Такое хвалюючае для жыхароў глыбінкі пытанне, як закрыццё аддзяленняў паштовай сувязі з-за аптымізацыі, яшчэ некалькі гадоў таму ўскалыхнула і прымусіла перажываць вяскоўцаў многіх сельскіх населеных пунктаў па ўсёй краіне. Вядома, у вёсках, дзе з грамадскіх аб'ектаў часта толькі крама, пошта — фарпост сацыяльнага жыцця. У новых умовах, без стацыянарных аддзяленняў сувязі, актыўная работа пошты на вёсцы працягваецца. І гэта жывы працэс, якія развіваецца і ўдасканальваецца. Карэспандэнт «Звязды» разам з паштальёнам мотадастаўкі адправілася ў рэйс па Калінкавіцкім раёне Гомельшчыны.
Паштальён па суправаджэнні і абмене пошты Калінкавіцкага рэгіянальнага вузла паштовай сувязі Наталля Бурлакова на маршруце два гады. Яна — мабільны паштальён, разам з кіроўцам Васілём Туроўчыкам штодзень аб'язджае замацаваны ўчастак матарызаванай паштовай дастаўкі. Нягледзячы на новы фармат работы, у яе як спецыяліста, што працуе ў вёсцы, па-ранейшаму вельмі важная сацыяльная місія, гаворыць Наталля.
— Тут трэба быць яшчэ і псіхолагам, бо людзі чакаюць не толькі газет і тавараў, але і ўвагі. Хочуць пагаварыць. Таму вельмі ўважліва слухаю, якія паслугі пошты патрэбныя чалавеку, бяру заказы, але заўсёды памятаю пра час на маршруце.
Наталля перакананая, што перавага мабільнага паштальёна ў тым, што ён прыязджае ў замацаваныя за ім вёскі кожны дзень.
— Міхнавічы, Клінск, Рудня-Гарбавіцкая, Рудня-Антонаўская, Якімавічы, Садкі — населеныя пункты на маім маршруце, — расказвае Наталля.
Усяго ў яе як у паштальёна па суправаджэнні і абмене пошты зона адказнасці — каля двухсот адрасатаў.
Экіпаж на машыне з пазнавальнай паштовай афарбоўкай якраз уязджае на тэрыторыю буйной, але аддаленай вёскі Міхнавічы, што амаль за 20 кіламетраў ад Калінкавіч. У вёсцы экіпаж мотадастаўкі развозіць па спецыяльных скрынях карэспандэнцыю для адрасатаў, а паралельна дастаўляе дадому раней заказаныя вяскоўцамі тавары.
— Вяскоўцы сёння могуць заказаць поштай усё што заўгодна: ад бялізны да веласіпеда ці камбікорму, ад цукру да цэменту, — тлумачыць Наталля Бурлакова і паказвае сваё галоўнае рабочае «ўзбраенне» — «Мабільны паштальён». Гэта апаратна-праграмны комплекс з выхадам у інтэрнэт і рэспубліканскую сістэму аплаты, які дазваляе праводзіць усе безнаяўныя і наяўныя плацяжы анлайн падчас абслугоўвання дома.
— У нас здарылася любоў з першага погляду, — дзеліцца пастаянная кліентка надомнага абслугоўвання паштальёна ў Міхнавічах Паліна Іонава. — Вельмі ветліва ўсё, акуратна, прыстойна. І гэта не толькі мне даспадобы, але і ўсёй вёсцы. — Паліна Сцяпанаўна бянтэжыцца ад увагі прэсы, але жаданне зрабіць камплімент паштальёну перамагае. — Я ў асноўным заказваю прадукты па пошце, плачу «камуналку», кладу грошы на інтэрнэт і тэлефон. Атрымліваю таксама пенсію, бо сучаснай карткай карыстацца я ўжо не змагу.
Паліна Сцяпанаўна ў родных Міхнавічах 15 гадоў адпрацавала настаўніцай у школе, потым бібліятэкарам пры Доме культуры. Таму пенсіянерка вельмі добра разумее перажыванні людзей, калі важныя сацыяльныя аб'екты на вёсцы закрываюцца. Яна лічыць, што трэба настройвацца на лепшае. Мара жанчыны цяпер — каб яе любімы мабільны паштальён мог з карткі выдаць наяўныя грошы.
— Праз мабільнага паштальёна атрымліваю пенсію, купляю ўсе прадукты, якія патрэбны, — падзялілася ўражаннямі яшчэ адна адрасатка, да якой разам з экіпажам мабільнага паштальёна заязджаем у Міхнавічах, — Тамара Дзейкун.
