Вы тут

Беларускі ваенна-палявы шпіталь у Алепа завяршыў сваю гуманітарную місію


Тысячы грамадзян Сірыі атрымалі высокакваліфікаваную медыцынскую дапамогу нашых спецыялістаў.

Беларускі ваенна-палявы шпіталь у Алепа завяршыў сваю гуманітарную місію. Наш кантынгент вярнуўся ў Беларусь. Сустракалі медыкаў у пагонах як герояў — з кветкамі, аркестрам, хлебам-соллю.


Каля месяца таму медыцынскі атрад спецыяльнага прызначэння 432-га Галоўнага ваеннага клінічнага медыцынскага цэнтра Узброеных Сіл Рэспублікі Беларусь у экстранным парадку быў накіраваны ў сірыйскі Алепа для аказання медыцынскай дапамогі насельніцтву, якое пацярпела ад землетрасення. Нагадаем, 6 лютага на паўднёвым усходзе Турцыі і паблізу граніцы з Сірыяй адбыліся землетрасенні магнітудай 7,7 і 7,6 бала. Менавіта гэтыя дзве дзяржавы пацярпелі больш за ўсё. Сусветная арганізацыя аховы здароўя паведаміла, што ў Сірыі пасля землятрусу загінула каля васьмі тысяч чалавек. Дзясяткі тысяч жыхароў атрымалі траўмы і калецтвы.

Беларусы неабыякавыя да чужога гора. Як толькі стала вядома аб ахвярах землетрасення, у Мінску людзі масава пачалі прыходзіць да пасольстваў Турцыі і Сірыі, каб выказаць спачуванні ў сувязі з гібеллю людзей. Аднак дапамагчы мы гатовы не толькі словам, але і справай. Беларусь — адна з нямногіх, хто першай працягнула руку дапамогі шматпакутнаму народу Сірыйскай Арабскай Рэспублікі. Па рашэнні кіраўніка дзяржавы спецыялісты медыцынскага атрада спецыяльнага прызначэння былі накіраваны ў Алепа.

Лячэбныя баі без пройгрышу

Сірыйскі народ заўсёды будзе памятаць тое, што для іх зрабілі ўрачы з Беларусі. Дзень у дзень, без адзінага выхаднога, працавалі нашы спецыялісты. Дзякуючы рабоце беларускіх ваенных медыкаў, тысячы грамадзян Сірыі атрымалі высокакваліфікаваную медыцынскую дапамогу.

Вядучы хірург 432-га Галоўнага ваеннага клінічнага медыцынскага цэнтра палкоўнік медыцынскай службы Аляксей ТРУХАН, які працаваў у Сірыі, адзначае, што па аналізе вынікаў аказанай дапамогі можна сказаць аб паспяховым выкананні задач, пастаўленых перад беларускімі ўрачамі. «Людзям было патрэбна наша садзейнічанне, — згадаў ён. — Мы, у сваю чаргу, набылі бясцэнны досвед аказання медыцынскай дапамогі вялікай колькасці пацярпелых, што значна павысіла ўзровень падрыхтоўкі ўрачоў. Гэта першы вопыт самастойнага выканання ваеннымі медыкамі падобных задач за межамі Беларусі на працягу доўгага часу. Прыйшлося ўлічваць многія асаблівасці рэгіёна: кліматычныя, моўныя, рэлігійныя, пытанні аховы».

Не было ніводнага дня, калі беларускім ваенным медыкам не давялося б уступаць у лячэбны бой. І ні разу ён не быў прайграны. Нашы спецыялісты аказвалі дапамогу ў сярэднім да 200 пацыентам у суткі. Прычым дапамагалі як пацярпелым ад землятрусу, так і тым, хто атрымаў траўмы і калецтвы ў выніку баявых дзеянняў.

— Хацелася дапамагчы як мага большай колькасці пацярпелых, — распавёў начальнік медыцынскага атрада спецыяльнага прызначэння 432-га Галоўнага ваеннага клінічнага медыцынскага цэнтра палкоўнік медыцынскай службы Андрэй ГУРЫНОВІЧ. — Палявы лагер разгарнулі на працягу сутак. Праз суткі пасля прылёту мы ўжо ажыццяўлялі амбулаторны прыём. За ўвесь час знаходжання ў горадзе Алепа аказалі дапамогу 3082 пацыентам. Была вялікая колькасць пнеўманій, а таксама пераломаў ніжніх канечнасцяў ужо ў стадыі кансалідацыі. Жыхары Сірыі былі настроены ў адносінах да нас пазітыўна, чакалі дапамогі і з падзякай яе прымалі.

