькасць лаўрэатаў конкурсу — не большая за 20 чалавек. У гэтым годзе ў банк увайшлі загадчык аддзела навукова-інфармацыйнай работы Інстытута гісторыі НАН Беларусі, кандыдат гістарычных навук Аляксандр Бараноўскі, навуковы супрацоўнік лабараторыі аптычнай спектраскапіі паўправаднікоў НПЦ Нацыянальнай акадэміі навук Беларусі па матэрыялазнаўстве, кандыдат фізіка-матэматычных навук Вольга Барадаўчанка і старшы навуковы супрацоўнік лабараторыі малекулярнай біятэхналогіі Інстытута мікрабіялогіі НАН Беларусі, кандыдат біялагічных навук Ілья Казлоўскі. 

Уладзімір Гусакоў асабліва адзначыў актуальнасць амаладжэння навуковага саставу акадэміі і выказаў пажаданне, каб маладыя даследчыкі больш актыўна абаранялі кандыдацкія і доктарскія дысертацыі. Што тычыцца ТОП дасягненняў акадэмічных вучоных у вобласці фундаментальнай і прыкладной навукі, то, як падкрэсліў Уладзімір Гусакоў, патрабаванні да прэтэндэнтаў (да навізны і актуальнасці заяўленых вынікаў) прад’яўляюцца вельмі жорсткія:

— Мы не спяшаліся з вызначэннем пераможцаў, каб не памыліцца, — падкрэсліў ён. — У выніку было прынятае рашэнне адзначыць 8 вучоных і аўтарскіх калектываў.

Цікава, што Ілья Казлоўскі ўзнімаўся на сцэну двойчы: і як пераможца конкурсу «100 маладых талентаў», і ў складзе аўтарскага калектыву Інстытута мікрабіялогіі НАН, які трапіў у ТОП-10 за стварэнне высокаактыўнага генна-інжынернага штама для атрымання вакцын новага пакалення з патэнцыяльна узмоцненай імунагеннасцю. 

Надзея НІКАЛАЕВА

Фота Яўгена ПЯСЕЦКАГА