У Міністэрстве абароны падвялі вынікі штогадовага творчага конкурсу на лепшае асвятленне ў сродках масавай інфармацыі пытанняў будаўніцтва і развіцця Узброеных Сіл, патрыятычнага выхавання насельніцтва Рэспублікі Беларусь. Сумесны праект рэдакцыі і абароннага ведамства — «Плацдарм», за выпуск якога адказвае рэдактар аддзела палітыкі Вераніка Канюта, — адзначаны першай прэміяй у намінацыі «Спецыяльны праект».
Сярод лаўрэатаў — журналісты вядучых друкаваных выданняў, інфармацыйных агенцтваў, радыё і тэлебачання. Як адзначыў падчас цырымоніі ўзнагароджання прадстаўнікоў масмедыя міністр абароны Віктар Хрэнін, сёння ў няпростых умовах ваенна-палітычнай абстаноўкі, калі супраць нашай маладой рэспублікі ідзе інфармацыйная вайна, менавіта такія каштоўнасці як бяспека і мір набываюць асаблівы сэнс.
— Вы, паважаныя журналісты, у адным страі з ваеннаслужачымі беларускай арміі і прадстаўнікамі іншых сілавых структур знаходзіцеся на перадавой, абараняючы і адстойваючы інтарэсы нашай роднай Беларусі, — звяртаючыся да прадстаўнікоў СМІ, заўважыў кіраўнік абароннага ведамства. — Беларускі народ штодзень, дзякуючы вашай прафесійнай дзейнасці, даведваецца аб тым, што робіцца ў нашай краіне для забеспячэння ваеннай бяспекі дзяржавы.
Па словах міністра абароны, ва многім, дзякуючы творчасці журналістаў, у нашай краіне і далёка за яе межамі добра ведаюць магчымасці і патэнцыял сучасных Узброеных Сіл Рэспублікі Беларусь. «Дзякуючы вашым аб’ектыўным і дакладным рэпартажам і публікацыям аб арміі, нашы нядобразычліўцы асцерагаюцца размаўляць з нашай краінай з пазіцыі сілы, — маючы на ўвазе лаўрэатаў конкурсу, адзначыў Віктар Хрэнін. — Менавіта дзякуючы вашым сюжэтам, тысячы беларускіх хлапчукоў мараць стаць сапраўднымі абаронцамі Айчыны. Сёння мы маем права гаварыць аб высокай эфектыўнасці і рэзультатыўнасці супрацоўніцтва Узброеных Сіл і сродкаў масавай інфармацыі».
Кіраўнік ваеннага ведамства выказаў падзяку прадстаўнікам масмедыя за важкі ўклад у забеспячэнне ваеннай бяспекі краіны. Ён упэўнены ў тым, што дзейнасць журналістаў і надалей будзе адрознівацца аб’ектыўнасцю і высокім прафесіяналізмам, а тэмы будаўніцтва і развіцця Узброеных Сіл, абароны Айчыны, патрыятычнага выхавання і ў па-ранейшаму будуць займаць годнае месца на старонках выданняў, тэле- і радыёэфіры.
Па словах намесніка міністра інфармацыі Ігара Бузоўскага, у Год міру і стварэння, аб’яўлены ў нашай краіне, конкурс гучыць як ніколі востра і важна. «Перад намі стаіць сумесная задача — усвядоміць, як рухацца далей: якім чынам развіваць сродкі масавай інфармацыі, як садзейнічаць забеспячэнню бяспекі нашай краіны», — падкрэсліў намеснік міністра. І ў гэтай сувязі, па яго меркаванні, многае залежыць ад журналістаў: ключавая задача — дзейнічаць пяром, каб не пайшлі ў год гарматы, ракеты.
Ігар Бузоўскі адзначыў, што інфармацыйная бяспека сёння вельмі важная і актуальная не толькі для вузкапрофільнай дзейнасці асобных галін міністэрстваў і ведамстваў, але і для ўсёй дзяржавы і кожнага чалавека паасобку. «Неабходна напрацоўваць медыяпісьменнасць не толькі праз метадычныя дапаможнікі, але і праз зносіны са спецыялістамі, абменьвацца вопытам, — лічыць ён. — Кожны карыстальнік інтэрнэту — гэта ўдзельнік інфармацыйнага поля. Таму важна разумець, што адбываецца ў сетцы, ведаць, як правільна дзейнічаць і адстойваць свае інтарэсы ў інфармацыйным полі».
Вераніка КАНЮТА
Фота БелТА
Існуюць строгія патрабаванні да месцаў для купання.
Яе песні займаюць першыя радкі ў музычных чартах краіны, пастаянна гучаць на радыё і тэлебачанні.
