«Беларускія народныя казкі ў апрацоўцы Якуба Коласа»

У Выдавецкім доме «Звязда» падрыхтавана да друку чарговае, трэцяе па ліку, выданне маляўніча аформленай кнігі — «Беларускія народныя казкі ў апрацоўцы Якуба Коласа». Тыраж — 1 200 экзэмпляраў.

Пад адной вокладкай — шэсць твораў народнага фальклору: казкі «Каза ў арэхах», «Зайкава хатка», «Як пеўнік ратаваў курачку», «Пчала і шэршань», «Дудар», «Не вытрываў». Творы добра вядомыя і даўно палюбіліся чытачам розных пакаленняў. Якуб Колас апрацаваў іх на працягу 1922 — 1940 гг. Разнастайныя па тэматыцы, казкі знаёмяць дзяцей з багатай прасторай беларускага фальклору, са светаўспрыманнем нашых продкаў.

Мастак кнігі — Алег Грубін. Відавочна, што ён надзвычай уважліва прачытаў творы, які склалі кнігу, і здолеў пераканаўча адлюстраваць вобразы галоўных персанажаў казак. Часам нават узнікае жаданне спыніцца ў чытанні і спярша ўважліва прагледзець ілюстрацыю. Дарэчы, чаму б асобна не выдаваць — напрыклад, паштоўкамі рэпрадукцыі прац мастака, які здолеў унікнуць у характар, сутнасць фальклорных твораў? Прагляд такіх паштовак дадаў бы шмат эмоцый, прынёс бы юным чытачам эстэтычную асалоду.

Першы раз у Выдавецкім доме «Звязда» кніга казак у апрацоўцы Якуба Коласа выйшла напрыканцы 2020 года — тыражом 1 100 экзэмпляраў. Наступны раз — у лістападзе 2021-га: тады тыраж быў роўны 1 000 экз. А зараз, у 2023 годзе, — 1 200 экзэмпляраў. Такім чынам, агульны наклад «звяздоўскага» коласаўскага праекта — 3 300 экзэмпляраў. Па сённяшнім часе — досыць неблагая лічба.

Кнігу «Беларускія народныя казкі ў апрацоўцы Якуба Коласа» можна набыць у кнігарнях ААТ «Белкніга» па ўсёй краіне, а таксама — у кнігарні «Акадэмкніга» па адрасе: Мінск, праспект Незалежнасці, 72.

Мікола БЕРЛЕЖ