Пайшоў з жыцця грамадскі дзеяч Ян Янавіч Сычэўскі

Пайшоў з жыцця Ян Янавіч Сычэўскі, які напрацягу доўгіх гадоў узначальваў Беларускае грамадска-культурнае таварыства ў Польшчы.

Ураджэнец вёскі Стрыкі Бельска-Падляшскага павета Беластокскага ваводства, ён прасіў не выкарыстоўваць словы «дыяспара» ці этнічная меншасць. «Якая ж мы дыяспара ці меншасць, калі нашы продкі-беларусы жылі на Беласточчыне спрадвеку», — з такімі словамі ён звярнуўся да прысутных на першым пасяджэнні Касультатыўнага савета кіраўнікоў грамадскіх арганізацый суайчыннікаў, якія пражываюць за мяжой, на сустрэчы, што праходзіла ў Нацыянальнай бібліятэцы. Ян Сычэўскі ўваходзіў у яго склад, шмат зрабіў для наладжвання стасункаў паміж арганізацыямі Беларусі і Польшчы. Быў сярод дэлегатаў замежжа на ІV Усебеларускім народным сходзе, ганаровым госцем на Першым фестывалі мастацтваў беларусаў свету. Адзначаны медалём Францыска Скарыны.

Беларускім грамадска-культурным таварыствам Польшчы шмат зроблена для захавання мовы і культуры продкаў. Адно з найбольш яскравых і вялікіх мерапрыемстваў, якое яно праводзіла, — агульнапольскі фэст «Беларуская песня».

Апарат Упаўнаважанага па справах рэлігій і нацыянальнасцяў смуткуе з прычыны смерці Яна Янавіча Сычэўскага, выказвае глыбокія спачуванні яго родным і блізкім.