З адказнасцю перад грамадствам

Вырашэнне пытанняў жыццезабеспячэння насельніцтва, рэалізацыя рашэнняў VІ Усебеларускага народнага сходу, а таксама дзяржаўных і рэгіянальных праграм — тры галоўныя кіты, на якіх была пабудавана работа мясцовых Саветаў дэпутатаў. Пра тое, як яна праводзілася, расказала падчас чарговай 44-й сесіі аблсавета Магілёўскага абласнога Савета дэпутатаў яго старшыня Ірына Раінчык.

Найбольш эфектыўнымі формамі работы з насельніцтвам, на яе думку, застаюцца асабістыя прыёмы грамадзян у выбарчых акругах, прамыя тэлефонныя лініі, дні дэпутата, дні Савета, сустрэчы па месцы жыхарства. Падчас такіх мерапрыемстваў усплываюць розныя праблемныя пытанні, якія хвалююць людзей.

У 2022 годзе дэпутатамі аблсавета праведзена больш за 600 прыёмаў грамадзян і прамых тэлефонных ліній, разгледжана каля дзвюх тысяч пытанняў. Непасрэдна ў абласны Савет жыхары звярталіся па пытаннях працаўладкавання, афармлення праваўстанаўлівальных дакументаў, налічэння жыллёва-камунальных плацяжоў, добраўпарадкавання населеных пунктаў, рамонту дарог, стану пітной вады, капітальнага рамонту жылфонду і іншых. У практыку прэзідыума аблсавета ўвайшоў разгляд зваротаў грамадзян з выездам на месца ў складзе рабочай групы з дэпутатамі мясцовых Саветаў і прадстаўнікамі выканаўчых органаў улады. Як паказваў вопыт, пытанні ў гэтым выпадку вырашаюцца аператыўна.

Станоўча зарэкамендавала сябе і практыка правядзення сумесных прыёмаў з дэпутатамі Палаты прадстаўнікоў Нацыянальнага сходу Рэспублікі Беларусь і членамі дэпутацкай групы грамадскай арганізацыі «Белая Русь».

Летась з падачы прэзідыума Магілёўскага аблсавета традыцыйнымі сталі сустрэчы прадстаўнікоў Маладзёжнага парламента са спецыялістамі па рабоце з моладдзю вядучых арганізацый вобласці і прадпрыемстваў. На форуме «Новы фармат» удзельнікі прэзентавалі найлепшыя маладзёжныя практыкі, абмяняліся досведам работы, вызначылі задачы на перспектыву.

Прааналізаваць, як у раёнах працуюць дзяржаўныя праграмы, дапамагаюць выязныя сесіі аблсавета, у якіх удзельнічаюць дэпутаты ўсіх узроўняў. Падчас іх народныя абраннікі знаёмяцца з сацыяльна-эканамічным патэнцыялам пэўнай мясцовасці, сустракаюцца з неабыякавымі, ініцыятыўнымі грамадзянамі.

Дэпутаты вобласці працягвалі ўзаемадзейнічаць з актыўнымі прадстаўнікамі насельніцтва, дапамагаць ім рэалізоўваць грамадзянскія ініцыятывы. Адбыўся абласны конкурс, у выніку якога сем ініцыятыў былі падтрыманы не толькі арганізатарамі, але і Банкам развіцця Беларусі. Агульная сума, якая была выдзелена на рэалізацыю народных праектаў, склала 100 тысяч рублёў.

У прыватнасці, каля крыніцы ў вёсцы Барысавічы Клімавіцкага раёна створана камфортная зона адпачынку, у раёне пасёлка Дачны Магілёўскага раёна з'явілася цікавая грамадская прастора. Больш функцыянальнай стала зона адпачынку мікрараёна «Цэнтральны» ў Чавусах. У Быхаве створаны спартыўны гарадок, у Бабруйску ў раёне жылога дома № 30 па Георгіеўскім праспекце матэрыялізавалася зручная і для дзяцей, і для дарослых гульнявая пляцоўка і зона адпачынку. Аграгарадок Фашчаўка ў Шклоўскім раёне атрымаў магчымасць пабудаваць дзіцячы гульнявы парк. А каля знакамітай Блакітнай крыніцы ў Слаўгарадскім раёне з'явілася пешаходная сцяжынка і пандус для калясачнікаў. Каардынацыяй і фінансаваннем усіх гэтых праектаў займалася Магілёўская абласная асацыяцыя мясцовых Саветаў дэпутатаў. А рэалізаваны праекты пры непасрэдным удзеле мясцовых грамадзян, якія якраз і праявілі ініцыятыву гэтыя праекты.

— І гэта толькі малая частка таго, што мы робім для ўстойлівага развіцця кожнага раёна вобласці, — удакладніла дырэктар асацыяцыі Паліна Церашкова. — Напрыклад, летась пераможцамі конкурсу найлепшых практык па рэалізацыі СУР-2035, які праводзіўся ў рамках Тыдня ўстойлівага развіцця, сталі ініцыятыва жыхароў Чавус па стварэнні тэрыторыі сацыяльнага прыцягнення і зносін «Вадатрыум» і праект па стварэнні мемарыяльнага комплексу «Памяць расстраляць немагчыма» ў Круглым. Мы заахвочваем насельніцтва, каб яно прымала непасрэдны ўдзел у рэалізацыі Стратэгіі ўстойлівага развіцця Магілёўскай вобласці на перыяд да 2035 года.

Плённа развіваецца міжнароднае супрацоўніцтва з расійскімі рэгіёнамі. У стадыі прапрацоўкі знаходзяцца пытанні па развіцці лакальнай эканомікі, чалавечага патэнцыялу ў культурнай і прадпрымальніцкай сферах, захавання гістарычнай спадчыны канкрэтных населеных пунктаў Магілёўскай вобласці.

— Не ўсю работу можна вымераць лічбамі — значна больш шануецца выхаванне ў людзях сацыяльнай адказнасці, грамадзянскай пазіцыі і актыўнасці, — падкрэсліла Ірына Раінчык. — Безумоўна, работа прэзідыума Магілёўскага аблсавета, дэпутацкага корпуса вобласці, органаў тэрытарыяльнага грамадскага самакіравання служыць на карысць жыхарам Прыдняпроўскага краю і грамадству ў цэлым. Наша цеснае ўзаемадзеянне — гэта практыка, калі грамадства бярэ на сябе адказнасць і гатова ўдзельнічаць у рашэнні задач сацыяльна-эканамічнага развіцця вобласці.

У рабоце сесіі прынялі ўдзел старшыня Магілёўскага аблвыканкама Анатоль Ісачанка, дэпутаты Палаты прадстаўнікоў і члены Савета Рэспублікі Нацыянальнага сходу Рэспублікі Беларусь, дэпутаты, кіраўніцтва Магілёўскага аблвыканкама, кіраўнікі структур арганізацый і службаў. Перад сесіяй удзельнікі азнаёміліся з выставай, дзе быў прадстаўлены патэнцыял Магілёўскай вобласці.

Нэлі ЗІГУЛЯ