Вы тут

Каляндар культурных мерапрыемстваў на 2023 год


За апошнія гады турыстычная галіна прырасла новымі маршрутамі і падзеямі, беларусы сталі больш актыўна падарожнічаць па рэгіёнах, паболела гасцей з Расійскай Федэрацыі. Замежныя турысты едуць ужо не толькі ў санаторыі і аграсядзібы. Часта пры выбары месца адпачынку яны пралічваюць і магчымасць атрымаць цікавы вопыт і ўражанні. На працягу ўсяго года ў Беларусі ладзяцца разнастайныя фестывалі, святы, абрады, тэматычныя мерапрыемствы. Так, Міністэрствам культуры сумесна з рэгіёнамі падрыхтаваны Каляндар культурных мерапрыемстваў на 2023 год, які дапаможа айчынным і замежным турыстам сарыентавацца, куды варта прыехаць ў найбліжэйшыя выхадныя ці святочныя дні, альбо у час канікулаў і водпускаў. Як паведаміў начальнік упраўлення прафесійнага мастацтва Міністэрства культуры Раман Мамчанка, у календары змешчана інфармацыя пра 120 брэндавых мерапрыемстваў. Гэта выдатная магчымасць азнаёміцца з культурнымі здабыткамі рэгіёнаў, даведацца больш пра гісторыю пэўных гарадоў, мястэчак і вёсак. І кожнае такое адкрыццё прыносіць з сабой масу пазітыўных эмоцый.


Фота: БелТА

Арганізатары прапануюць мерапрыемствы, розныя па тэматыцы і маштабу. Некаторыя з іх даюць магчымасць паназіраць за аўтэнтычнымі абрадамі, якія ўнесены ў Дзяржаўны спіс нематэрыяльнай гісторыка-культурнай спадчыны. Напрыклад, у маі ў вёсцы Пагост Жыткавіцкага раёна ладзіцца «Юраўскі карагод», а ў Веткаўскім раёне праходзіць абрад «Ваджэнне і пахаванне стралы».

Гасцей будуць чакаць і на Рэспубліканскім фестывалі фальклорнага мастацтва «Берагіня» ў г. п. Акцябрскі. Тут пройдуць конкурс танцавальных пар, турнір дзіцячых калектываў, выступленні фальклорных ансамбляў і выканаўцаў, кірмаш з удзелам рамеснікаў.

Рэспубліканскае свята паэзіі, песні і народных рамёстваў «З адною думкаю аб шчасці Беларусі» пройдзе 8 ліпеня ў Купалаўскім мемарыяльным запаведніку «Вязынка». Гэтае свята, прымеркаванае да дня нараджэння народнага паэта Беларусі Янкі Купалы, ладзіцца з 1972 года.

Дарэчы, менавіта мерапрыемствы да Купалля збіраюць найбольшую колькасць гасцей. Свята адзначаецца ў розных кутках Беларусі, але найбольш маштабна яго сустракаюць на Шклоўшчыне. На традыцыйнае мерапрыемства «Александрыя збірае сяброў» прыязджае ад 50 да 100 тысяч гледачоў.

Вельмі шырока ў краіне праводзяцца гістарычныя рэканструкцыі, прысвечаныя розным падзеям. На Барысаўшчыне, напрыклад, ладзіцца фестываль «Бярэзіна», дзе дзякуючы ваенна-гістарычным клубам і аб'яднанням, якія спецыялізуюцца на рэканструкцыі касцюмаў, зброі ды даспехаў ХІХ стагоддзя, можна паназіраць за «боем» рускай і французкай армій, пераправай войскаў Напалеона праз Бярэзіну.

У атмасферу сярэднявечча можна паглыбіцца і ў Нясвіжы: у жніўні тут пройдзе фестываль гістарычнай рэканструкцыі, выступяць калектывы, якія выконваюць музыку ХVІ — ХVІІІ стагоддзяў. У чэрвені можна трапіць на «Любчанскі шпацыр Радзівілаў» у Любчанскім замку. А Лідскі замак у маі здзівіць фестывалем «Магія агню і святла».