Шукран, Беларусь!

Як адзначыў памочнік міністра абароны па ідэалагічнай рабоце ва Узброеных Сілах — начальнік галоўнага ўпраўлення ідэалагічнай работы Міністэрства абароны генерал-маёр Леанід КАСІНСКІ, гуманітарная місія ў Сірыі па праве ўвойдзе ў гісторыю медыцыны Рэспублікі Беларусь як місія добрых сэрцаў.

«Задачы даводзілася выконваць не толькі ва ўмовах прыроднай катастрофы, але і ва ўмовах вядзення баявых дзеянняў, — звярнуў увагу Леанід Касінскі. — Мы з вамі ведаем, што супраць сірыйскага народа на працягу многіх гадоў вядзецца вайна. Акрамя таго, існаваў і моўны бар'ер. Умовы былі дастаткова няпростыя. Тым не менш, па паведамленнях з Сірыі, якія публікаваліся ў сродках масавай інфармацыі, мы бачылі, што нашы медыкі паспяхова спраўляліся з задачамі, якія былі пастаўлены перад імі. Па медыцынскую дапамогу звярталіся не толькі людзі, якія пацярпелі ад землетрасення. Ва ўмовах вядзення баявых дзеянняў у краіне востра адчуваецца недахоп урачоў і лекаў. Таму да беларускіх медыкаў ішлі з дзеткамі, ішлі старыя, жанчыны — нашы медыкі не адмовілі ніводнаму чалавеку. Вопыт, які атрымалі нашы ваенныя медыкі, унікальны і дарагога варты».

Адпраўляючыся ў Сірыю, ніхто з медыкаў да канца не ўяўляў, у якім складаным становішчы давядзецца выконваць задачы, але ніхто з іх не адмовіўся. У выніку пастаўленыя задачы былі выкананы з гонарам. Дарэчы, беларускі ваенна-палявы шпіталь знаходзіўся побач з адной з мясцовых школ. Было прыемна чуць дзіцячы смех і радасныя крыкі: «Беларусі, беларусі!» Дырэктар гэтай школы Адэль Хусеін таксама звярталася па дапамогу да нашых медыкаў.

«Шукран, Беларусь! (Дзякуй, Беларусь!) — казала яна ваенным урачам. — Сірыйцы ведаюць, каму і за што дзякуюць. Мы ўдзячныя Беларусі за тую падтрымку, якую яна аказала Сірыі, за гуманітарнае садзейнічанне. Па сабе ведаю, што такое вайна, а цяпер яшчэ і землетрасенне. Таму ваша дапамога вельмі важная для нас. Беларускія медыкі ў літаральным сэнсе паставілі майго бацьку на ногі. Дзякуй вялікі беларусам: яны, нібы анёлы, прыляцелі і выратавалі нас».

Горад Алепа толькі пачаў аднаўляцца пасля страшнай вайны. Чатыры гады ён быў у аблозе і барацьбе з ісламістамі. Апошнія землетрасенні пагоршылі карціну. Аднак на дапамогу прыйшлі беларускія ваенныя ўрачы — каторы раз наша краіна прадэманстравала ўсяму свету, што беларусы не могуць заставацца ўбаку ад чужой бяды.

Алег НЯКАЛА

Фота аўтара

Загаловак у газеце: Місія ўзаемадапамогі і дабрыні

Выбар рэдакцыі

Экалогія

Які інтарэс ў Беларусі ля Паўднёвага полюса

Які інтарэс ў Беларусі ля Паўднёвага полюса

Антарктыка, далёкая і блізкая.

Грамадства

Да купальнага сезона падрыхтуюць 459 пляжаў

Да купальнага сезона падрыхтуюць 459 пляжаў

Існуюць строгія патрабаванні да месцаў для купання.

Моладзь

Вераніка Цубікава: Натхняюся жаданнем дзяліцца

Вераніка Цубікава: Натхняюся жаданнем дзяліцца

Яе песні займаюць першыя радкі ў музычных чартах краіны, пастаянна гучаць на радыё і тэлебачанні.