Вы тут

Цікавы вопыт і праверка на трываласць


У ліпені 2020 года пачаў работу Маладзёжны савет (парламент) пры Нацыянальным сходзе Рэспублікі Беларусь, які з'яўляецца кансультатыўна-дарадчым органам і ажыццяўляе сваю дзейнасць на грамадскіх пачатках. Мэтай Маладзёжнага парламента з'яўляецца садзейнічанне дзейнасці Нацыянальнага сходу ў галіне заканадаўчага рэгулявання правоў і законных інтарэсаў моладзі. З таго часу прайшло больш як два гады, у жніўні 2022 года было сфарміравана другое скліканне парламента.

Работу Маладзёжнага савета сёння каардынуюць 10 камісій, яны супрацоўнічаюць з профільнымі камісіямі абедзвюх палат парламента. Мы пагутарылі са старшынёй камісіі па пытаннях культуры і міжнацыянальных адносін Станіславам ПАЗЮКОМ аб уключэнні моладзі на месцах у грамадскае жыццё і ролі Маладзёжнага парламента ў краіне.


— Станіслаў Сяргеевіч, вы ўзначальваеце камісію ўсяго паўгода. Як успрынялі навіну аб вылучэнні вашай кандыдатуры ад Віцебскага раённага Савета дэпутатаў?

— Вядома, гэта вялікі гонар, бо ад кожнага раёна і горада абласнога падпарадкавання (акрамя Мінска) у склад другога склікання ўвайшло ўсяго па адным прадстаўніку. Адразу ўсвядоміў высокую адказнасць і давер з боку мясцовых органаў улады, які мы з членамі камісіі стараемся апраўдваць у яркіх праектах і буйных мерапрыемствах.

— Старшынёй камісіі па справах культуры вас абралі невыпадкова — вы з'яўляецеся намеснікам дырэктара Віцебскага раённага цэнтра культуры і творчасці. Як атрымліваецца сумяшчаць работу, якая па сутнасці не абмяжоўваецца працоўным днём і не характарызуецца спакоем, з удзелам у Маладзёжным парламенце?

— Няпроста, але атрымліваецца. Са 138 дэлегатаў другога склікання — толькі двое студэнтаў. Такім чынам, практычна ўсе мае калегі займаюць кіруючыя пасады на месцах і сумяшчаюць асноўную работу з парламенцкай. Варта адзначыць, што раёны дэлегавалі самых дастойных кандыдатаў, якія актыўна ўдзельнічаюць у грамадскім жыцці, таму цяпер у рамках работы камісій ніякіх праблем няма.

— Якую ролю іграе парламент ва ўключэнні моладзі ў грамадскае жыццё?

— З улікам таго, што гэта новая форма работы, якой усяго два гады, да канца ўнутраная сістэма маладзёжнага органа не адладжана. Нягледзячы на гэта, ужо можна назіраць зацікаўленасць падрастаючага пакалення ў сур'ёзным удзеле ў жыцці краіны ў рамках праекта «Адзіны парламенцкі дзень» ва ўстановах адукацыі, мэтай якога з'яўляецца знаёмства з дзейнасцю МПНС, фарміраванне прававой культуры ў маладых людзей. Сёння існуе мноства маладзёжных саюзаў і арганізацый, дзе можна рэалізаваць свой інтэлектуальны і творчы патэнцыял, а калі тыя ж навыкі і ўменні можна прымяніць з карысцю для грамадства ў рамках Маладзёжнага парламента — гэта істотна матывуе падрастаючае пакаленне фарміраваць актыўную грамадзянскую пазіцыю і адчуваць прамы ўдзел у дзяржаўных працэсах.

— Раскажыце аб праведзенай рабоце за мінулы год і планах на 2023-і.

— Члены камісіі прынялі ўдзел у 55 мерапрыемствах, правялі — 45. Камісія ў сваёй рабоце абапіраецца на пытанні адстойвання нацыянальных інтарэсаў Рэспублікі Беларусь, звязаных з захаваннем гістарычнай памяці, папярэджаннем спроб фальсіфікацыі гістарычных фактаў, а таксама з развіццём асветніцкай дзейнасці ў галіне культуры і мастацтва. Я рэгулярна прымаю ўдзел у цырымоніях перапахавання астанкаў савецкіх воінаў, якія загінулі ў гады Вялікай Айчыннай вайны, апошняе мерапрыемства прайшло ў Віцебскім раёне. У рамках яго падрыхтоўкі з намеснікам старшыні Маладзёжнага парламента пры Дзяржаўнай Думе Расіі Аленай Яракінай мы арганізавалі сустрэчу «Аб культурным узаемадзеянні членаў Маладзёжных парламентаў Саюзнай дзяржавы». Да самага маладога дзяржаўнага свята — Дня народнага адзінства — члены камісіі правялі лёгкаатлетычныя забегі, гала-канцэрт «Адзін народ, адна Радзіма», узялі ўдзел у аўтапрабегу «За Беларусь!». Чатыры члены камісіі ўзялі ўдзел у патрыятычным форуме «Гэта НАША гісторыя!», пад кіраўніцтвам Уладзіміра Мішчанкі рэалізуецца праект-выстава «Гераічны летапіс Крычаўшчыны». У кастрычніку 2022 года Бажэна Ярэміч узяла ўдзел у добраўпарадкаванні мемарыяльнага комплексу «Хатынь».