У нашай краіне вялікая ўвага аддаецца захаванню народных промыслаў і рамёстваў. Пазнаёміцца з майстрамі і падзівіцца на рэчы, якія яны ствараюць, можна на разнастайных фестывалях, што праходзяць як на рэгіянальным, так і на рэспубліканскім узроўнях. Больш за дваццаць гадоў ў Гродна з'язджаюцца рамеснікі Беларусі і замежжа на свята «Казюкі». Традыцыйным стаў рэспубліканскі фестываль-кірмаш «Вясновы букет», сёлета ён пройдзе ў маі ў Верхнім горадзе ў Мінску.

Сёлета Слуцк абраны культурнай сталіцай Беларусі, і адным з самых яскравых мерапрыемстваў абяцае стаць свята мастацкіх рамёстваў «Слуцкія паясы», якое запланавана на верасень. У ім возьме ўдзел каля 500 майстроў, якія працуюць па 20 кірунках народнай творчасці. У гэты ж час пройдзе міжнародная навукова-практычная канферэнцыя, прысвечаная пытанням захавання майстэрства ткацтва паясоў, і свята-конкурс «Беларуская лялька».

Магілёўшчына рыхтуецца да Фестывалю народнай творчасці, народных промыслаў і рамёстваў «Дрыбінскія таржкі» . Ён пройдзе 18 жніўня.

Больш даведацца пра бортніцтва можна ў Лельчыцкім раёне. Такі промысел узяты пад ахову і ўнесены ў Спіс нематэрыяльных гісторыка-культурных каштоўнасцяў Рэспублікі Беларусь. 21 мая ў аграгарадку Сімонічы пройдзе свята «Мядовы фальварак».

Варта згадаць і «Вішнёвы фестываль» у Глыбокім, «Мотальскія прысмакі» на Іванаўшчыне, каравай-фэст «Бацькава булка» ў горадзе Свіслач...

Кожны рэгіён стараецца падабраць для фестываляў адметную тэму. Так, Кіраўшчына запрашае на «Сенафэст» у вёску Чыгірынка са спаборніцтвамі касцоў, конкурсамі па пляценні вянкоў, вырабу фігур з сена і касцюмаў з прыроднага матэрыялу.

У аграгарадку Парэчча пад Гроднам з'явіўся першы на тэрыторыі Беларусі вакзал. Менавіта праз станцыю Парэчча прайшла чыгуначная дарога Санкт-Пецярбург — Варшава. Таму тут 30 ліпеня ладзіцца Свята вакзала з тэатралізаваным прадстаўленнем, дзякуючы якому госці перанясуцца ў далёкі 1862 год — час, калі адкрываўся найстарэйшы на нашых землях пункт прыпынку цягнікоў.

Не забыліся арганізатары і на аматараў музыкі. У каляндары падзей — «Балетнае лета ў Вялікім» у сталіцы, міжнародны фестываль духоўнай музыкі ў Магілёве, шоу ў стылі Сан-Рэма на тэрыторыі замкавага комплексу «Мір», «Вечары Вялікага тэатра ў замке Радзівілаў», міжнародны конкурс джазавай і эстраднай музыкі ў Салігорску, міжнародны фестываль старадаўняй і сучаснай камернай музыкі ў Полацку, фестываль «Вялікая бард-рыбалка» на Быхаўшчыне, конкурс бардаўскай песні памяці Уладзіміра Высоцкага «Музыка сэрцаў» на возеры Літоўка пад Навагрудкам.

У мясцінах, дзе праходзяць буйныя фестывалі, варта выдзеліць час на знаёмства з рэгіёнам. Напрыклад, пад кожны горад, у якім праходзіць Дзень пісьменства, распрацоўваюцца адмысловыя экскурсіі, на якія можна трапіць і падчас свята, і калі яно ўжо скончыцца.

Азнаёміцца з календаром адметных падзей можна на сайтах Міністэрства культуры і Нацыянальнага агенцтва па турызме.

Ганна ПЯТРОВА

Выбар рэдакцыі

Грамадства

Аднапакаёвыя кватэры імкліва даражэюць

Аднапакаёвыя кватэры імкліва даражэюць

Прычына — даступныя крэдыты і ажыятажны попыт.

Культура

Чым сёлета будзе адметны фестываль песні і паэзіі ў Маладзечне?

Чым сёлета будзе адметны фестываль песні і паэзіі ў Маладзечне?

Арганізатары і ўдзельнікі свята запэўніваюць — знайсці сабе адпачынак па душы зможа кожны.

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.