Вы тут

У Брэсце ўрачыста адкрылі 80-кватэрны дом для медыкаў


Па вуліцы Медыцынскай у Брэсце, побач з абласной бальніцай, узвялі дзесяціпавярховы арэндны дом для медыцынскіх работнікаў горада. У доме на два пад'езды усяго 80 кватэр, палова з іх двухпакаёвыя, 20 — аднапакаёвыя і 20 — трохпакаёвыя.


Сімвалічны ключ трымае галоўны ўрач Брэсцкай абласной клінічнай бальніцы Аляксандр Карпіцкі.

З наваселлем медыцынскіх работнікаў прыехаў павіншаваць старшыня Брэсцкага аблвыканкама Юрый Шулейка. Як адзначыў губернатар падчас цырымоніі адкрыцця, дом узведзены па распараджэнні кіраўніка
дзяржавы.

— Пляцоўку для дома выбіралі з улікам камфорту жыльцоў. Навасёлы, думаю, ацанілі той факт, што дом знаходзіцца блізка ад работы, побач — лесапаркавая зона, добрая транспартная лагістыка, — адзначыў губернатар. — Кватэры ўтульныя, светлыя, засталося вясной высадзіць кветкі, і двор стане выглядаць зусім прывабна. Большасць кватэр выдзелена работнікам абласной бальніцы, ключы атрымалі супрацоўнікі рознага рангу — ад санітаркі да ўрача вышэйшай катэгорыі, ёсць у ліку жыльцоў і медыкі іншых лячэбных устаноў горада. З улікам членаў сем'яў у доме будзе пражываць каля 200 чалавек. Цяпер разглядаем магчымасць рэканструкцыі аднаго з двух інтэрнатаў абласной бальніцы для пераводу будынка ў арэндны дом.

Галоўны ўрач абласной клінічнай бальніцы Аляксандр Карпіцкі ў размове з журналістамі адзначыў, што мінулы 2022 год стаў для іх установы паспяховым:

— Па-першае, мы вярнуліся да аб'ёмаў медыцынскай дапамогі, якія былі да ковіду. Летась мы атрымалі статус навуковай арганізацыі і сёння з'яўляемся адзінымі сярод рэгіянальных бальніц, хто мае такое званне. Нядаўна завяршылася работа над выкананнем праектна-каштарыснай дакументацыі на новы хірургічны корпус. Будаўнічыя работы распачнуцца вясной.

Гэта вялікі праект, разлічаны на тры гады будаўніцтва. Каштарысны кошт складае каля 220 мільёнаў рублёў, з якіх прыкладна 100 мільёнаў пойдзе на абсталяванне. Увядзенне ў строй аб'екта абяцае стаць прарыўной вяхой аказання медыцынскіх паслуг на Брэстчыне. Тут будуць праводзіць высокатэхналагічныя аперацыі, у тым ліку жыхарам іншых рэгіёнаў Беларусі. Фінансавацца будаўніцтва будзе пароўну з рэспубліканскага і абласнога бюджэтаў. Паводле праекта, корпус будзе складацца з двух блокаў. У чатырохпавярховым будынку размесцяць прыёмнае, рэанімацыйнае, аперацыйнае, цэнтралізаванае стэрылізацыйнае аддзяленні і аддзяленне гемадыялізу. У другім будынку лячэбнага блока размесцяцца кардыялагічная, кардыя-
хірургічная і сасудзістая дапамогі. Дадаткова будуць адкрыты тры аддзяленні, у тым ліку інфарктнае і парушэнняў рытму. З часам у абласной бальніцы з'явяцца дзве гібрыдныя аперацыйныя — кардыяхірургічная і сасудзістай хірургіі. Апошняе дазволіць брэсцкім медыкам адначасова выкарыстоўваць малаінвазійную методыку з адкрытымі аперацыямі на сэрцы і сасудах.

Сям'я Адамчук у новай кватэры.

Каб усё гэта функцыянавала на належным узроўні, патрэбны кваліфікаваныя кадры, якія ўжо сёння напрацоўваюць вопыт. Замацоўваць найлепшых — задача, важная нароўні са стварэннем матэрыяльна-тэхнічнай базы. Таму і адзначылі на святочнай цырымоніі, што новы арэндны дом як падарунак: у яго засяляюцца ў асноўным маладыя людзі каля 30 гадоў. Такія, напрыклад, як сям'я Сяркевічаў. Павел і Алена выхоўваюць малога сына, абое — медыкі. Да гэтага жылі на здымнай кватэры. Павел працуе ўрачом-рэаніматолагам у абласной бальніцы. Сказаў, што з жонкай ужо пакуюць рэчы і спадзяюцца за тыдзень пераехаць. Іх суседзямі па доме будзе таксама сям'я медсястры Наталлі Сарокі. Яе стаж у абласной бальніцы набліжаецца да васьмі гадоў, сёння Наталля працуе старшай медсястрой аддзялення функцыянальнай дыягностыкі, разам з мужам выхоўвае дачку і сына. Да гэтага сям'я жыла ў інтэрнаце. Хірург Ігар Белавусаў пакуль сям'і не мае, атрымаў аднапакаёвую кватэру. Усе навасёлы ў адзін голас дзякавалі будаўнікам, бо кватэры здадзены пад ключ, можна завозіць мэблю і жыць.

Будаўніцтвам дома займаліся спецыялісты КУП «Брэстжылбуд». Іх генеральны дырэктар Аляксандр Раманюк уручыў сімвалічны ключ Аляксандру Карпіцкаму. Пры гэтым адзначыў, што будаўнікі зрабілі ўсё магчымае для камфорту гаспадароў. І сапраўды, госці навасёлаў маглі ўпэўніцца, што кухні і санвузлы абсталяваны ўсім неабходным, сцены і падлогі не патрабуюць рамонту. На дваровай тэрыторыі праведзена добраўпа-
радкаванне. А вокны большасці пакояў выходзяць на сасновы бор.

Памочнік Прэзідэнта — інспектар па Брэсцкай вобласці Валерый Вакульчык, які прысутнічаў на адкрыцці, адзначыў, што будаўніцтва арэнднага дома для медыкаў стала першым падобным прыкладам у краіне і, магчыма, паслужыць пачаткам добрай традыцыі.

Святлана ЯСКЕВІЧ

Фота БелТА

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.