Вядома, члены Маладзёжнага парламента не абыходзяць бокам рэспубліканскія акцыі «Нашы дзеці», «Ад усёй душы», «Збяром партфель першакласніку!». Важным кірункам работы з'яўляецца ўдзел у прамых тэлефонных лініях і выязных прыёмах, якія праводзяцца дэпутатамі і членамі Савета Рэспублікі — за паўгода мы прынялі ўдзел у трох прамых лініях і пяці прыёмах грамадзян.

Калі гаварыць пра планы на бягучы год, то ў лютым запускаецца новы сацыякультурны праект «Знакамітыя людзі суверэннай Беларусі», у сакавіку—ліпені адбудзецца цырымонія ўзнагароджання «Чалавек года Віцебшчыны», абласны фестываль вулічнага мастацтва «Волаты Прыдзвіння», Дзень моладзі на «Славянскім базары ў Віцебску». На стадыі падрыхтоўкі знаходзіцца цікавы праект «Школа маладога палітыка», які будзе рэалізаваны ва ўстановах адукацыі; мы прымаем удзел і ў падрыхтоўцы 30-га юбілейнага Дня беларускага пісьменства, які пройдзе ў верасні ў Гарадку. Члены камісіі па пытаннях культуры працуюць над напісаннем гімна Года міру і стварэння.

Нашы ініцыятывы знаходзяць важкую падтрымку ў Савеце Рэспублікі, некаторыя з праектаў фінансуюцца. А мы ў сваю чаргу аналізуем запыты маладых людзей, сінтэзуем іх з сучаснымі тэндэнцыямі і нашым творчым патэнцыялам.

— Што для вас значыць работа ў Маладзёжным парламенце?

— Вялікая адказнасць і магчымасць папулярызацыі і прасоўвання дастойных культурных праектаў паўночнага рэгіёна на рэспубліканскай і міжнароднай арэне. Гэта цікавы вопыт і праверка на трываласць, а яшчэ — вялікі сацыяльны ліфт, таму што пасля работы на такім высокім узроўні перад табой адкрываюцца новыя перспектывы.

Гутарыла Аляксандра ГВОЗДЗЕВА


У тэму

Парламенцкія аб'яднанні моладзі рэгіянальнага ўзроўню існуюць у Беларусі больш за 10 гадоў. Першай у 2007 годзе была створана маладзёжная палата пры Мінскім гарадскім Савеце дэпутатаў. На сёння аналагічных структур у розных гарадах краіны каля 60. Стварэнне Маладзёжнага рэспубліканскага парламента стала лагічным працягам. Ініцыятыва зыходзіла ад прадстаўнікоў новага пакалення. У 2017 годзе на сустрэчы з навучэнцамі «Моладзь. Погляд у будучыню» пра яе расказалі Прэзідэнту Беларусі Аляксандру Лукашэнку. Кіраўнік дзяржавы ідэю падтрымаў.

Выбар рэдакцыі

Рэлігія

200 гадоў пад заступніцтвам Пятра і Паўла

200 гадоў пад заступніцтвам Пятра і Паўла

Гомельскі кафедральны Свята-Петра-Паўласкі сабор — адзін з самых велічных праваслаўных храмаў Беларусі, адзін з нямногіх помнікаў архітэктуры зрэлага класіцызму, які захаваўся да нашых дзён.

Здароўе

Як мыць садавіну, гародніну і зеляніну, каб не атруціцца?

Як мыць садавіну, гародніну і зеляніну, каб не атруціцца?

«Апрацоўваць гародніну і садавіну сродкам для мыцця посуду нельга».

Спорт

Які наш спорт сёння?

Які наш спорт сёння?

«З кожным днём сітуацыя ў свеце мяняецца так, што ў вялікай ступені гэта закранае і спорт».