— І будаўнічыя матэрыялы нам пошта дастаўляе, — дадае жыхарка Міхнавічаў Наталля Петрушэнка. — Адной маёй падапечнай прывезлі днямі сетку Рабіца, цэмент: агароджу хоча ставіць. Прывозяць і руберойд, ды і любы будаўнічы матэрыял. Яшчэ і ў двор занесці дапамогуць.
Наталля Уладзіміраўна амаль усё жыццё адпрацавала ў сельсавеце. Цяпер у роднай вёсцы яна — сацыяльны работнік, таму дакладна ведае, з якімі праблемамі сутыкаюцца тутэйшыя пенсіянеры. Іх у вёсцы 39 і ўсе без паштовых паслуг нікуды.
— Нашы людзі задаволеныя такім абслугоўваннем дома. Не чула, каб скардзіліся, што нешта не даставілі ці прывезлі не ў тэрмін, — кажа Наталля Петрушэнка.
Стацыянарнае аддзяленне сувязі ў Міхнавічах закрылася ў 2019 годзе, але засталося працаваць у цэнтры сельсавета — Якімавічах. Выкананне патрабаванняў дзяржаўнага сацыяльнага стандарту па дастаўцы пошты — пад пільным кантролем мясцовых органаў улады, акцэнтуе ўвагу старшыня Якімавіцкага сельвыканкама Калінкавіцкага раёна Рыта СТРЭЛЬЧАНКА.
— Безумоўна, спачатку ў людзей былі хваляванні, калі ў аддаленых вёсках зачынялі паштовыя аддзяленні. Але былі і іншыя аб'ектыўныя прычыны. Напрыклад, у Міхнавічах, хоць населены пункт значны — больш за 300 жыхароў, — доўгі час была праблема з супрацоўнікам аддзялення. Тут побач чыгуначная станцыя, многія працуюць у горадзе, а вёска ператвараецца ў населены пункт пенсіянераў і дачнікаў. За пэўны час работу перасоўнай і мабільнай пошты наладзілі. Таму апошнія гады ніякіх скаргаў ці заўваг ад людзей наконт паштовых паслуг не паступае. Калі ёсць пэўныя адзінкавыя моманты, аператыўна перадаю просьбы і заўвагі ад людзей кіраўніцтву Калінкавіцкага рэгіянальнага вузла паштовай сувязі, — адзначае старшыня Якімавіцкага сельвыканкама.
Увогуле 11 супрацоўнікаў Калінкавіцкага рэгіянальнага вузла паштовай сувязі працуюць на вёсцы паштальёнамі па суправаджэнні і абмене пошты. Яны абслугоўваюць не толькі ўсе населеныя пункты Калінкавіцкага раёна, але і частку вёсак Петрыкаўскага. Штодзень з Калінкавіцкага вузла адпраўляецца ў сельскае паштовае дзяжурства 12 машын.
— У Калінкавіцкім і суседніх Петрыкаўскім, Жыткавіцкім раёнах сельскія населеныя пункты, дзе няма стацыянарных паштовых аддзяленняў сувязі, усе паштовыя паслугі насельніцтву аказваюць паштальёны па суправаджэнні пошты. У Калінкавіцкім раёне на мотадастаўку пераведзена амаль 140 населеных пунктаў, — растлумачыла начальнік аддзела паштовай апрацоўкі, сартавання і дастаўкі Калінкавіцкага рэгіянальнага вузла паштовай сувязі Святлана КРОГАЛЬ.
У Жыткавіцкім вузле паштовай сувязі, які таксама адносіцца да Калінкавіцкага рэгіянальнага вузла паштовай сувязі Гомельскага філіяла РУП «Белпошта», — свая вясковая лагістыка: шэсць маршрутаў абслугоўваюць сельскія населеныя пункты Жыткавіцкага раёна і частку Петрыкаўскага.
— Паштальён па суправаджэнні пошты абслугоўвае не толькі населеныя пункты, пераведзеныя на аўтамабільную дастаўку, але і забяспечвае комплекс паслуг — прыём плацяжоў, дастаўку газет, паштовых адпраўленняў, — а таксама адказвае за абмен паштовай прадукцыяй з тымі сельскімі аддзяленнямі сувязі, якія знаходзяцца на маршруце, — падкрэсліла спецыяліст. — У любым выпадку наша задача — трымаць на кантролі якасць ахопу сацыяльна значнымі паслугамі вяскоўцаў і выкананне патрабаванняў дзяржаўнага сацыяльнага стандарту па дастаўцы пошты.
Наталля КАПРЫЛЕНКА
Фота аўтара
Калінкавіцкі раён.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
