Жыхарка Полацкага раёна некалькі гадоў ашуквала знаёмых: cума шкоды амаль 100 тысяч долараў

Полацкія праваахоўнікі паставілі кропку ў шматлікіх ашуканскіх прыгодах 42-гадовай жыхаркі раёна. Пацярпелымі аказаліся адразу некалькі яе знаёмых. Падрабязнасці гэтай крымінальнай гісторыі паведамляе аддзяленне інфармацыі і грамадскіх сувязяў УУС Віцебскага аблвыканкама.

Першы з іх быў уцягнуты ў схему з набыццём бычкоў у мясцовай гаспадарцы. Жанчына расказала, што працуе на адказнай пасадзе на комплексе і можа наладзіць продаж гавяды па зніжанай цане. Пасля атрымання згоды падазраваная ўзяла грошы, але мяса палачанін так і не атрымаў. Замест гэтага неўзабаве ў яго жанчына папрасіла яшчэ 10 тысяч долараў на вырашэнне праблем.

Такой сумы ў пацярпелага не было. Пад напорам зламысніцы ён вырашыў закласці ў лізінгавую фірму сваю кватэру. Атрыманыя тысячы пайшлі ў рукі махляркі. Неўзабаве мужчына, каб аплаціць выстаўлены па крэдыце за жыллё рахунак, прадаў свой аўтамабіль. Частку атрыманых грошай ён зноў аддаў падазраванай.

Жанчына ў сваю чаргу выкупіла кватэру па відавочна заніжаным кошце і паспрабавала прадаць яе іншым знаёмым. Пад гэты працэс, а таксама на стварэнне ўжо ўпадабанай схемы з мясам, яна сабрала ў іншых пацярпелых яшчэ амаль 50 тысяч долараў.

Ашуканага мужчыну і яго малалетняга сына жанчына паспрабавала выселіць з кватэры. Паралельна жанчына працягвала збіраць грошы за наступную рэалізацыю квадратных метраў.

Пасля звароту ашуканых удзельнікаў яе шматлікіх афёр да праваахоўнікаў высветлілася, што ніякага дачынення да сельгасарганізацыі і яе кіраўніцтва падазраваная не мае. Толькі ў мінулым яна працавала там у якасці жывёлавода. Сталі вядомы і іншыя махінацыі жанчыны, а таксама пацярпелыя ад яе схем. Характэрна, што ў пагоні за чужымі грашыма махлярка нават збірала сродкі на пахаванне свайго жывога бацькі.

Падазраваная затрымана, у адносінах да яе заведзены адразу некалькі крымінальных спраў за махлярства. Сума ўрону набліжаецца да 100 тысяч долараў. Праводзяцца аператыўна-следчыя дзеянні.

Сяргей РАСОЛЬКА